47
1 Houg: yoomo Yoseb gi nya: mang: wim: yug ri shu" ci: lho: khokham pho jhang loo" bye:. Nyang: gi khokham ri ?Nga" phoo yo' nga" mang: nhung" yigi gougnyhoug gougdoo joem nyangnu" yoo" mooyoo" dangain" yo' Khanan mung" mo ju" re" boem bye:. Nyangnu" gi akhid" Goshen moug: moo ju" nyid boem abye:? ga: tid.
2 Hau: thang: nyang: gi nya: mang: tang: yiri khokham jhang fang kaid.
3 Khokham gi nyangnu" ri ?Nanu" ce: moo" zei: go" la"? ga: myid: lang" nyangnu" gi ?Phoug" phyid" xeig mo nyang: ngoonu" gi yang zoem: mo, nghoid- aseing: we"? ga: tid.
4 Khanan mung" moo phang" khoug gye" thain: yoomo gougnyhoug kaid zhoo" wa da" mhain" nu" jang: ajo, loo: yoomo he: moug: moo nyid wa shid mo re" loo bye:. Jeju" mo ngoonu" ri Goshen moug: moo nyid nhang: goo" la? ga: tid boem ago".
5 Khokham gi Yoseb ri ?Akhid" re" phoo yo' re" mang: nhung" yi ju" re" bye: gang mo
6 Egutu mung" gi nyangnu" da" moug: nghoid bye:. Nyangnu" ri he: moug: mo ge thang da" joyoo Goshen moug: moo nyid nhang: ge'. Houg: lho: nyangnu" khoug: moo: si' jhang: mo, bo nghoid rigi houg: bang: ri nga" gougnyhoug joem ri vhu" she: lho: zoem: nhang: we? ga: tid.
7 Hau: thang: Yoseb gi nya: phoo Yaku ri shu" lo lho: khokham jang" moo yhe: shu" shau" da:. Yaku gi khokham ri mainkaid dang: tid lho:
8 Khokham gi nyang: ri ?Nang gi apyaid khamyhoo' nghoid bye: la"?ga: lhoem: myid: da:.
9 Yaku gi ?Nga" da" kangso' gyung: khyoo: gi zain loem dasho: soem" xi: zain nghoid bye:. Hau: zain void gi aleing" kyeing" za: nghoid wigi ayoug: akhid" za: danghoid. Apyaid sheing: da" nga" phoug" phyid" yi da" apyaid rigi tho' oung: myhi: wa anghoid? ga: tid kyo".
10 Yaku gi khokham ri vhu" da" mainkaid dang: tid lho: thu lo.
11 Khokham amyeing" byid: khyo" Yoseb gi nya: phoo yo' nya: mang: tang: yiri Ramese voomoo" nam mo ge thang da" joyoo ri seing: nhang: lho: Egutu mung" moo nyhid: too" bye:.
12 Yoseb gi nya: phoo ri we' nya: mang: nhung" yiri we' houg: lho: nya: phoo da" yhoem: byu nyid moonyid- gyi: zoo: nge zoo: dangain" bang: ri zoo: shug gam zho" nyid da:.
13 Phang" khoug gi je je bue" loo yoomo khamoo: we' zoo: shug ajo, loo. Houg: lho: Egutu yo' Khanan mung" mo mung" byu yigi zooyoid yoomo yoem: neing: lo boem bye:.
14 Nyangnu" gug re" qei boem- Yoseb we' ngei dangain" ri zheing" lho: khokham khoo" khyo: ci: loo" bye:.
15 Egutu yo' Khanan mo bang: gi ngei dangain" yhung: thang pyam lang" Egutu byumyu" yigi Yoseb jhang re" lho: ?Ngoonu" ri zoo: shug byid: we' ngoonu" ri ashid: nhang: lhe". Ngoonu" ngei dangain" thang bye:? ga: tid boem.
16 Yoseb gi nyangnu" ri ?Nanu" da" yhoem: myhu: gougnyhoug ci: ri" ge'. Nanu" da" ngei dangain" thang byug lang" gi hau: ziyo' zoo: shug ri thid byid: wa? ga: doem tid.
17 Houg: yoomo nyangnu" gi gougnyhoug joem ri Yoseb jhang ci: re" boem wigi nyang: gi nyangnu" da" nu:- myang:- loo zei:- coidbaid- yang joem yo' nyangnu" ri zoo: shug lhoem: thid byid:. Hau: zain ri nyang: gi nyangnu" da" yhoem: myhu: gougnyhoug joem dangain" yo' thid lho: nyangnu" ri zoo: shug yo' khu: bye:.
