25
(Thu 35.4-9)
1 Aseing gi Moshe ri
2 ?Nga" shid re" alu ci: ri" baja" Israela byumyu" yiri tid we'. Byu dayug yug gi myid boo yoomo byid: da" alu joem ri khab, yu too" we'? ga: tid.
3 Hau: alu joem gi sheing:- ngei- gyid: mid"
4 Ge da" zin: yung" pain"- moug nyhoug void- khalham" void yo' ani void soug" goug"- coidbaid moug" yo' koid to" da" byimi joem
5 Yang ni loo: da" shooyid- shooyid gi shug gam akug
6 Myikug shid re" xu:- mainkaid wa shid re" xu:- nam pyo: ja xu:
7 Unug lug nyoug yo' khainjung moo" yi da" xoin" ngei" byizuang yo' yanggang nghoeb moo tab wa gootu: phoug" dab da" lug gi joem nghoid da:.
8 Ngoo nyangnu" akhoug: moo nyid wa shid re" byumyu" yigi nga" shid re" gyeung" shang: da" zoem" ri koid byid: ca" ago".
9 Hau: zoem" ri koid wigi ngoo nanu" ri tid khyo" yhang: ti" hau: akhoug: moo jonu" ca" gu: ri koid ca" da:.
(Thu 37:1-9)
10 ?Sheing: khyoo: 3 pe: 9 lo, shi"- pyi: khyoo: 2 pe: 3 lo, shi"- myhang: khyoo: 2 pe: 3 lo, shi" bo da" shug koid: daloem: koid we'.
11 Hau: da" atho' avoo: dangain" jang" mo sheing: gyeing" yo' nghoeb wigi azoin" cang we' sheing: yo' dung" pyam ca" da:.
12 Hau: shid re" theung" yhang: te" sheing: lo, zei: myid: loem: yo' hau: jang" mo tab wa shid re" sheing: koid: khyid: myid: loem ri koid wigi lo, zei theung" dashoid khyoo: eig loem: loem: tab we'.
13 Dang wa shid re" shug keung: youg: koid wigi hau: ziri sheing: yo' thoeb pyam we'.
14 Hau: keung: youg: ri koid: da" dashoid khyoo: dayoug: youg: jhu: zei too" we'.
15 Hau: keung: youg: ri theung" joem moo jhu: kaid too" wa zi nghoid wigi hau: ziri age yu pyam nghoid da:.
16 Hau: thang: ngoo nanu" ri byid: wa da" Dang: theing khoin" lhid" to" lug pyi" eig khyab ri koid: khoug: moo kaid too" ge'.
17 Sheing: khyoo: 3 pe: 9 lo, shi"- pyi: khyoo: 2 pe: 3 lo, shi" bo da" amyhid" ri we' sheing: gyeing" yo' koid we'.
18 Sheing: dung dab dei noem eig du: ri we' koid we'.
19 Amyhid" athang: dashoid moo da du: du: too" we'. Hau: eig du: ri amyhid" yo' daloem: za: nghoid sho' koid we'.
20 Amyhid" adang moo dung dab dei noem eig du: ri nyang: cang" nyang: myonhoo: shu: goo" nhang: wigi nya: tang: dung ri pyo: too" nhang: lho: amyhid" ri nghoeb too" we'.
21 Lug pyi" eig khyab ri koid: khoug: moo kaid wigi amyhid" ri hau: atho' moo nghoeb too" we'.
22 Houg moo ngoo nanu" yo' shau" wigi amyhid" dang mo dung dab dei noem eig du: agyoo: khyo: Israela byumyu" yi shid re" nga" tarha" dangain" ziri nanu" ri ngoo byid: wa zi nghoid.
(Thu 37.10-16)
23 Sheing: khyoo: 3 pe:- pyi: khyoo: 1pe: 6 lo, shi"- myhang: khyoo: 2 pe: 3 lo, shi" bo da" shug zoobui" ri koid we'.
24 Hau: ziri sheing: gyeing" wigi thoeb lho: azoin" moo we' sheing: wigi dung" we'.
25 Lo, soem: shi" myhang: da" akhoem' ri tab wigi hau: azoin" moo we' sheing: yo' dung" too" we'.
26 Dang wa shid re" khyid: myid: loem: jang" moo sheing: theing" lo, zei: tab we'.
27 Keung: youg: yo' dang wa shid re" sheing: theing" lo, zei: ri zoobui" da" akhoem' anam mo tab too" we'.
28 Shug keung: youg: koid wigi hau: ziri sheing: yo' thoeb pyam wa zi nghoid.
29 Zabyid yhid: shugbyid: wa shid re" bain joem khu joem yam: zoo: joem yo' jarung joem ri we' koid we'. He: zi dangain" ri we' sheing: gyeing" yo' koid we'.
30 Zoobui" rigi Dang: Theing Kuid: shidkhoin" moo to" wigi zoobui" da" adang moo khanham we' ngoo ri ngei" byid: da" gyeung" shang: zooyho' ri too" we'.
(Thu 37.17-24)
31 Sheing: gyeing" myikug tang daloem: koid we'. Hau: apoem: yo' alo, ri sheing wigi koid yu we'. Hau: ziri bain: boo" bain: fu' joem bo bo wigi tuang tab to" da" bain: joem gi ashoo" da zoo" za: nghoid ca" da:.
32 Hau: zi moo dashoid khyoo: soem" kung: kung: wigi khyug ko' ri doem tab wa zi nghoid.
33 Khyug kung: da" kung: khang" moo" moo Lashab bain: boo" yo' bain: fu' yhang: te" bain: boo" soem" boo" boo" shoung: yhoung tab too" ca" da:.
34 Myi kug tang ayoug: moo we' bain: boo" yo' bain: fu' bo dab da" Lashab boo" yhang: te" ziyo' shoung: yhoung to" da" bain: joem myid: boo" boo" koid wa zi nghoid.
35 Akung: soem" zoem" ri dazoem" yo' dazoem" agyoo: moo aboo" daboo" boo" kaid too" wa zi nghoid.
36 Aboo" joem akung: joem yo' myikug tang ri sheing: gyeing" daja: kyeing" yo' baid too" wa zi nghoid ca" da:.
37 Myikug tang shid re" myikug nyhed loem: ri koid wigi shidkhoin" moo bang wa shid re" hau: adang moo tug too" wa zi nghoid.
38 Hau: shid re" nyab, zi" yo' phain' ri we' sheing: gyeing" yo' koid wa zi nghoid.
39 Myikug tang yo' hau: da" zi joem dangain" ri koid wa shid re" sheing: gyeing" 20 joid: ci: wa zi nghoid.
40 Boem gung moo ngoo nanu" ri ci: shug bye: da" soin' nyheing khyoo: yo' dakhyoo" ti" cang lho: hau: zi joem ri zid" lho: koid ca" wa zi nghoid.