14
1 Hau: thang: Aseing gi Moshe ri
2 ?Israela byumyu" yi tau" lo wigi Bala Zephun anam mo Migdola yo' thoem" ni agyoo: moo jo, da" Pi Hahirod shidkhoin" moo theing: nyid ge'.
3 Israela byumyu" yigi kyoem: khoug: moo khyoo: so" lheing: yen" yoomo dain" pyoid yoo wigi lheing khoem to" da" akhoug: mo nghoid wa bye: ga: khokham phoo myid jhoo: wa zi nghoid.
4 Ngoo gi nyang: ri nheigloem: thain: nhang: wigi nanu" ri cang khaid loo wa. Ngoo gi khokham phoo ri oung: pyam wigi nya: gyizoo yigi ngoo ri ngi: shab loo wa. Houg: lho: ngoo gi Aseing nghoid ziri Egutu byu yi se' ri" goo" wa? ga: tid da:. Israela byumyu" yi we' nyangnu" ri tid to" ziyo' dakhyoo" ti" koid bye:.
5 Egutu khokham gi byumyu" yi phang: thu loo" bye: ga: zi shoug" gyoo: lang" nyang: yo' nya: gyizoug: yi nheigloem: thid wigi ?Ngoonu" cikoid bye: lug la". Ngoonu" Israela byumyu" yiri phang: loo" nhang: wigi nyha" join nghoid da" nyangnu" ri nyhang" ci: phyug pyam bye:? ga: tid nyid ago".
6 Khokham gi nya: gyimyang: rheing" yo' nya: gyidab ri jen" jen" koid nhang: da:.
7 Nyang: gi ge thang da" gyimyang: rheing" khyug shoo: we' nyangnu" ri vhoeb da" gyizoug: yi bo wigi nya: gyimyang: rheing" dangain" yo' dage" thu yhe: loo" bye:.
8 Aseing gi khokham ri nheigloem: thain: nhang: wigi ngei bu: ngei lhoo thu yhe: lo" da" Israela byumyu" yiri cang khaid da:.
9 Myang: joem Gyimyang: rheing" joem gyimyang: rheing" koin" mo, yo' Egutu gyidab gi nyangnu" ri cang khaid wigi nyangnu" ri Pi Hahirod yo' Bala Zephun anam thoem" ni ayam moo theung: nyid uri khaid myhi: bye:.
10 Israela byumyu" yigi khokham yo' nya: gyidab yi nyangnu" ri gyi koid wa ga: wigi jen re" nyid ziri myang lang" gye" gyoug ziyo' bo pang" wa shid re" Aseing jang" moo nyho: yoid ago".
11 Nyangnu" gi Moshe ri ?Egutu mo loeb yoo ajo, rhe". Nang ngoonu" ri he: dain" pyoid yoo mo shid: wa shid re" shu" re" la". Yu" we' nang ngoonu" ri Egutu mo shu" thu lo lho: cikoid bye: la".
12 Hidsu" bui" wa ziri nyhang" athu loo shi" uri nang ri ngoonu" atid rhe". Ngoonu" nyang: kyeing" yhe: wigi Egutu byumyu" yi join koid nyid shi" wa ein: nang ri ngoonu" tid bye:. He: dain" pyoid yoo mo shid: wa tho' mo gi houg moo join koid zishe' daje ge nyid? ga: tid boem ago".
13 Moshe gi ?Agyug goo" nanu" nya: joyoo moo yab jo ge'. Akhid" nyid" Aseing nanu" ri khasu" khyoid yu wa ein: ziri nanu" myang goo" wa zi nghoid. Nanu" Egutu byumyu" yiri khanham we' shau" myang loo zi anghoid.
14 Aseing gi nanu" shid re" gyi khaid byid: wigi nanu" dangain" gi ciwe' akoid ca" goo" wa? ga: tid bye:.
15 Aseing gi Moshe ri ?Ciwim yoomo nanu" bo pang" wa shid re" yoid nyid ago" la". Byumyu" yiri shid khyoo: to' yhe: loo" ge' ein: tid we'.
16 Re" lhamdung: ri tu: wigi thoem" adang moo zei: yeung too" we'. Gyid go, lo wigi Israela byumyu" yi panglai: moo gu: phyid lo" uri myid keing: doem: khyo" shoug" soo" wa zi nghoid.
