30
(Thu 37.25-28)
1 ?Nam pyo: ja: nghe' wa shid re" phoin: daloem: ri shug yo' koid we'.
2 He: ziri sheing: khyoo: pyi: khyoo: 18 lo, shi" shi" wigi dago" dayi" koid wigi myhang: khyoo: 36, lo, shi" koid wa zi nghoid. Ajhoin: myid: jhoin: mo seig khyoug: joem ri we' hau: ziyo' daloem: kyeing" bui" sho' koid we'.
3 Hau: da" adang moo we' myid: shoid goin" moo we' seigkhyoug: moo we' sheing: gyeing" wigi thoeb pyam we'. Lheing khoem moo sheing: yo' dung" we'.
4 Hau: shid re" sheing: lo, zei: theing" eig loem: koid wigi theing" moo keing: youg: jhu: lho: yo" dang wa shid re" eig shoid goin" ajhoin: vhoo: moo tab too" we'.
5 Keing youg: ri shug wigi koid lho: hau: ziri sheing: wigi thoeb too" we'.
6 He: phoin: yabkyo' pain" ruang: da" nghe: shoid- Dang: Theing Kuid: da" shidkhoin" moo too" we'. Hau: joyoo gi ngoo yo' nang shoug" goo" wa joyoo nghoid wa.
7 Nab khang" nab Arun gi myikug yu re" uri nyang: gi hau: jang" moo nam pyo: ja: ri nghe' wa zi nghoid.
8 Nyang: gi myen" thang: myikug tab re" uri we' houg yo' dakhyoo" ti" koid ca" wa. He: zigi ju" loo wa da" ayo, dangain" moo akyoo: abyid loo: sho' xoin" to' wa da" nam pyo: xoin" nghoid.
9 He: da" phoin: moo toem to" da" nam pyo: ja:- gougnyhoug xoin"- shivoo: xoin" joem ce: daja: ja: ri we' angei" byid: goo". Houg adang moo zabyid yhid: ngei" byid: khyo" age foid khyoo'.
10 Dazain daleing: Arun gi yooboo shid re" ngei" byid: da" gougnyhoug mo suid" ri yu lho: phoin: khoug: myid khoug: moo suid" gyoid byid: khyo" phoin: ri kyeing sain' wa shid re" pui" koid byid: ca" da:. He: ziri ju" loo wa da" ayo, dangain" moo dazain daleing: koid nyid ca" wa zi nghoid. He: phoin: gi ngoo Aseing ri shugbyid: to" da" bain sho' gyeung" shang: da" phoin: nghoid ca" da:.
11 Aseing gi Moshe ri
12 ?Israela byumyu" yi moo noophyoo" ashau" baja" nyangnu" ri zhayhen" koid: uri nyang: nyang: kangso' shid re" ngoo ri phau" kaid ca" da:.
13 Zhayhen" moo bo da" yugdu: ngab gi tarha" vang azhang yo' dayhang: ti" ngei sheing: ca" myoo' ri byid: ca" da:. Yugdu: ngab gi hau: ziri ngoo ri xoin" to' byid: khyo" wigi byid: ca" da:.
14 Zhayhen" moo bo da" byu hang" nghoid loug we' eig xi: zain yo' atho' mo bang: gi hau: gu: ri nga" jang" moo byid: ca" da:.
15 Nyangnu" kangso' dei wa shid re" hau: ziri byid: uri yoo" zoo: mo, we' gootu: je: myo: byid: wa zi anghoid- sho" jhen: mo, we' gootu: je neing: byid: wa zi anghoid.
16 Hau: ngei ri Israela byumyu" yi jang" mo koid: zheing" yu wigi hau: ngei ri nga" shidkhoin" zoem" so' koid jang" moo ci: yhung: wa zi nghoid. He: khang" doug gi nyangnu" kangso' shid re" aphoug" byid: zi nghoid lho: ngoo gi nyangnu" ri goem loem byid: wa ziri myid boin: nyid wa? ga: tid.
17 Aseing gi Moshe ri
18 ?Gyid: mid" jarung: ri gyid: mid" tang yo' dage" koid we'. Hougmoo: gyid kaid wigi zoem" yo' phoin: agyoo: moo too" we'.
