1 Eig zain myang" thang: Egutu khokham yhoeb mo, myang zigi nyang: gi Nila gyid lang yam moo yhe: yab nyid. 2 Hau: uri xu: lho: myhug myhug jhoid jhoid wim da" nujung zeing nyhed du: gi gyid mo thu lo lho: vhu fu" mhain" lham" zo: nyid boem ago". 3 Hau: thang: gyi" thung" khug da" gootu: nujung zeing nyhed du: thu lo. Nyangnu" gi re" lho: gyid yam moo gootu: nujung zeing yi nam moo yab jo, boem. 4 Houg: lho: gyi" da" nu: joem gi xu: da" nu: joem ri zo: pyam. Hau: thang: khokham phoo yhoeb so" re". 5 Nyang: dalheing: doem yhoeb myhid lo" wigi gootu: yhoebmo, daloem: doem myang. Gye mo gye gyeing da" gug nham: nyhed nham: gi dagam moo za: zei: to" da:. 6 Hau: thang: dain" pyoid mo lo da" uglid wigi moid hau' soem: pyam da" gug soem: gug pyang nyhed nham: gi zung" zung" yab jo, wigi 7 Po" soem: da" gug nham: joem gi mo yung" da" gug nham: joem ri myhau: pyam da:. Khokham phoo gi yhoeb so" re" wigi nyang: yhoebmo, mo, nyid ziri doem se' yu da:. 8 Nab soin: moo nyang: gi seing" khoo" yoomo Egutu mung" mo maindain: sara: yi yo' phajhi" boo mo, dangain" ri khe: yu lho: nya: yhoebmo, ri tid kyo". Nghoid loug we' hau: yhoebmo, ri hang" we' ayo" tid phuid: kyoo".

9 Hau: thang: zabyid yhid: jang su: gi khokham ri ?Ngoo zei: shoid to" da" khyoo: ri akhid" nyid" ngoo yhen: yu ba. 10 Nang gi moug zooyho' bung: su: yo' ngoo ri nheig yo: lho: lhoug zung" zoug: pho da" yhoem: moo nga" tang: ri thung: lhung to". 11 Damyen ri nga" tang: gi yhoebmo, dayug daja: myang wigi yhoebmo, gi dang: kang: adu goo". 12 Zung" lhoug zoug: pho da" join dayug nghoid da" Hebre zooyam zoo: dayug gi nga" tang: yo' dage" thung: lung" nyid. Nga" tang: da" yhoebmo, nyang: ri tid kyo" wigi nyang: gi nga" tang: da" yhoebmo, ri phuid: kyo" da:. 13 Nyang: tid ziyo' dakhyoo" ti" bue" lo wigi nang gi ngoo ri nga" joyoo moo doem nyid: nhang: nghoid loug moug zooyho' bung: su: rigi nang said pyam abye: da? ga: tid kyo".

14 Khokham phoo gi Yoseb ri shu" nhang: kaid lho: nyang: gi thoung: mo dalheing: dam shu" thu yu zi shoug" bye:. Nyang: gi shoomoug" yid pyam lho: byimi thid pyam wigi khokham shidkhoin" khyoo: vang yhi: bye:. 15 Khokham pho nyang: ri ?Hang" we' ase' phuid: kyo" da" yhoebmo, daloem: ngoo myang. Nang yo" tid shid kyo" wa shid re" hau: ziri ngoo nang ri tid kyoo" ba? ga: tid.

16 Yoseb gi ?Aseing: khokham we"- ngoo gi se' phuid: kyoo" wa anghoid- nghoid loug Mangsoo gi nang nheugshid: sho' phuid: kyo" loo baja" o"? ga: tid.

