21
(Tid 15:12-18)
1 ?Israela byumyu" yiri vhoo: mo tarha" joem ri byid: da:.
2 Nanu" Hebre join qei nghoid rigi nyang: gi nanu" shid re" khyug zain join koid baja". Nyhed zain ein: da" zain ri nyang: gi ce: phoug" abyid: loo: za: nhang: kaid ca" da:.
3 Nyang: nanu" da" join bue" lo uri yhoem: seing: myhi' aboo nghoid rigi nyang: thu lo" uri we' nyang: yo' dage" yhoem: seing: myhi' age shu" thu loo" wa. Nghoid loug we' nyang: nanu" join bue" lo uri yhoem: seing: myhi' bo nghoid rigi nyang: thu lo" uri yhoem: seing: myhi' riwe' ge shu" thu loo" wa zi nghoid.
4 Houg join gi nya: yhoem: seing: yu byid: da" myiyi: yo' nyid wigi zoo: yo" nghoid rigi yhoem: seing: myhi' we' zoo: yi we' gi join seing: wigi seing: nyid zi nghoid yoomo nyang: gi nyang: dayug kyeing" shoug" thu loo" wa zi nghoid.
5 Nghoid loug we' join koid su: gi nya: yhoem: seing:- nya: myi: nya: zoo: joem ri jheddab wigi anoug gang: ga: bang bang tid nghoid rigi
6 Nya: yhoem: seing: gi nyang: ri noku joyoo khyoo: shu' yhe: wigi houg moo nyang: gi nyang: ri khoem" nungthang moo anghoid lang" khoem" bung moo yab jo, nhang: lho: nya: nukhyab ri cu' byid: wa zi nghoid. Houg: lang" nyang: gi nya: join dapyaid goin" bue" nyid wa zi nghoid.
7 Byu dayug gi nya: zoo: myiyi: zoo: ri join koid wa khyo" ung" zo: nghoid rigi nyang: gi join phoo yi yhang: ti" yo" thu wa zi anghoid.
8 Nyang: gi dayug yug da" nya: yhoem: seing: myhi' koid wa shid re" qei zi thung" shoug" nghoid loug we' nyang: ri adoem vhoo: loo: lang" nya: yhoem: seing: phoo gi hau: myiyi: ri shoid bye: yoomo tungbau yi jang" moo age ung" byid: wa zi nghoid. Nya: phoo ri nyang: doem qei nhang: ca" wa zi nghoid.
9 Byu dayug gi nya: zoo: shid re" join myhi' qei byid: nghoid rigi nyang: ri nya: myiyi: zoo: dayug yhang: ti" nyang: zoem" ca" wa zi nghoid.
10 Byu dayug yhoem: seing: myhi' gootu: doem yu nghoid rigi myi zeing yug ri lid lo da" ayo, ri byid: yhang: ti" zoo: shug- byimi akho: akhang" ayoem" loo: nyang: byid: ca" wa zi nghoid.
11 Nyang: gi nya: adang moo he: gu: ayo" pyeing byid: nghoid rigi nyang: gi nya: adang mo ce" aphoug" ayu loo za: nhang: kaid ca" wa zi nghoid.
12 Hang" nghoid loug we' byu dayug ri said nghoid rigi nyang: riwe' shid pyam ca" da:.
13 Nghoid loug we' nyang: gi byu ri pa: yhi: akoid loo za: zang" said nghoid rigi ngoo nanu" ri khyen: byid: to" joyoo khyoo: phang: lho: nyang: houg moo kangso' loid wa zi nghoid.
14 Nghoid loug we' byu dayug gi nheig yo: wigi byencang" ri pa: yhi: said pyam nghoid rigi kangso' loid wa shid re" nga" phoin: khyoo: tang" loo nghoid loug we' nyang: gi said pyam zi shoug" ca" da:.
15 Hang" nghoid loug we' nya: myi' nya: phoo ri said su: gi said pyam zi shoug" ca" da:.
16 Hang" nghoid loug we' byu ri khau" wigi ung" zoo: nghoid nghoid- join khyo" nyhid: too" nghoid nghoid- said pyam zi shoug" ca" da:.
17 Hang" nghoid loug we' nya: myhi' nya: phoo ri nheing" su: gi said pyam zi shoug" ca" da:.
18-19 Byu nyang: cang" nyang: byo, go" wigi lugzeing- lo, zhoeb yo' dam tab go" nghoid loug we' dam dab su: ashid: nghoid rigi dam tab su: ri yooboo dam age byid:. Dam dab su: yhoeb yoo moo no: nyid nghoid loug we' thang: ri to' wigi lhamdung: yo' yhoem: pain' khyoo: yo" thu so" yen" rigi nyang: ri dam tab su: wigi nya: bidnyid thang lo" gu: ri jhen: xab lho: nyang: ge sho' yu" coung: ca" da:.
