33
Aseing gi Moshe ri ?Nang yo' nang Egutu mo shu" thu lo da" byumyu" yi he: joyoo mo thu lo" wigi Abraham- Isag- yo' Yaku bang: yo' nyangnu" da" amyed ashen yiri dangsoo" khoin" byid: to" da" mougmyid khyoo: yhe: loo" we'. Ngoo nanu" ri zung" wa shid re" moug lagyoo: ri nhang: kaid wigi ngoo Khanan- Amori- Hiti- Perizi- Hivi yo' Yebusi byumyu" yiri khaid pyam byid: wa. Nanu" gi agoin ayu: mougmyid nu" mung" khyoo: yhe: wa nghoid ago". Nghoid loug we' nanu" gi nheigloem: thain: da" byumyu" yi nghoid yoomo khyoo: cang nanu" ri said toem" pyam zi ashau" goo" baja" ngoo nanu" da" phung: gung moo boo wa zi anghoid? ga: tid.
Byumyu" yi hau: ziri shoug" gyoo: lang" nyangnu" nheig koug lo wigi sheing: zi ri avoid nghoid ago". Aseing gi Moshe khyo" wigi amyeing" byid: lho: nyangnu" ri ?Nanu" gi nheigloem: thain: da" byumyu" yi nghoid. Ngoo nanu" jhang daso' zoo: re" nghoid rigi nanu" ri jhoid said pyam zi thung" shoug" wa myang. Akhid" nanu" sheing: zi khyoid pyam ge'. Nanu" ri khasu" koid wa zi ngoo dang: phyed wa? ga: tid. Houg: yoomo Israela byumyu" yi Sina boem mo thu' lo" thang: ri nyangnu" sheing: zi ri avoid loo: goo" nghoid da:.
Israela byumyu" yi dab koid khang" moo" dab nghe: shoid dajhi' ve: jang" moo Moshe gi gyeung" shang: zoem" ri koid wa nghoid. Hau: ziri Aseing shidkhoin" zoem" ga: myheing wigi hang" nghoid loug we' Aseing yo' doem go" nau bang: gi hau: jhang khyoo: yhe: wa zi nghoid. Moshe gi houg: khyoo: thu yhe: loo" khang" moo" byumyu" yigi nyangnu" da" zoem" khoem" duang: moo yab wigi Moshe hau: akhoug: khyoo: vang loo" sho' zung" yu" nyid boem wa zi nghoid da:. Moshe akhoug: khyoo: vang lo" thang: ri jhoemmoug" thei" gi gyoo" re" wigi zoem" khoem" duang: moo re" theing: lho: Aseing gi jhoemmoug" thei" khyo" Moshe ri dang: tid wa. 10 Byumyu" yigi zoem" khoem" duang: mo jhoemmoug" thei" ri myang yo' dage" nyangnu" goeb pid noku wa zi nghoid. 11 Aseing gi Moshe yo' byu dayug byencang" yo' meing go" nyid yhang: ti" myo, noo: yo' myo, noo: yu" go" wigi dang: doem go" nyid wa zi nghoid. Hau: thang: Moshe gi dab khyoo: doem tau" lo. Nghoid loug we' nya: da" moo" pang" byencang" nghoid da" Nun da" nya: zoolu: zoo: Yoshu gi zoem" da" akhoug: moo nyid kho' shi" wa zi nghoid.
12 Moshe gi Aseing ri ?Hau: mung" khyoo: he: byumyu" yiri shu" yhe: we' ga: nang ngoo ri joo bye:. Nghoid loug we' nang ngoo ri hang" yo' yhe: we' ga: atid nghoid da:. Ngoo ri nang nyeing" se' ziyo' ngoo ri vho: ngei ga: zigi nang tid abye:. 13 Akhid" nang hougsu" nghoid nyid rigi ngoo re" moo" ri zei: wigi xo' lho: nang ri vho: ngei nyid baja". Re" myid soin' too" khyoo: joem ri ngoo ri tid kyoo" we'. He: byumyu" yiri nang re" byumyu" seing: khyo" wigi nang khyen: to" ziri we' boin: nyid we'? ga: tid.
14 Aseing gi ?Ngoo nang yo' dage'' yhi: wa zi nghoid wigi nang ri oungdoid khyoo: byid: wa ga: tid.
15 Moshe gi ?Nang ngoonu"' yo' dage'' acang nghoid rigi he: joyoo mo: ngoonu"' ri ayhi: nhang:. 16 Nang ngoonu" yo' dage" ayhe: nghoid rigi ngoo yo' re" byumyu" yiri nang vho: ngei nyid wa ga: zigi hang" yu" si' wa lha". Nang yo' ngoonu" dage" nghoid lang" she' mougmyid dang moo ngoonu" yo' gootu: byumyu" yi adu go" ziri yo" myang wa zi nghoid.
17 Aseing gi Moshe ri ?Nang ri ngoo gye" si' nyid ziyo' ngoo nang ri vho: ngei nyid yoomo nang tid ziyo' dakhyoo" ti" ngoo koid wa zi nghoid? ga: tid.
18 Hau: thang: Moshe gi ?Re" phung" yoeb bidbang ngoo ri myang nhang: we'? ga: mho' yoid nyid.
19 Aseing gi ?Nga" younglho' gyi: sheung: zi dangain" re" shidkhoin" moo ngoo lhid: byid: wa ziyo' nanu" akhoug: moo nga" deungbyeung" myeing ri ngoo fu" kyoo" wa zi nghoid. Ngoo gi Aseing nghoid. Ngoo khyen: yu bang: da" adang moo jheddab myid yo' nheig khyeug shoomyen: myid ri ngoo ci: shug wa zi nghoid. 20 Ngoo ri myang mo, hang" nghoid loug we' kangso' yo" dei nyid wa zi anghoid yoomo nang ri ngoo nga" myonhoo: ri yo" myang nhang: wa zi anghoid. 21 Nghoid loug we' nga" ayam hau: lugzeing tho' moo nang yo" yab jo, wa. 22 Nga" phung" yoeb bidbang lid lo uri ngoo nang ri lugzeing gyoo: moo kaid wigi ngoo doem lid loo" sho' nga" lo, yo' nghoeb shoung: too" wa. 23 Hau: thang: nga" lo, doem yu pyam uri nang nga" nungkhung: ri za: shau" myang wa zi nghoid. Nga" myonhoo: rigi yo" myang wa zi anghoid? ga: tid.