GALATI
BANG: JHANG' FOIN: KAID DA" MOUGSOUG"
(Galatians)
Aseing Yesu da khyoo: ngeibu: lu dang: gi ri kho kyo" ziyo' Yuda byumyu" anghoid bang loem" jeing" lo boem da" uri deingmain" da" Khristain byu dayug bue" loo wa shid re" Moshe da" tung: to" tarha" ri cang zei: tam" gyoo: ca". Hougsu" anghoid lang" gi acang loo" ca" ga: da" khyoo: thu lo. Lagyoo: Polu gi hau: toung: to" da" tarha" ri cang yhe: anoo" loo- Khristu moo kangso' dei wa shid re" geingteing da" apoem: za: date: jo. Hau: zigi Aseing Yesu ri loem" jeing" da" khyoo: nghoid- khyoo: hau: khaid khyo" za: byu yi gi Mangso shid moo deing byeung" su: ga: soin: byid: ziyo' lhoem: kham: yu nyid ga: da" khyoo" ri tid pang kyo" nyid. Nghoid loug we' Asi mung" zoo: Roma moug du, da" akhoug: mo Galati mung" du khyoo: nyid mo, gi lagyoo: Polu ri thug theung bang: thu re" boem wigi byu dayug gi Mangso shid moo deing byeung" su: bui" wa shid re" Moshe da" tung: to" tarha" ri cang pyeing" ca" ga: wigi gyi" sho' cang tid yen" boem.
Houg: yhang: ti" shoid lo" da" loem" jeing" khyoo: moo khyoo: shu" vhang: zi shau" da" byu yi ri deingmain" da" loem" jeing" khyoo: yo' cang yhe: da" khyoo: moo doem shu" tau" loo wa shid re" he: da" Galati phung: byu yi jhang khyoo:- Polu da" lid" foin: da" mougsoug" ri Korinthu voo moo theung: nyid da" uri AD-56 ( nghoid) lang" 57 zain koo: moo Polu nyang: lhid" foin: kaid zi nghoid. Lagyoo: Polu gi nyang: ri Khristu da" lagyoo: dayug nghoid ein: myeing yu wa da" akhang" yoo" su: nghoid khyoo: ri goemloem byid: da" dang: yo' tid pang kyo" nyid. Byu xangsu: yi da" amyeung" akhang" khyo" anghoid loo: za: Mangso da" amyeung" akhang" yo' za: lagyoo: aya: moo khyen: too" shau" da" khyoo: yo' nyang: ri gooki" lid ab, byid: to" da" voin vu, wa da" yoovoin, gi Yuda byumyu" anghoid bang: jhang khyoo: sasana yhe: wa khyoo: nghoid ziri gyi" sho' tid pang kyo". Hau: thang: ri nyang: gi loem" jeing" ziyo' za: byu yi gi Mangso shid moo deing byeung" ein: wigi soin: byid: ziri shau" yu nyid da" khyoo: ri azeing koid wigi gyi: gyi: sheung: sheing: sho' kyo" nyid. Dang thang: said lo" da" adu moo Khristain sam" void, ein: zigi Khristu ri loem" jeing" da" khyoo: khyo" yo" yu da" jheddab nheigloem: mo yau, thu' lo khyoo: ri kyo' khyeung" kyo" byid.
1
1 Byu da" amyeung" yo' lagyoo: aya: moo nyhid: to" zi we' nghoid- byu yi da" byu nyid byu yab khyo" cang lho: wigi nyheung to" da" lagyoo: we' anghoid. Yesu Khristu jhang mo we' nyang: ri shid: loo" bye: bang: mo dei to'' loo nhang: da" Mangso amyeung" khyo" wigi lagyoo: nghoid nyid da" ngoo Polu gi
2 Hid: moo ngoo yo' dage" nghoid nyid da" mangnhung" yi dangain" yo' Galati mung" mo phung: byu yi jhang khyoo: mougsoug" lhid" lho: vhu" kaid boem.
3 Ngoonu" da" nya: phoo' Mangsoo yo' Yesu Khristu jhang mo jeju" yo' ngeibu: da" khyoo: gi nanu" moo dajo, jo, baja" o".
4 He: da" pyaid mo akhyeing" ashoeb khyoo: mo ngoonu" ri yo" khyoid yu baja"- ngoonu" da" Phoo Mangsoo myid vho: ziyo' dakhyoo" tam" gyo: zoore ngoonu" da" yau: noo yooboo shid mo Khristu gi nya: gungdu: ab, byid: pyam bye:.
5 Hau: Phoo Mangsoo moo apyaid atoo:- myonhoo: phung" yoeb dabo jo, baja"- Amen.
6 Khristu da" jeju" yo' nanu" ri khe: yu su: jhang mo wigi hid: yhi' gyeing" myab, khyo" nanu" gang: lo" wigi ngeibu: lu dang: gootu: ri lhoem: kham: yu nyid boem yoomo nanu" ri ngoo gye" mau" nyid.
