2
Hau: thang: ri daxe: myid: zain lid lo" thang ri Titu ri bo shu" ci: lho: Barnaba yo' dage" Yerusalem voomoo" khyoo: ngoo doem do, lo. Ngoo hidsu" do, lo" khyoo: gi Mangsoo byid: da" yoeb myang yoomo nghoid- vhujhung: yi kyeing" phoung da" zoebphoung: moo tungbau byumyu" yi ri ngoo kho" kyo" da" ngeibu: lu dang: da" khyoo: ri tid phoid: sho' kyo- Khasu" wim gari shid phyang" we' akhid" we' ngoo zei: so' voin vu, nyid da" moozoo" ri akoem: amyed aji abui" loo nhang: noug yoomo nghoid. Nga" byencang" phoo' Titu gi Heleni byumyu" nghoid- nghoid loug we' nyang: ri agyoo: atho' athang: yham" wa shid re" aphoug akhyoid akoid nhang: boem. Byu yi dayham" koem gi nyang: ri athang: yham" pyam nhang: nau boem- houg: bang: gi Khristu Yesu yo' daloem: za: bue" wigi kangso dei nyid yoomo ngoonu" yo" yu bye: da" loid byoin akhang" ri jooyu" su: koid wa shid re" Khristain mang nhung bue" mhau' lho: nyha" da" phung: moo bo gau" vang loo mo, nghoid boem ago"- nyangnu" gi ngoonu" ri join koid noug mo, nghoid nyid boem ago". Nghoid sho loug we' hau: ngeibu: lu dang: da" deingmain" khyoo:- nanu" shid re" dageing: teing jo, baja"- ngoonu" gi nyangnu" ri daminid' za: lang" asoem" byid: khyo' nyhoem: pyam boem wa zi anghoid.
myonhoo: yo" da" vhujhung: yi,, ein: soin: too" shau" bang: gi nyangnu" hang" nghoid boem zigi nga" shid re" gi ce" yhau: gyen: we' anghoid- Khasu" wim gari Mangsoo gi nghe: shoid khyo myang lhoo za: dang: aphyed' ngoo ri phajhi" byid: da" khyoo: aseig ci" we' abyid: boem nghoid da. Nyangnu" gi ngoo ri phajhi' aseig byid: wa gungkhoo:- Mangsoo gi Petru ri athang: yham" kham byid: da" Yuda yi ri hau: ngeibu: lu dang: kho" kyoo" wa yoovoin, byid: to" ziyo' dakhyoo" ti" ngoo ri gi athang: aphyed' da" tungbau byumyu" yi ri kho" kyoo" wa yoovoin, ab, byid: bye: da" khyoo: ri nyangnu" myang se' boem bye:. Khasu" wim gari Mangso da" yoem: moo" so' zeing khyo" Petru ri Yuda byumyu" yi shid re" lagyoo: aya: moo tang: too" byid: ziyo' dakhyoo" ti" ngoo ri we' tungbau byumyu" yi shid re" lagyoo: aya: moo tang: too" byid: bye:. Hougsu" ngoo ri byid: too" bye: da" jeju" ri zheung: myang da" uri phoung: da" zeingbung: te" vhujhung: zheung: nghoid nyid da" Yaku, Petru yo' Yohan gi Mangsoo ngoo ri byid: to" da" gooki" lid da" yoovoin ri laxoem" asoo" so" too" byid: boem bye:. Hougsu" nghoid yoomo ngoonu" dangain" bang: gi moo" voin luzoem" cang" yi nghoid da" khyoo: alhoo: ri thoin" shug khyoo" wigi nyangnu" gi Barnaba yo' ngoo ri lo, yo lo, khyo" lo, zei: zei: yu boem bye:- Ngoonu" gi tungbau byumyu" yi jhang moo moo" voin wigi nyangnu" rigi Yuda byumyu" yi jhang moo moo" voin wa shid re" myidveung" to" boem bye:. 10 Nyangnu" gi ngoonu" ri asho" ajhen: bang: da" khyoo: moo pang" thoug yu wa da" khyoo: ri ato" myhid' wa khyoo: dakhaid za: pyeing: kaid boem- he: da" khyoo: gi ngoo gye" myid to' ziyo' voin vu, nau da" moozoo" nyang: nghoid nyid bye:.