17 Ngoo gi Egutu byumyu" yiri nheigloem: thain: nhang: wigi houg bang: thang: cang re" da" khokham nya: gyidab joem nya: gyimyang: rheing" joem yo' nya: myang: rheing" koin" mo, yo' dage" khokham phoo ri oung: pyam da" khyo" wigi ngoo gi ngi: shab zi shoug" yu loo wa.
18 Ngoo nyangnu" ri oung: pyam lang" ngoo Aseing nghoid ziri Egutu byumyu" yi se' boem wa zi nghoid? ga: tid.
19 Israela byumyu" yi da" gyiphung: shidkhoin" moo nyid da" Mangso moug lagyoo: gi nyangnu" thang: moo lo" tau" nyid. Jhoemmoug" pung we' Egutu byumyu" yi yo' Israela byumyu" yi da" agyoo: moo ju" sho' yu: lo" da:.
20 Hau: jhoemmoug" zeing gi Egutu byumyu" yiri moug: coid byid: wigi Israela byumyu" yiri myo myang nhang: bye: ziyo' damyen goin" gyiphung: daphung: yo' daphung: ayo" tab goo" nghoid da:.
21 Moshe nya: lo, ri hau: thoem" adang mo tu: yeing too" lang" Aseing gi bidthu shoid mo lid zeing yo' thoem" ri moid tau" nhang: bye:. Damyen goin" lid moid wigi thoem" gi myidgung cen: bue" loo" khari" bye:. Gyid we' eig gang go, loo" bye:.
22 Israela byumyu" yigi eig shoid goin" gyid pyiyam yam to" da" agyoo: myidgung cen: khyo" wigi thoem" ri lid phyed loo" bye:.
23 Egutu byumyu" yigi nyangnu" ri cang khaid lho: Israela byumyu" yi thang: moo nyangnu" myang: joem myang: rheing" joem myang: rheing" koin" mo, yo' dage" thoem" khyoo: cang re" nyid.
24 Nab soin: zoo" ri Aseing gi Egutu gyiphung: yiri jhoemmoug" zeing yo' myizeing mo yu" kaid wigi nyangnu" ri byoodain byooshoo" bui" nhang: bye:.
25 Nyangnu" so" yau: wa shid re" nyang: gi nyangnu" gyimyang: rheing" mo rheing" keing: ri yu pyam byid: bye:. Egutu byumyu" yigi ?Aseing gi Israela byumyu" yi shoid moo yab wigi nyhang" ri gyi koid nyid. Hid: mo tau" loogoo" shang? ga: tid nyid ago".
26 Aseing gi Moshe ri ?Re" lo, thoem" adang moo tu: too" we'. Houg: lang" gyid gi Egutu byumyu" yi tho' moo we' gyimyang: rheing" joem tho' moo we' myang: zhung: mo, tho' moo we' doem tau" nhau' loo wa zi nghoid? ga: tid.
27 Houg: lang" Moshe gi nya: lo, ri thoem" adang moo tu: yeing to" ziyo' danab dam za: gyid gi goo" u" ri yhang: ti" doem tau" yau jo, bye:. Egutu byumyu" yi gyid mo loid wa shid re" yoem kaid nghoid loug we' Aseing gi nyangnu" ri thoem" khyoo: she: pyam kaid bye:.
28 Gyid gi doem tau" wigi Israela byumyu" yi thang: moo cang khaid lho: thoem" khyoo: vang mo, dangain" dayug we' adeing loo sho' Egutu byumyu" gyizoo: yi dangain" mo, we' gyimyang: rheing" we' myang: jui: mo, adang moo we' lo nhau pyam bye: zi nghoid.
29 Nghoid loug we' Israela byumyu" yigi eig shoid goin" gyid pyiyam yam to" da" agyoo: myidgung cen: khyo" wigi thoem" ri yo" so" lid: loo" bye:.
30 Hau: nyid" ri Aseing gi Egutu byumyu" yi lo, mo Israela byumyu" yiri khyoid yu bye:. Israela byumyu" yigi thoem" yam mo Egutu byu yi da" shid: mang joem ri yo" myang bye:.
31 Israela byumyu" yigi Aseing da" gyi: thang yoem: so' yo' Egutu byumyu" yiri oung: pyam ziri myang lang" nyangnu" gi Aseing ri gyoug dain phau" myang: nyid. Aseing yo' nya: dei zoo: Moshe ri we' nyangnu" loem jeing" nyid boem bye:.