7 Gyeing" nyang: ga: rigi Aseing Yesu da" khyoo: mo lid lho: ngeibu: lu dang: gootu: ajo. Nghoid loug we' ngoo hid: su" ein: tid zigi Khristu da" ngeibu: lu dang: ri thid ze" shoin wa yoem: kaid nyid da" byu dayham" nyid boem ziyo' nyangnu" gi nanu" ri myid loem vhu" gyam, myid gyam nyid sho' lhu: phyo' lhu: nhoung nyid boem yoomo tid nyid zi nghoid.
8 Nghoid loug we' nanu" ri ngoonu" kho" kyo" to" da" ngeibu: lu dang: joem yo' adu go" da" ngeibu: lu dang: gootu: ri byu dayug yug gi nanu" ri kho" kyo" nghoid rigi nyang: moovoo moug: yo' moin: yi" nyid bye:.
9 Nanu" lhoem: yu ci: bye: hau: ngeibu: lu dang: yo' adu go" da" gootu: ngeibu: lu dang: daloem: ri byu dayug yug gi nanu" ri kho" kyo" nghoid rigi nyang: gi nheing" khoin" zang" baja" ein: wigi xangshid" moo ngoonu" tid yu" bye: ziyo' dakhyoo" ti" akhid" ngoo da tid nyid shi.
10 Khasu" wim gari ngoo hid: su" tid nyid zigi byu yi wigi coung" byid: nghei byid: zi yo" yu wa shid re" koid nyid zi nghoid la". Houg: su" we' anghoid o". Ngoo vho: ngei nyid da" khyoo: gi Mangso myidveung" vho: ngei da" khyoo: yo" yu wa shid re nghoid. Ngoo gi byu shidkhoin" moo myeing fu" neing" sho' ein: yoem: kaid la". Ngoo houg: su" dakoid nyid nghoid rigi Khristu da" dei zoo ngoo nghoid wa zi anghoid..
11 Mangnhung" yi we" nanu" ri ngoo kho" kyo" da" ngeibu: lu dang: gi byu yi wigi jhau poin" kaid zi anghoid loo: za: ngoo nanu" ri tid kyoo" bye:.
12 Khasu" wim gari byu yi hang" jhang mo we' hau: ngeibu: lu dang: ri ngoo jhau" yu yu" zi anghoid. Aseing Yesu Khristu nyang: Yo' se myang khyo" ngoo ri toin" shid bye:.
13 Ngoo gi Yuda noku thung" moo danyid nyid shi" uri khasu" koid nyid lid loo bye: da" khyoo: nanu" nyang: shau" gyo: yu" boem bye:- ngoo gi Mangso da" phung ri neig khyeug myid aboo loo za: pyi: sho: shen" yhen lo ziyo' lhu: phyo' mhoin' pyam wa shid re" yoem: kaid lo yu" bye:.
14 Yuda noku thung" ri goolhoo' cang zei: lo khyoo: moo ngoo gi nga" da" byumyu" mo, yam: cang" yi myoo: sho' bang: tho' moo jain" lho: wigi nheigloem: zug, ci: ziyo' phoug" phyid" yi da" jhoug" myeing" joem ri cang pyeung lo yu" bye: zi nghoid.
15 Nghoid loug we' nga" myhi' da" ung: khoug: moo dabo jo, shi" mo nyang- Mangsoo gi nya: da" jeju" yo' ngoo ri khyen: yu wigi nyang: ri noku wa ngoo ri khe: yu bye:.
16 Hau: thang: ri tungbau byumyu" yi ri nya: zo: da" ngeibu: lu dang: kho" kyoo" wa shid re" nya: zo: ngoo ri toin" shid da" uri ngoo gi hang" da" phajhi" byid: khyoo: ri we' amho' yu yu".
17 Hau: tho' moo gootu: nga" shid moo lagyoo: nghoid nyid mo, yo' yhe: shau" goo" wa shid mo, ngoo Yerusalem khyoo: ado, loo" loo: za: Arabi mung" khyoo: dalheung: dam yhe: lo" lho: Damasku voo moo doem lo.
18 Hau: thang: ri soem" zain' lid loo" lang" Kepha yo' shoug" go" lho: nya: jhang mo lu dang: shau" yu wa Yerusalem khyoo: do, lo" wigi nyang: yo' dage" daxe: wim: nyid" koo: nyid kho.
19 Hau: Aseing da" nya: nhung" Yaku mo lid wigi gootu: lagyoo: yi ri ngoo amyang.
20 Akhid" ngoo lhid" kaid da" khyoo: gi deingmain" da" khyoo: nghoid- mhau' fain" da" dang: atid nyid ziri Mangsoo se' nyid.
21 Hau: thang: ri Suri mung" yo' Kiliki moug: gyoo: moo ngoo ju" yhe.
22 Hau: ayo, moo Yuda mung" moo nyid da" Khristain phung: byu yi mo, byu yi gi ngoo yo, myonhoo: doid' athoung" shau" asi go" boem shi.
23 Nghoid loug we' nyangnu" gi" xangshid" ri ngoonu" ri shen" yhen yen" yu" su: gi xangshid" ri nyang: phyo' shoin pyam soin da" loem" jeing" khyoo: ri akhid" kho" kyo" nyid ga: wigi byu gooji yi tid ziri dashug" gyo: yu.
24 Houg su" nghoid yoomo nyangnu" gi nga" khyoo: gang mo Mangsoo ri coung" nghei nyid boem ago".