19-20 Arun yo' nya: yuggi zoo: yi zoem" khoug: khyoo: avang yhi: shi" ri anghoid lang" zoo: noem xoin" ri xoin" to' byid: wa shid re" phoin: khyoo: avang yhi: shi" ri nyangnu" lo, yo' khyid: ri cid" wa shid re" hau: gyid ri ca" wa zi nghoid. Houg: lang" nyangnu" said pyam zi ashau" wa.
21 Nyangnu" ashid: wa shid re" gi nyangnu" lo, yo' khyid: ri cid" ca" da:. He: da" tarha" gi nyangnu" yo' nyangnu" amyed ashen yi apyaid atoo: cang yhi: ca" wa da" tarha" nghoid? ga: tid.
22 Aseing gi Moshe ri
23 ?Ge thang da" nam pyo: ja: mura yeung 3 joid: 13 rung jain"- nam pyo: da" khalamun 3 kyen" 6 rung jain"- nam pyo: da" gyoem: 3 kyen" 6 rung jain" yo'
24 Khasia 3 joid: 12 rung (Dangain" ziri tarha" vang azhang ri ci: lho: leug) zhainloin: xu: dagalain: ri kaid lung: wigi
25 Nam pyo: da" xu: yo' dakhyo" lheug wigi gyeung" shang: da" mainkaid xu: ri koid bye:.
26 Hau: mainkaid xu: nga" shidkhoin" zoem" moo we' Dang: Theing Kuid: moo we'
27 Zoobui" moo yo' jonu" dangain" jang" moo we' myikug yo' jonu" joem moo we' nam pyo: myi: nghe' xoin" to' jang: moo we'
28 Myi: nghe' phoin: yo' dage" jonu" joem dangain" moo we' cid" yung" cid" lho' jarung: yo' hau: da" tang moo we' joid da:.
29 Hau: zi joem ri hid su" khyo" shugbyid: wigi hau: joem gi bain sho' gyeung" shang: loo wa. Dayug yug anghoid lang" daja: ja: hau: joem ri zang" tain" lang" nya: da" gyeung" shang: yoem: so' wigi nyangnu" ri dam tab loo wa.
30 Hau: thang: Arun yo' nya: zoo: yiri we' khainjung khyo" wigi ngoo ri dei byid: wa shid re" xu: joid byid: wigi lo, ki" mainkaid byid: wa.
31 Israela byumyu" yiri we' ?He: gyeung" shang: da" mainkaid xu: gi ju" loo wa ayo, dangain" jang" moo nga" moo" zoo" khoug: moo ci: ca" da:.
32 He: ziri khainjung yi mo lid gootu: byu yiri age foid gyoin: wa. He: zi yhang: ti" nyang: hang" we' age lheig ci: wa. He: zigi gyeung" shang: nyid yoomo nanu" gyeung" shang: khyo" wigi ci: ca" da:.
33 Hang" nghoid nghoid hid: yo' du zi koid anghoid lang" khainjung anghoid su: he: ziri ci: su: gi nga" byumyu" mo phyed khyo' pyam wa? ga: tid.
34 Aseing gi Moshe ri ?Vhoo: mo natab gyid:- Onikha- Galaban gyid: nam pyo: da" lobain- he: gu: ri dago" yi" leug yu we'.
35 Hau: joem ri shoem: nam pyo: ja: ri yo' dakhyo" lheig lho: nam pyo: ja: koid we'. Hau: zi gyeing: lho: gyeung" shang: jo, wa shid re" xoo" we' bo lheig wa.
36 Hau: joem mo dayham" ri thung" mhoin lho: nga" shidkhoin" zoem" khoug: khyoo: yu vang yhe: wigi Dang: Theing Kuid: shidkhoin" moo lo" sain" we'. Bain sho' gyeung" shang: khyo" wigi he: nam pyo: ja: ri ci: we'.
37 Nanu" nyang: shid re" hau: nam pyo: ja: yo' du ziri age: koid wa. Ngoo ri shugbyid: to" da" gyeung" shang: ja: khyo" yo' dakhyo" koid we'.
38 Byu dayug yug nam pyoo: wa khyo" ci: wa shid re" hau: ziyo' du sho' koid nghoid rigi nyang: ri nga" byumyu" mo phyed khyo' pyam wa? ga: tid da:.