8
Pooleig
1 Hau: thang: Aseing gi Moshe ri ?Khokham jhang yhe: wigi Aseing tid zigi ?Nyangnu" ngoo ri yo" noku baja" nga" byumyu" yiri nhang: kaid we'.
2 Nang ngeug pyam nghoid rigi ngoo re" mungdain: moo pooleig byeung" sho' nghoeb pyam nhang: khyoo" wigi yooboo dam byid: wa.
3 Nila gyid lang moo pooleig gye" byeung" re" wigi hau: zi thu lo wigi re" khokham kho"- re" yhoeb yab- re" yoeb yoo- re" gyizoug: yi yhoem: joem re" byu yi re" zooyho' phoid da" myikhyoem yo' zooyho' kang: da" oug" phain' khyoo: lang" do, lo boem goo" wa.
4 Nyangnu" gi re" gung moo we'. Re" byu yi gung moo we' re" gyizoug: yi gung moo we' byam do, loo wa? ga: yhe: tid we'? ga: tid da:.
5 Aseing gi Moshe ri ?Arun ri re" lhamdung: ri gyid lang- gyid khyoo"- gyid thoem" dangain" adang moo yeung too" we' houg: lang" pooleig joem thu lo wigi Egutu mung" ri nghoeb pyam baja" ein: tid we? ga: bye:.
6 Houg: lang" Arun gi lhamdung: ri gyid moo tu: yeing: too" lang" pooleig joem thu lo wigi mungdain: ri nghoeb pyam ago".
7 Fa" mo, we' nyangnu" phajhi" yo' nyangnu" we' mung" moo pooleig thu loo sho' koid bye:.
8 Khokham gi Moshe yo' Arun ri khe: wigi ?He: pooleig joem ri yu pyam wa shid re" Aseing ri akyu" mho' byid: ge'. houg: lang" re" byu yi yhe: wigi Aseing ri yo" noku wa shid re" ngoo nyangnu" ri nhang: kaid byid: wa? ga: tid da:.
9 Moshe gi ?Re" shid mo akyu" mho' byid: wa yoomo ngoo gau nyid. Re" shid mo re" gyizoug: yi shid mo re" byu yi shid mo ngoo akyu" mho' byid wa ayo, ri dang: phyed byid: we'. Hau: thang: Nila gyid lang mo lid pooleig joem ri yo" khaid pyam wa nghoid? ga: tid bye:.
10 Khokham gi ?Nga" shid re" nab kyoo' mho' byid: we'? ga: tid. Moshe gi ?Ngoonu" Aseing Mangsoo yhang: te" mangsoo gootu: anyid zi nang si' baja" nang tid ziyo' dakhyoo" ti" ngoo mho' wa nghoid.
11 Nang we' re" gyizoug: yi we' re" byu yi we' hau: pooleig ri thu loo" nhang: loo goo" wa. Nila gyid lang mo lid wigi kha: khyi' moo we' anyid loo: wa? ga: tid.
12 Hau: thang: khokham jang" mo Moshe yo' Arun thu lo" wigi Moshe gi khokham jhang nyang: nyhid: to" pooleig joem phang: loo" wa shid re" Aseing jang" moo akyu" mho' byid: bye:.
13 Aseing gi Moshe mho' ziyo' dayhang: ti" koid byid: wigi yhoem: joem yhoem: vang" joem khyam: joem mo pooleig joem shid: byug bye:.
14 Egutu byu yi hau: ziri ye: koid: boem to" wigi damung" goin" boeb, shoem: nam nyid da:.
15 Pooleig joem shid: jo, zi khokham myang lang" nyang: nheigloem: doem thain: lo wigi Aseing tid ziyo' dakhyoo" ti" Moshe yo' Arun dang: ri khokham atam" gyoo: nghoid da:.
Pyoeb
16 Aseing gi Moshe ri ?Arun ri nya: da" lhamdung: yo' myidgung moo baid we' houg: lang" Egutu mung" moo jo, da" pheilhoug: dangain" gi pyoeb bue" loo" wa zi nghoid? ga: tid.
17 Houg: lang" Arun gi nya: lhamdung: yo' myidgung moo baid kaid ri Egutu mung" mo pheilhoug: dangain" pyoeb bue" lo" wigi byu yi dang moo we' gougnyhoug adang moo we' nghoeb pyam bye:.
18 Fa" mo, we' nyangnu" phajhi" yo' pyoeb thu loo sho' koid yu" ri abui" nghoid ago". Pyoeb joyoo khang" moo" moo nyid da:.