18 Thang: zain moo nyangnu" gi doem re" lho: ?Aseing: we"- ngoonu" gi re" shidkhoin" moo anghoeb azoug" jha" tid ba. Ngoonu" ngei we' dangain" thang khare" wigi ngoonu" da" gougnyhoug joem dangain" we' re" da" zi kyeing" nghoid byug bye:. Ngoonu" da" gung du: joem yo' yoothung" yoogu: joem mo laid: lho: nang ri byid: wa gootu: ci: we' adeing loo:.
19 Ngoonu" ri ashid: nhang:. Nheig khyeug yu la. Ngoonu" da" dain" ri yooyang" no, yoid abue" pyam nhang:. Ngoonu" ri qei yu wigi ngoonu" mougmyid yo' zoo: shug thid wa nghoid wigi ngoonu" gi khokham da" join koid wa nghoid wigi ngoonu" da" mougmyid ri we' nyang: ri seing: nhang: loo: wa. Ngoonu" ri kang: xo' wa zoo: shug byid: wigi ngoonu" da" dain" moo khyoo' wa myoug: shi" byid: la? ga: re" tid boem.
20 Yoseb gi Egutu mung" goin" mo mougmyid joem dangain" ri khokham shid re" qei pyam bye:. Phang" khoug gye" gyoug pho" bue" loo yoomo Egutu byumyu" yi dangain" bang: gi nyang: nya: myidjang ri oung" pyam wigi myidjang dangain" gi khokham zi bui" khari" bye:.
21 Yoseb gi Egutu mung" dangain" mo mung" byu yiri join koid yu pyam bye:.
22 Khainjung yi seing: da" myidjang ri kyeing" za: aqei yu loo: dateing too" lo. Nyangnu" myidjang ri aoung" boem zigi khokham gi houg: bang: ri zoo: shug tham: sho' pang" thoug yu" byid: nyid yoomo nghoid.
23 Yoseb gi mung" byu yiri ?Boin: go" la"- ngoo gi nanu" ri we' nanu" da" mougmyid ri we' khokham shid mo qei yu pyam bye:. He: zigi nanu" da" dain" joem moo khyoo' wa da" myoug: shi" nghoid.
24 Shivoo: zheing" yo, ri nanu" gi khokham ri wim boem mo daboem re" byid: ge'. Deing da" gu: ri nanu" yhung: lho: nanu" zoo: ge'? ga: tid.
25 Ngoonu" gi ?Aseing nang- ngoonu" kang: ri khyoid yu abye:. Nang gi ngoonu" tho' moo ge lho' nyid su: nghoid wigi ngoonu" gi khokham da" join yi bue" nyid wa bye:? ga: tid boem.
26 Houg: yoomo Yoseb gi Egutu mung" moo shivoo: shiloem wim: boem mo daboem gi khokham ri byid: ca" wa da" tarha" daloem: ri koid too" bye:. He: tarha" gi akhid" nyid" ju" sho' jha" jo, nyid bye:. Khainjung bang: da" myidjang joem ri za: khokham aseing: yu nghoid da:.
27 Israela byumyu" yigi Egutu mung" Goshen moug: moo nyid wigi houg: moo nyangnu" gi yo" de lo wigi zooshang: yi nyid myo: lo boem bye:.
28 Yaku gi Egutu mung" moo apyaid dasho: myid: xe: nyhed zain ju" sho' daxi: nyhed zain nyid ju" bye:.
29 Nya: shid: yo, gi jhang bye: yoomo nya: zoo: Yoseb ri khe: yu lho: ?Re" lo, nga" tang" bau" agyo: moo kaid lho: nang gi ngoo ri Egutu mung" moo anyhoeb wa ein: jham' tang: we'.
30 Ngoo gi nga" phoug" phyid" myhoeb da" jang" moo danyhoeb nau. Egutu mung" mo ngoo ri vu, thu lo" wigi hau: jang" moo ngoo ri dalo" myhoeb ge'? ga: tid.
Yoseb we' ?Nang tid khyo" ngoo koid wa bye:? ga: tid.
31 Yaku gi ?Nang koid wa ein: da" jham' tang: we? ga: doem tid wigi Yoseb we' jham' tang: dang: theing to" wigi Yaku we' nya: yhoeb jang: mo jeju" boin: dang: tid bye:.