24
1 Aseing gi Moshe ri ?Nang yo' Arun- Nadab- Abihu- Israela byumyu" vhujhung: yi nyhed xi: gi boem khyoo: nga" jang" moo do, lo wigi nanu" vi: vi: moo nyid wigi goeb, pid lho: noku ge'.
2 Gooyug abo loo za: nang dayug kyeing" nga" jhang khyoo: tab loo we'. Byumyu" yi we' boem khyoo: yo" do, loo wa zi anghoid? ga: tid.
3 Moshe gyoo" lo" wigi Aseing amyeing" dang: joem yo' tarha" dangain" ziri byumyu" yiri tid kyoo" lang" byumyu" yi dangain" we' ?Aseing tid to" gu: dangain" ngoonu" cang abye:? ga: dage" doem phug tid boem bye:.
4 Moshe gi Aseing dang: dangain" ziri lhid" to" da:. Thang: nab soin: no' mo nyang: gi boem khyid: moo phoin: daloem: koid wigi Israela akung: daxe: eig kung: shid re" dakung: ri lug boem daloem: khyo" wigi lug boem daxi: eig loem: koid: zhug to" da:.
5 Hau: thang: nyang: gi zoolu: yiri nhang: kaid wigi nyangnu" gi Aseing ri nghe' ngei" xoin" to' ziyo' zoem" khau: xoin" khyo" wigi nuloo: bam: dayham" ri we' xoin" to' byid: da:.
6 Moshe gi gougnyhoug suid" ri dago" yi" yu wigi jarung: joem moo kaid lho: dago" yi" deung ziri gi phoin: da" goo" shoid moo foid khyo' pyam da:.
7 Hau: thang: nyang: gi Aseing da" amyeing" dang: joem lhid" kaid to" da" Dang: theing mougsoug" pug ri yu wigi byumyu" yi shid re" hau: ziri nyho: lho: nghab shug bye:. Nyangnu" we' ?Ngoonu" gi Aseing ri tid dang: tam" gyo: wigi nyang: amyeing" byid: to" zi ja: khang" moo" ri koid wa bye:? ga: tid.
8 Hau: thang: Moshe gi jarung: joem mo suid" ri yu wigi hau: ziri byumyu" yi adang moo peig zhain' kaid bye:. Nyang: gi ?Hau: da" suid" gi nyang: amyeing" dang: dangain" ri byid: uri Aseing gi nanu" yo' koid da" dang: theing ri dazid thung" tab da? ga: tid.
9 Moshe- Arun- Nadab- Abihu- yo' Israela byumyu" vhujhung: nyhed xi: yug gi boem khyoo: do, lo" ago".
10 Nyangnu" gi Israela byumyu" yi da" Mangsoo ri myang ago". Nya: khyid: vhoo: moo gi mougnyoug yhang: te" da" Nila lug nyoug myhu" to" da:.
11 Mangsoo gi Israela byumyu" vhu" shi: bang: ri dam atab nghoid da:. Nyangnu" we' Mangsoo ri myang wigi nyangnu" dage" zo: shug boem ago".
12 Aseing gi Moshe ri ?Boem khyoo: nga" jang" moo do, lo wigi nang hid: mo: lo nyid gu: moo byumyu" yiri jhau" byid: wa shid re" ngoo lhid" to" da" tarha" dangain" bo da" lug pyi" eig loem: ri nang ri ngoo byid: wa? ga: tid.
13 Moshe yo' nyang: ri pang" thoug su: Yoshu gi soin nyheing wigi Moshe gi gyeung" shang: boem khyoo: do, lo" da:.
14 Moshe gi vhujhung: yiri ngoonu" agyoo" ri" cang gi ngoonu" ri hid moo lang" nyid ge'. Arun yo' Hura ri nanu" yo' dage" hid: moo: nyid: too" khoo' wa zi nghoid yoomo hang" nghoid nghoid tid goo" ca" moo" bo nghoid rigi nya: tang: jhang khyoo: yhi: ge'? ga: tid.
15 Moshe Sina boem khyoo: do, lo" thang: ri hau: boem ri jhoemmoug" yo' nghoeb pyam da:.
16-17 Boem gung khyoo: Aseing da" phung" yoeb gi bidbang yo' gyoo" ri" bye:. Israela byumyu" yigi hau: bidbang ri boem gung moo myi: nghe" nyid yhang: ti" yu" thu nyid ago". Jhoemmoug" gi boem moo khyug nyid" ju" sho' nghoeb to" wigi nyhed nyid" nyid" rigi jhoemmoug" khyo" Aseing gi Moshe ri khe: kaid da:.
18 Moshe gi hau: jhoemmoug" khyoo: vang wigi boem khyoo: do, lo" da:. Nyang: gi houg: moo myid: xi: nyid" myid: xi: myen nyid nyid da:.