7
Aseing gi ?Khokham shidkhoin" moo nang ri ngoo Mangsoo yhang: ti" koid nhang: wigi re" mang: Arun ri re" lapi: khyo" khokham phoo ri dang: tid loo wa. Ngoo nang ri byid: to" amyeing" dangain" ziri Arun ri tid kyoo" we'. Nyang: gi Israela byumyu" yiri nya: mung" mo thu lo" wa shid re" khokham jhang yhe: tid wa. 3-4 Nghoid loug we' ngoo gi khokham ri nheigloem: thain: nhang: wigi gyoug pho" moo" zoo" myoo: sho' ri Egutu mung" moo koid shug loug we' nyang: gi nanu" tid ziri tam" gyoo: wa zi anghoid. Hau: thang: Ngoo gi Egutu mung" ri gye" xo: da" yooboo dam byid: wigi nga" byumyu" yiri hau: mung" mo shu" thu loo wa. Ngoo gi nga" lo, ri tu: yeing wigi Egutu byumyu" yiri gyi koid lho: nyangnu" mung" mo Israela byumyu" yiri shu" thu lo uri ngoo Aseing nghoid ziri nyangnu" si' goo" wa. Moshe yo' Arun gi Aseing Amyeing" byid: to" ziri koid bye:. Nya: tang: khokham jhang dang: yhe: tid ayo, ri Moshe gi shid xi: zain nghoid wigi Arun gi shed xe: soem" zain nghoid bye: ago".
Aseing gi Moshe yo' Arun ri ?Khokham gi re" tang: ri re" tang: se' koid da" mau" pho" moo" zoo" koid shug ge' ga: tid nghoid ri Arun ri re" lhamdung: yu wigi khokham shidkhoin" moo du" kaid we' houg zigi lhangmyu bue" wa ein: tid we'? ga: tid. 10 Houg: lang" Moshe yo' Arun khokham jhang yhe: wigi Aseing amyeing" byid: to" ziyo' dakhyo" koid ago". Arun gi nya: lhamdung: ri khokham yo' nya: gyizoug: yi shid moo du" kaid lang" houg zigi lhangmyu bue" lo" byug bye:. 11 Houg: lang" khokham gi nya: phajhi" boo mo, yo' fa" mo, ri khe: wigi nyangnu" we' nyangnu" da" fa" phajhi" yo' du go" ziri koid bye:. 12 Nyangnu" lhamdung: ri du" kaid lang" hau: lhamdung: joem gi lhangmyu joem bue" lo" byug bye:. Nghoid loug we' Arun da" lhamdung: gi nyangnu" da" lhamdung: joem ri myhau: pyam bye:. 13 Nghoid loug we' khokham gi nheigloem: thain: wigi Aseing tid ziyo' dakhyoo" ti" za: Moshe yo' Arun da" dang: ri atam" gyoo: nghoid da:.
Suid"
14 Hau: thang:- Aseing wigi Moshe ri ?khokham gye" nheigloem: thain: ziyo' byumyu" yiri nhang: kaid wa he: pyam da:. 15 Houg: yoomo nab soin: khokham phoo Nila gyid lang khyoo: gyoo" yhe: uri yhe: shoug" we'. Lhangmyu bue" lo da" lhamdung: ri nang ci: wigi gyid lang yam moo nyang: ri yhe: lang" nyid we'. 16 Hau: thang:- khokham ri ?Hebre byumyu" yi da" Aseing Mangsoo gi nya: byumyu" yi dain" pyoid yoo mo nyang: ri yhe: yo" noku wa nhang: kaid byid: wa shid re" nang ri tid wa ngoo ri nhang: kaid da:. Nghoid loug we' akhid" ju" sho' nang atam" gyoo: byid: nghoid da:. 17 Akhid" Aseing: khokham we" Aseing gi nyang: hang" nghoid ga: ziri nang myang si' wa shid re" nyang: koid wa ziri yu" we'. Ngoo he: lhamdung: yo' gyid dang moo baid ri gyid gi suid" bue" lo" wa. 18 Wimdo, joem shid: wa. Gyid lang gi Egutu byumyu" yi ayo" shug loo sho' gyoem: shoem: nam wa? ga: tid we'? ga: tid da:.
19 Aseing gi Moshe ri ?Arun ri re" lhamdung: ri ci: wigi Egutu mung" mo gyid lang- gyid khyoo"- gyid thoem" dangain" adang moo zei: yeing too" we'. Gyid gi suid" bue" loo" wa nghoid. Gyid thug lug yam: akhau: moo we' mung" dain goin" moo we' suid" kyeing" kyeing" bue" jo, wa zi nghoid? ga: tid.
20 Hau: thang: Moshe yo' Arun gi Aseing amyeing" yo' dakhyoo" ti" koid bye:. Khokham yo' nya: gyizoug: yi shidkhoin" moo Arun gi nya: lhamdung: ri tu: wigi gyid dang moo baid lang" gyid dangain" gi suid" bue" lo byug ago". 21 Gyid lang mo wimdo, joem shid: wigi Egutu byumyu" yi ayo" shug sho' houg gyoem: shoem: gi gye" boeb nam nyid. Egutu mung" dangain" jang" moo suid" kyeing" kyeing" nghoid nyid. 22 Hau: thang:- khokham da" fa" mo, we' nyangnu" fa" phajhi" yo' hougsu" nyang: koid ago". Khokham we' shid phyang" yo' dakhyo" nheigloem: thain: nyid. Aseing tid ziyo' dakhyoo" ti" khokham phoo gi Moshe yo' Arun da" dang: ri ngeug pyam da:. 23 Hau: gungthid nyang: gi nya: khokham kho" khyoo: tau" loo" wigi houg ziri cishu: anhang: loo: nyid nyid da:. 24 Egutu byumyu" yi dangain" gi gyid lang mo gyid age shug yoomo gyid shoug" shug wa shid re" gyid yam cang wigi gyid thung" du: boem bye: ago".
25 Aseing wigi gyid moo baid zigi nyhed nyid" byeung" lid bye:.