20
(Tid 5:1-21)
1 Mangsoo dang: tid. He zigi nya: dang: thui: nghoid da:.
2 ?Nanu" join koid nyid da" Egutu mo shu" thu lo da" nanu" Aseing Mangsoo gi ngoo nghoid.
3 ?Ngoo mo lid gootu: yu phara ri ano' goo".
4 ?Mougkhung: moo myidjang dang moo myidjang voo: mo gyid khoug: moo nyid da" cite" gung du soolhoo: riwe' nanu" nya: shid re" akoid goo".
5 Ce: ja: soolhoo: riwe' agoeb pid- ano' goo". Ciwim gari ngoo nanu" Aseing Mangsoo nghoid wigi ngoo gi mishi' mo, ri ayo" zeing: kham. Ngoo ri ngeing" mo, ri ngoo yooboo dam byid: wigi nyangnu" byuxeig soem" myid: xeig ju" sho' zang" wa zi nghoid.
6 Nghoid loug we' ngoo ri jheddab- nga" tarha" ri cang mo, da" byuxeig khyeing" khyeing" moin moin ju" sho' nga" jheddab khyoo: ri ci: shug wa zi nghoid.
7 Nga" myeing ri akhyeing" da" khyoo: moo yeing lho: aci: goo". Ciwim gari nga" myeing ri anghoid da" khyo" ci: su: hang" ri we' ngoo nanu" da" Aseing Mangsoo yooboo dam byid: wa.
8 Doug no bidnyid" ri phoug" tab wigi hau: bidnyid ri gyeung" shang: sho' koid ge'.
9 Nanu" gi nanu" nya: moo" zei: wa khyug nyid" ayo, yo" ago".
10 Nghoid loug we' nyhed nyid" nyid" ngoo ri shugbyid: to" da" Dougno: Bidnyid nghoid. Hau: nyid" rigi nanu" nyang: we' nanu" nya: zoo: yi we' nanu" da" join yi we' nanu" da" gougnyhoug we' nanu" da" mung" moo nyid nyid da" tungbau yi we' dangain" gi dayug we' moo" yo" zei: wa zi anghoid.
11 Khyug nyid" ju" sho' akhoug: moo ngoo Aseing gi myid phain" so: moug phain" so: panglai: yo' hau: akhoug: moo bo da" dangain" ziri phain" so: to" da:. Nghoid loug we' nyhed nyid" nyid" rigi ngoo theing: nyid. Houg: yoomo ngoo Aseing gi Dougno: Bidnyid ri mainkaid wigi hau: nyid" ri gyeung" shang: nhang: bye:.
12 Ngoo nanu" ri byid: wa da" mungdain: moo kangso' sheing: nyid goo" baja" nanu" da" nya: phoo yo' nya: myhi' ri phau" myang: nyid ge'.
13 Byu asaid goo".
14 Myi: lhoid lang alhoid goo".
15 Akhoug" goo".
16 Hang" ri we' adeing amain" khyo" sagse: akham:.
17 Gootu: dayug da" yhoem: ri vo: da" myid aboo goo". Nya: myi:- nya: join myhi' jhoin phoo- nya: nu: kyung- nya: loo zei: yo' nyang: seing: da" gootu: jonu" dangain" ziri we' vho: ngei da" myid aboo goo".
(Tid 5.22-33)
18 Byumyu" yigi mouggoem: goem: ziyo' laboo" moid zi shau" gyo: wigi mouglhab' myeig ziyo' boem mo myikhoug" ri myang lang" nyangnu" gyoug wigi gye" ve: jang" moo yab jen yoin" to" ago".
19 Nyangnu" gi Moshe ri ?Nang ngoonu" ri dang: tid nghoid rigi re" dang: ri ngoonu" tam" gyoo: wa. Nghoid loug we' Mangsoo ngoonu" ri dang: ji lang" ngoonu" shid: wa zi ngoonu" gyoug da:? ga: tid ago".
20 Moshe gi ?Agyug goo"- Mangsoo gi nanu" ri re" jham" ca: yu" ziyo' nanu" yooboo ayoo" goo" baja" nyang: ri phau" myang: wa shid re" re" koid zi danghoid? ga: doem phug tid bye:.
21 Nghoid loug we' byumyu" yigi vi: moo xo' wigi yab jo, wigi Moshe gi Mangsoo nyid da" jhoemmoug" no, nam khyoo: do, loo" khare" da:.
22 Moshe wigi Israela byumyu" yiri tid kyoo" wa shid re" Aseing amyeing" byid: zigi ?Ngoo Aseing mougkhung: mo nanu" ri dang: ji zigi nanu" myang abye: go".
23 Nanu" gi ngoo ri za: noku ge'. Ngei yu phara" sheing: yu phara" joem ri akoid goo"- ano' goo".
24 Nga" shid re" myidzhoo" phoin: koid wigi hau: adang moo nanu" da" yang- nujung ri bain sho' nghe' ngei" byid: da" xoin" khyo" we' zoem" khoug: da" xoin" khyo" we' ngei" byid: ge'. Nanu" ngoo ri noku wa joyoo khang" moo" moo ngoo nyheing soin' to" da" joyoo khyoo: re" lho: nanu" ri mainkaid byid: wa.
25 Nanu" nga" shid re" lugboem phoin: koid nghoid rigi kho' yung" to" da" lug yo' akoid goo". Khasu" wim gari nanu" lugzhen: yo' lug baid wigi hau: ziri koid yoomo hau: ziri ngoo age ci: loo: koid pyam zi nghoid ago".
26 Nga" shid re" phoin: koid nghoid rigi hau: adang khyoo: do, wa shid re" zoem" lhang: age kaid. Nanu" hougsu" koid nghoid rigi nanu" houg moo do, ein: ziri nanu" nyang: nanu" toin" shed zi nghoid.