20 Byu dayug gi seig khyung" koid: yu wigi nya: join myhi' anghoid lang" join phoo ri baid wigi houg: moo nyang: hau: join shid: nghoid rigi hau: join seing: ri yooboo dam byid: ca" da:.
21 Hau: join danyid" eig nyid" ju" sho' ashid: nghoid rigi yhoem: seing: gi yooboo dam shoug" kham zi anghoid. Nya: da" jonu" soem" lo" da" gu gi nya: yooboo dam shid re" gi" bye: da:.
22 Byu dayham" byo, go" wigi zoo: voin su: ri zang" lho: nya: zoo: gyo" pyam nghoid loug we' nyang: gootu: dam adab, nghoid rigi hau: myiyi: myhi' ri zang" thung" su: gi myiyi: myhi' da" yhoem: seing: phoo mho' ziyo' dakhyoo" ti" tarha" agyi yi dang: phyed byid: ziri kham yu ca" da:.
23 Nghoid loug we' hau: myiyi: myhi' dam dab, nghoid rigi kangso' shid re" kangso'
24 Myojid" shid re" myojid"- zei shid re" zei- lo, shid re" lo,- khyid: shid re" khyid:-
25 Myi: nge" zi shid re" myi: nge" zi dam joid shid re" dam joid- ung: khoug: dam shid re" ung: khoug: dam- khyo" wigi dam shoug" kham wa zi nghoid.
26 Byu dayug gi nya: join myhi' anghoid lang" join phoo ri baid wigi nya: da" myojid" ri thung" ced byid: nghoid rigi nyang: ri myo, jid, phau" xab khyo" wigi join mo nhang: kaid ca" da:.
27 Zei baid khyu' byid: nghoid rigi zei gyoug: phau" xab khyo" wigi join mo nhang: kaid ca" da:.
28 Dayug yug ri nuloo: wigi shid: sho' thung" nghoid rigi hau: nu: ri lugzeing yo' yo" du" said wa nghoid. Hau: da" shoo" we' ge zoo: wa zi anghoid. Nghoid loug we' nu: yhoem: seing: gi dam shau" zi anghoid.
29 Nghoid loug we' nuloo: gi lid lo da" ayo, ri byu ri thung" yu" zi nghoid wigi yhoem: seing: ri we' tid poin" nghoid loug atei" alhung wigi byu dayug yug ri thung" said pyam nghoid rigi nuloo: ri lugzeing yo' yo" du" said wa nghoid. Hau: nu: yhoem: seing: riwe' said pyam ca" da:.
30 Nghoid loug we' yhoem: seing: gi nya: kangso' ri khyoid yu wa akhang yo" nghoid rigi ca" gu: dangain" ziri bain sho' khyoug" ca" wa.
31 Nuloo: gi yuggi zoo: anghoid lang" myiyi: zoo: dayug yug ri thung" said pyam nghoid ri tarha" ri dakhyoo" za: ci: ca" da:.
32 Nuloo: gi join myhi' anghoid lang" join phoo ri thung" said nghoid rigi nu: yhoem: seing: gi join yhoem: seing: ri ngei: soem" xi: xab wigi nu: ri we' lugzeing yo' shid: sho' du" said pyam ca" da:.
33 Byu dayug gi duang: khuang" anghoeb ri yu pyam anghoid lang" duang: daloem: du: lho: duang: moo angoeb too" yoomo nuloo: nghoid nghoid loo zei: nghoid nghoid gyo" nghoid rigi
34 Nyang: gi gougnyhoug ri xab ca" zi nghoid. Nyang: gi yhoem: seing: ri ngei xab wigi gougnyhoug shid: mang rigi nyang: yo" yu wa zi nghoid.
35 Byu dayug da" nuloo: gi byencang" nuloo: ri yhe: thung" said nghoid rigi dei shi" da" du: ri ung" wigi ngei ri gam goo" wa zi nghoid. Shid: bye: da" du: rigi shoo" phyo' gam goo" ca" zi nghoid.
36 Nghoid loug we' nuloo: gi thung" da" akyang bo zi si' nghoid loug we' yhoem: seing: hau: nuloo: ri atei" lhung koid wigi nyang: gi byencang" phoo ri nuloo: dei xab wigi nyang: gi nu: shid: mang yu ca" zi nghoid.