11 Nghoid loug we' Antioki voogung khyoo: Petru ju" yhe: uri nyang: zei: so' nyid da" avoid asam" gi shoid nyid da" khyoo: gi di: di: nyang: nghoid nyid yoomo ngoo gi nyang: ri mungbyu yi da" shidkhoin" moo gyi koid. 12 Yaku nhang: kaid da" byu yi houg: moo aju" ri" shi" da" shid moo Petru gi tungbau mangnhung" yi yo' dage" voem: shoin" zo: nyid ago"- nghoid loug houg: nhang: kaid da" byu yi ju" re" da" uri athang: yham" bye: bang: ri gyug yoomo tungbau byumyu" yi yo' voem: shoin" zo: nyid jangmo yho' thu lo. 13 Yuda mangnhung" gooji yi we' Petru yo' dage" seing" ayang" mo, yhang: ti" bo zheung: thu' lo" boem yoomo Barnaba lang" nyangnu" yo' bo thu lo" nyid. 14 Akhid" nyangnu" gi ngeibu: lu dang: da" deingmain" da" khyoo: moo dain: dain: aso" nyid boem ziri ngoo shau" myang lang" gi nyangnu" dangain" bang: da shidkhoin" moo Petru ri nang gi Yuda byu nghoid lho: wigi Yuda byu yhang: ti" anghoid- tungbau byu yi yhang: ti" kangso dei nyid lho: tungbau byumyu" yi ri Yuda byumyu" yi yhang: ti" kangso dei wa shid re" khasu" koid yo" nyid nhang: wa lha" ein: wigi ngoo tid bye.
15 Ngoonu" gi khu: lo bidnyid mo nyang- Yuda byumyu" nghoid nyid yau: noo yooboo yo" da" tungbau byumyu" yi,, ga: myeing myheung shau" bang anghoid boem. 16 Nghoid sho loug we' byu xangsu: yi gi toung: to" da" tarha" ri cang pyeung da" moozoo" yo' Mangso shidkhoin" moo yo" deing byeung" lo" zi anghoid- Yesu Khristu ri loem" jeing" da" shoid khyo" za: dayo" deing byeung" lo" ziri ngoonu" se' boem- Ngoonu" we' toung: to" tarha' ri cang byeung" khyo" wigi anghoid loo: za: Khristu Yesu ri loem" jeing" da" yoomo Mangso shidkhoin" moo deing byeung" bang: bue" loo goo" baja" ga: Khristu Yesu ri loem" jeing" lo boem bye:- Khasu" wim gari hau: toung: to" da" tarha" ri cang pyeung" da" moozoo" yo' hang" we' Mangso da" shidkhoin" moo deing byeung" zi ayo" yu. 17 Hougsu" nghoid yoomo ngoonu" gi Khristu yo' dadeing: daloem: za: bue" loo bye: khyo" Mangso shid moo yo" deing byeung" loo baja"- ein: yoem: kaid jang" moo ngoonu" nyang: we' tungbau byumyu" yi yhang: ti" yooboo yoo" mo, nghoid khyoo: bang thu' lo rigi Khristu nyang: yooboo da" moozoo" ri voin vu, nyid su: nghoid ein: yo" tid wa la". Kha: khyo" we' age tid. 18 Khasu" wim gari ngoo xangshid" ri lhu: phyo' sain" pyam bye: da" toung: to" da" tarha" akhyoo" ri ngoo doem tu: zhoug nghoid rigi ngoo gi toung: to" da" tarha" ri shoid vhang": su: nghoid ziri toin" shid nyid. 19 Tarha" yo' sen: lho: wigi tid shang ga: rigi toung: to" da" tarha" wigi nyang: ngoo ri said pyam bye: yoomo ngoo gi shid: mang danghoid lo- hau: zigi ngoo Mangso shid mo dei nyid wa shid re" nghoid- ngoo gi Khristu yo' dage"- nya: da" pyang" zeing moo baid jen" said zi ngoo shau" bye:. 20 Houg: yoomo ngoo nya: gung nyang: dei nyid lo: zi anghoid- Khristu gi ngoo moo kangso dei nyid akhid" ngoo hid: dei nyid da" kangso gi ngoo ri jheddab yoomo nga" shid re" nya: kangso xoin" to' pyam da" Mangso nya: zoo: ri loem" jeing" da" khoug: moo dei nyid da"Kangso danghoid. 21 Ngoo gi Mangso jeju" ri he: ngeug pyam wa zi gyo: nyid su: anghoid- Khasu" wim gari byu yi gi toung: to" da" tarha" yo' Mangso shidkhoin" moo yo" deing byeung" lo" nghoid rigi Khristu gi amyed aji moo akoem: za: te: shid: kham: pyam bye:.