17 Khokham phoo gi ?Ngoo yhoebmo, myang zigi ngoo gi Nila gyid lang yam moo yab jo. 18 Hau: uri xu: lho: pyoid pyoid jhoid jhoid wim da" nujung zeing nyhed du: gi gyid mo thu lo lho: vufu" mhain" lham" zo: nyid boem ago". 19 Hau: thang: gyi" thang" khug da" gootu: nujung zeing nyhed du: thu lo. Houg: yhang: ti" gyi" thang" khug da" nujung joem gi Egutu mung" moo khanham we' amyang yu". 20 Gyi" da" nujung zeing joem gi xu: da" bang: ri zo: pyam da:. 21 Nghoid loug dayug we' hougsu" zo: pyam ziri ase' boem. Khasu" wim ga: ri hau: nu gyi" zeing joem gi akhang: yhang: ti" dajha" gyi" to" boem ago". Hau: thang: ngoo yhoeb so" loo bye:. 22 Ngoo yhoebmo, doem xo' myang zigi gye" mo gye" gyeing da" gug nham: nyhed nham: gi dagam moo za: zei: jo, da:. 23 Hau: thang: dain" pyoid mo uglid wigi moid hau' soem: pyam da" gug soem: gug pyang nyhed nham: gi zung" zung" yab jo, wigi 24 Po" soem: da" gug nham: joem gi mo yung" da" gug nham: joem ri myhau: pyam da:. Ngoo gi nga" yhoebmo, ri maindain: se' khyoug" mo, ri tid kyoo" nghoid loug we' nyangnu" hang" we' hau: khyoo: ngoo ri ase' phuid: khoo" nghoid ago"? ga: tid shid kyo".

25 Yoseb khokham ri ?Yhoebmo, eig loem: goin" da" dang: kang: dakhyoo" ti" nghoid. Mangsoo gi nyang: zei: loo wa da" moo" zoo" ri nang ri tid kyo" zi nghoid. 26 Xu: da" nujung zeing nyhed du: gi nyhed zain nghoid lho: mo gyeing da" gug nham: nyhed nham: we' nyhed zain nghoid. Eig ja: goin" gi dang: kang: dakhyoo" ti" za: nghoid. 27 Thang: ri thu lo da" gyi" thang" khug nujung zeing nyhed du: yo' uglid wigi moid hau' soem: pyam da" gug soem: nyhed nham: gi phang" khoug nyhed zain nghoid. 28 Hau: zigi nang ri ngoo tid ziyo' dakhyoo" ti"- Mangsoo gi nyang: zei loo wa da" khyoo: nang ri toin" shed nyid zi nghoid. 29 Egutu damung" goin" mo gug shivoo: nyhed zain gye" gi wa nghoid. 30 Hau: thang: nyhed zain moo gi zooyoid phang" khoug bue" loo wa. Houg: lho: hau: phang" khoug da" gang mo damung" goin" byo, yoin" lo" wigi nyid gi yab gi khyoo: dangain" thang khari" wa zi nghoid. 31 Bue" loo wa da" phang" khoug gi gye" gyoug phoo" nghoid wigi agoin agoo" gug zoo yo" da" ayo, gi jhoid nyang: thang khari" wa nghoid. 32 Nang doem pug myang da" yoeb mo, we' Mangsoo gi soin' tu' to" wigi ju" loo wa da" ayo, moo nyang: zei loo wa da" khyoo: joem ri tid toin" shed nyid zi nghoid.

33 Akhid" nang gi phajhi" bo lho: nheigloem: soozoo: lheing: da" byu dayug yug ri khyen: yu lho: nyang: ri re" da" damung" goin" ri vhoebkhang" shu" vhu" nhang: we'. 34 Nang gi gootu: mung" vhoeb zoug: ludaid yiri we' khyen: yu lho: gug zoo: shivoo: ge da" nyhed zain khoug: moo gug wim: boem mo daboem ri khyu: yu we'. 35 Ju" loo wa da" gug zoo ge da" nyhed zain khoug: moo zoo: shug dangain" ri khyu: zheing: nhang: lho: voomoo" cang zheing" yung: to" lho: lhoug zung" too" we'. 36 Hau: zoo: shug gi Egutu mung" moo bue" loo wa da" phang" khoug nyhed zain khoug: moo zoo: wa da" zoo: shug joem bui" wa nghoid. He: khyoo: khyo" wigi mung" byu yi zooyoid gyid shid ashoug" wa nghoid? ga: wigi tid kyo".