19 Fa" mo, gi khokham ri ?He: zi Mangsoo koid zi danghoid? ga: tid ago". Nghoid loug we' khokham nheigloem: thain: wigi Aseing tid ziyo' dakhyoo" ti" Moshe yo' Arun dang: ri khokham atam" gyoo: nghoid da:.
Mhoo' Joem
20 Aseing gi Moshe ri ?Nab kyoo' nab soin: no' mo yhe: wigi gyid lang khyoo: yhe: lo" da" khokham yo' yhe: shoug" go" lho Aseing tid zigi ?Nga" byu yi ngoo ri yo" noku wa shid re" nyangnu" yhe: loo" wa nhang: byid: we'.
21 Nang ngeug pyam nghoid rigi ngoo re" jang" moo we' re" gyizoug: yi jang" moo we' re" byu yi jang" mo we' mhoo' joem nhang: kaid khyo" wigi nang ri yooboo dam byid: wa. Egutu byumyu" yi yhoem: dangain" jang" moo mhoo' joem byeung" loo wa zi nghoid. Myidgung moo we' hau: joem yo' nghoeb pyam wa zi nghoid.
22 Nghoid loug we' nga" byu yi nyid da" Goshen mung" moo mhoo' joem anyid nhang: loo: sho' ngoo loid byoin nhang: wa. Ngoo hougsu" koid zigi ngoo Aseing he: mung" moo moo" zei: nyid ein: ziri nang si' wa shid re" nghoid.
23 Nga" byu yi yo' re" byu yi agyoo: moo ngoo bang bang kho' too" wa zi nghoid. He: mau" pho" alhoo: again gi nab kyoo' bue" loo wa nghoid? ein: tid we'? ga: tid.
24 Aseing gi gye" myo: da" mhoo' joem ri khokham pho da" khokham kho" yo' nya: gyizoug: yi yhoem: khyoo: nhang: kaid bye:. Egutu mung" dangain" gi hau: mhoo' joem wigi bain phyo' shoin' lo" nyid bye:.
25 Hau: thang: khokham gi Moshe yo' Arun ri khe: yu wigi ?He: mung" moo yhe: lho nanu" Mangsoo ri xoin" yhe: ngei" byid: ge'? ga: tid.
26 Moshe gi ?Hougsu" koid zi ajoo wa Ciwim gari ngoonu" da" Aseing Mangsoo ri xoin" to' wa zi nghoid da" ngoonu" da" gougnyhoug joem ri xoin" ngei" byid: yoomo Egutu byumyu" yi ngoonu" ri gyi koid loo goo" wa. Ngoonu" gi hau: gougnyhoug joem ri ci: wigi hau: joem ri nyangnu" myang da" joyoo mo xoin" ngei" byid: nghoid rigi ngoonu" ri lugzeing wigi du" said pyam loo goo" wa.
27 Ngoonu" ri nyang: amyeing" byid: to" ziyo' dakhyo"- ngoonu" da" Aseing Mangsoo ri xoin" ngei" byid: wa shid re" ngoonu" gi dain" pyoid yoo khyoo: soem" nyid" so" yhe: ca" da:? ga: tid.
28 Khokham phoo gi ?Nanu" vi: khyoo: ayhe: nghoid rigi ngoo nanu" ri nanu" da" Aseing Mangsoo ri yhe: noku xoin" to' wa shid re" dain" pyoid yoo khyoo: yhi: wa akhang" byid: wa. Nga" shid re" we' akyu" bo mho' byid we'? ga: tid.
29 Moshe gi ?Ngoo thu lo" wigi nab kyoo' nyang: re" jang" mo we' re" gyizoug: yi jang" mo we' re" byu yi jang" mo we' hau: mhoo' joem bei: loo" sho' Aseing jang" moo ngoo akyu" mho' byid: wa. Nghoid loug we' byumyu" yi Aseing ri yhe: noku xoin" to' wa jang" mo toem' khyo" wigi ngoonu" ri nang daleing adoem ge: mhau'? ga: tid.
30 Moshe gi khokham pho jang" mo thu lo" lho: Aseing ri akyu" mho' da:.
31 Aseing gi Moshe mho' ziyo' dakhyoo" ti" koid byid: bye:. Khokham jang" mo we' nya: gyizoug: jang" mo we' nya: byumyu" yi jang" mo we' mhoo' joem dadu: we' anyid losho' bei: lo" byug da:.
32 Nghoid loug we' khokham koem' gi hau: ayo, ri we' nheigloem: thain: wigi byumyu" yiri yhe: wa akhang" abyid: nghoid da:.