21
Aseing gi nyang: dangsoo" byid: to" ziyo' dakhyoo" ti" Sara ri mainkaid byid: lho: Ref 21:2: Heb 11:11. Abraham gi bain mang: bye: ri Sara gi zoonu" gung bue" lo lho: yuggi zoo: dayug khu: byid: bye:. Yuggi zoo: khu: loo wa nghoid ga: Mangsoo tid to" da" ayo, moo nyang: hau: zooshang: ri co' phyed bye:. Abraham gi hau: zooshang: ri Isag ga: myheing byid: lho: Ref 21:4: Apm 17:12; Lgy 7:8. Isag shed nyid" ju" lang" Mangsoo dangsoo" yo' dakhyoo" ti" Abraham gi nya: zoo: ri shooyid thang: yham" byid: bye:. Abraham gi Isag khu: lo da" ayo, ri apyaid dasho: zain nghoid bye:. Sara gi ?Mangsoo gi ngoo ri gau yi nhang: bye:. He: khyoo: ri shoug" gyoo: mo, dangain" we' ngoo yo' dakhyoo" ti" gau yi boem wa bye:? ga: tid. Hau: thang: xo' lho: Sara gi ?Zooshang: ri noug" jhug wa nghoid ein: Abraham ri hang" tid wa lha". Nghoid loug ngoo gi nyang: bain mang: bye: ri nya: shid re" zooshang: dayug ri khu: byid: bye:? ga: tid.
Zooshang: gi gyi: lo lho: nyang: ri noug" kang" da" nyid" ri Abraham gi pui" zeing daloem: ri koid byid: bye:.
Danyid" da" bidnyid moo Egutu byu Hagara gi Abraham shid re" khu: byid: da" Ishmela gi Sara da" nya: zoo: Isag yo' lhu: go" nyid boem. 10 Ref 21:10: Gal 4:29,30. Sara gi hau: ziri myang lho: Abraham ri ?He: da" join myhi' yo' nya: zoo: ri khaid thu pyam we'. He: yug da" nya: zoo: gi nga" zoo: yoo" wa mid- re" jonu" ci: we' nyang: ri age yoo" nhang: wa? ga: tid. 11 He: khyoo: gi Abraham shid re" gye" yau: khe" nyid. Khasu" wim gari Ishmela we' nya: zoo: nyang: nghoid. 12 Ref 21:12: Rom 9:7; Heb 11:18. Nghoid loug Mangsoo gi Abraham ri ?Zooshang: yo' re" join Hagara shid re" seing" akhoo" nyid. Sara nang ri tid khyoo" dangain" ri koid we'. Khasu" wim gari ngoo nang ri dangsoo" byid: to" da" nang yo" yu wa amyed ashen yiri Isag khyo" nyid ri" nhang: wa zi nghoid. 13 Byumyu" damyu" bui sho' join' myhi' da" zooshang: ri we' ngoo gi zooshang: myoo" sho' yoo" nhang: wa. Nyang: we' re" zoo: nyang: nghoid bye:? ga: tid.
14 Thang: nab soin: no' re Abraham gi Hagara ri zoo: noem dayham" yo' gyid byeung" sho' bo da" shooyid thung: daloem: ri byid: kaid. Nyang: gi hau: zoo: noem joem ri Hagara nung" khung: moo ki" byid: lho: nyang: ri zoo: shug yo' dage" thu loo" nhang: bye:. Hagara gi thu loo" khare" lho: Berasheba dain" pyoid khoug: cang so" lheing: yen" bye:. 15 Gyid dangain" thang byug uri nyang: gi zooshang: ri mhain" gyoem" daloem: khoug: moo nyid: kho' lho: 16 Pe 300 koo: ve: da" joyoo moo yhe: zhung: jo,. Nyang: gi nya: gung nyang: ?Ngoo gi nga" zoo: shid: ziri avoem" myang o"? ga: tid lho: nyang: houg: moo zhung: jo, wigi ngau re".
17 Mangsoo gi zooshang: da" ngoug thui: ri shau" gyo: wigi Hagara ri mougkhung: mo Mangso lagyoo: gi ?Hagara nang ci: myid myo: nyid lha". Agyug nyid. Mangsoo gi zooshang: da" ngoug thui: ri shoug" gyoo: bye:. 18 Too' we' zooshang: ri yhe: vu yu lho: pyoo" we'. Nya: da" amyed ashen yiri ngoo gi byumyu" zeing damyu" bui" nhang: wa? ga: re" tid. 19 Hau: thang: Mangsoo gi nya: myo, ri phang byid: lho: nyang: gi gyid thung" daloem: ri myang bye:. Nyang: gi houg: moo yhe: lho: shooyid thung: moo gyid yhe: kaid yu wigi zooshang: ri jhug bye:. 20 Mangsoo gi zooshang: gyi: yang" loo sho' nyang: yo' dage" nyid nyid. Nyang: gi Paran dain" pyoid khoug: moo nyid lho: gye" jhang: da" shoo" khaid su: dayug bue" loo bye:. 21 Nya: myhi' gi nyang: ri Egutu myiyi: dayug ri yu byid: bye:.
22 Ref 21:22: Apm 26:26. Hau: da" ayo, moo Abimeleg gi nya: gyizoug: phoo Phikola yo' dage" yhe: lho: Abraham ri ?Mangsoo gi nang zei: khyoo: dangain" moo nyang: bo. 23 Houg: yoomo nang gi ngoo ri we' nga" zoo: yiri we' nga" amyed ashen yiri we' amhau' afain" wa shid re" Mangso shidkhoin"- he: joyoo moo thang" cab daloem: koid too" shang. Ngoo gi nang ri phau" myang:- houg: yoomo nang khyo" we' ngoo ri nang yo' nyid nyid da" he: mungdain: ri phau" myang: wa ein: dangsoo" byid: too" we'? ga: re" tid.
24 Abraham gi ?Ngoo dangsoo" byid:? ga: tid kaid.
25 Abraham gi Abimeleg da" dei zoo: yi lhoid yu pyam da" gyid thung" da" khyoo: Abimeleg ri khyang" lhoem: shid. 26 Abimeleg gi ?Hougsu" hang" koid zi ngoo asi'. Nang gi he: khyoo: ngoo ri atid kyo" yu" shi". He: zigi ngoo xang: shi" shau" gyo: zi nghoid? ga: tid. 27 Hau: thang: Abraham gi Abimeleg ri yang yo' nu dayham" byid: lho: nya: tang: gi myid veing" khyoo: koid bye:. 28 Abraham gi yang nu" nyhed du: ri nya: yang phung: mo kho' thu pyam lang" 29 Abimeleg gi nyang: ri ?Nang hougsu" cikoid lha"? ga: myid:.
30 Abraham doem nghoid lang" we' ?He yang nu" nyhed du: ri nang lhoem: yu we'. Hid: khyo" wigi ngoo gi he: gyid thung" ri du: su: dayug nghoid da" khyoo: nang gi sagse: bue" nyid wa nghoid? ga: tid. 31 Hau: joyoo moo nya: tang: gi thang" cab to" da" joyoo nghoid yoomo hau: joyoo ri Berasheba ga: myheing byid: bye:.
32 Nyangnu" gi Berasheba moo he: da" myid veing" khyoo: bain koid thang: ri Abimeleg yo' Phikola gi Philisti mung" khyoo: tau" loo" khari" bye:. 33 Hau: thang: Abraham gi Berasheba moo magyeing gam dagam ri sho" lho: apyaid ato: Mangsoo Aseing ri noku bye:. 34 Abraham gi Philisti mung" moo myoo" sho' zain nyid nyid.