37 Khokham yo' nya: zoug: ludaid yigi hau: khyoo: ri myid bo veing" boem lho: 38 nyang: gi nyangnu" ri ?Nyhang" gi Mangso Venyi: yo" yu to" da" su:- Yoseb tho' re" je ge da" byu gootu: dayug ri khanham we' shoug" shoo: loo: wa zi anghoid? ga: wigi tid. 39 Khokham phoo Yoseb ri ?Mangsoo gi he: khyoo: dangain" nang ri toin" shed bye:. Houg: yoomo nang gi gootu: dangain" bang: tho' re" phajhi" je boo su: yo' nheigloem: soozoo: lheing: su: nghoid zigi bang" bang nyang: nghoid bye:. 40 Nga" moug: nga" dain" ri vhoebkhang" su: nang ri ngoo koid nhang: wa hau: lho: nga" mung" byu yi dangain" gi re" dang: ri tam" gyo: boem wa nghoid. Re" da" amyeing" akhang" gi ngoo mo lid lho: azhang eig loem: gyi: su: nghoid wa. 41 Ngoo gi akhid" mo nang ri Egutu damung" goin" tho' mo meing: vhoeb zoug: yoovoin byid: bye:. 42 Khokham phoo gi nya: lo, mo mung" vhoeb dazid lo, pain" ri khyoid yu lho: Yoseb da" lo, moo pain" byid:. Zin: yung" pain" byisheing: ri foid byid: lho: nya: leung zeung: moo sheing: yi doem ri foid byid: bye:. 43 Nyang: gi Yoseb ri eig loem: ein: wa da" khokham myang: rheing" moo zhung: nhang: lho: nyang: ri phoug" tab ngi: byid: wa da" gung zung" su gi nya: shid vhu" khyoo: yhe: lo" wigi ?Khyoo: nyheing ge' khyoo: nyheing ge'? ga: nyho: tid. Houg: khyo" wigi Yoseb gi Egutu damung" goin" da" meing: vhoeb zoug: moo" bue" bye:. 44 Khokham phoo gi nyang: ri ?Ngoo gi khokham nghoid- houg: lho: Egutu mung" goin" mo dayug we' re" da" amyeing" ayo" ri ci: we' ayo" koid wa nghoid? ga: tid. 45-46 Nyang: gi Yoseb ri Zaphenad Phanea ga: da" Egutu myeing myheing byid: lho: Heliopoli voomoo" mo khainjung dayug nghoid da" Photiphera da" nya: zoo: myiyi: zoo: Asenad ga: su: ri yhoem: seing: myhi' khyo" Yoseb ri yu byid:. Yoseb gi Egutu khokham jhang moo" zei: shid" lo" uri apyaid soem" xi: zain nghoid bye:. Nyang: gi khokham yung" mo thu lo" lho: damung" goin" khyoo: thu so" yen" bye:. 47 Mung" moo: gug zoo gye" thu da" nyhed zain akhoug: moo: 48 thu' moothu' dangain" ri Yoseb gi zheing" yu lho: voomoo" joem cang young: to" da:. Voomoo" khang" moo" moo hau: da" aqei: ayam khyam: yoo cang mo thu da" zoo: noem joem ri nyang: cang zheing" young: to". 49 Panglai: cang mo midcoo: boem su" gug zoo gi gye" myo: lo wigi Yoseb gi hau: ziri ajha" nghab loo:.

50 Phang" khoug agyoo" shi" ri Yoseb gi Asenad yo' yuggi zoo: eig yug yoo" bye:. 51 Nyang: Mangso ri ?Mangsoo gi nga" da" phu" zo: khyoo: joem yo' nga" pho yhoem: byu yi dangain" ri to" myid pyam nhang: bye:? ga: tid wigi nya: zoo: mang: zeing yug ri Manashe ga: myeing myheing. 52 Nyang: gi ?Mangsoo gi ngoo kyi" khyeug shau" nyid da" moug: moo ngoo ri zooshang: byid: bye:? ga: wigi nya: zoo: laid yug ri Ephrim ga: myeing byid: da:. 53 Egutu mung" mo nyid pyo: nyid da" gug zoo shivoo: ge da" zain nyid nyhed zain thang lo" lho: 54 Yoseb tid ziyo' dakhyoo" ti" phang" khoug nyhed zain gi bue" shid" loo bye:. Mungdain: khang" moo" moo zooyoid phang" khoug gi bue" nyid bye:. Nghoid loug Egutu damung" goin" moo zoo: noem jo, jo, bye:. 55 Egutu byumyu" yigi zooyoid shid" loo lang" nyangnu" gi khokham jhang zoo: noem mho' lo boem bye:. Houg: yoomo nyang: gi nyangnu" ri Yoseb jhang yhe: lho: nyang: tid khyo" cang koid ge' ga: tid kaid. 56 Phang" khoug gi je je bue" lo wigi damung" goin" khyoo: ngam loo" bye:. Houg: yoomo Yoseb gi jhi: joem dangain" ri phang lho: Egutu byumyu" yiri gug zoo oung" byid: bye:. 57 Moug: gyab goin" mo byu yigi gug zoo qei wa shid re" Yoseb jhang re" boem. Khasu" wim ga: ri phang" khoug zeing gi joyoo khang" moo" moo bue" nyid bye:.