4
Bue" loo bye: da" khyoo: dangain" ri Modekhai si' lang" nyang: gi myid myo: seing" kho" ziyo' nya: byimi ri lang: ceig pyam da:. Hau: thang: nyang: gi jid: moo" byimi void- vhuloem moo myiyab geig gyoin: ci: lho: khokham kho" vang" khoem" duang: ju" sho' voomoo" khoug: moo ngau yang" yang" yen" da:. Jid: moo" byimi void bang: hang" ri we' vang khoug: khyoo: avang nhang: yoomo nyang: we' avang yhi: nghoid da:. Khokham pho da" amyeing" lu dang: kyo" kaid da" mung" du dangain" mo Yuda byumyu" yigi thui: zeing yo' koug kyi: ngau nyid ago". Nyangnu" zoo: shug jang"- koug ngau lho: ngau yang" yang" nyid boem ago". Nyangnu" mo myoo: phyang" gi jid: moo" byimi void lho: myi: yab cang" moo lu leung nyid ago".
Modekhai koid nyid ziri Estha da" dei zoo: myhi' yi yo' unug bang: wigi Estha ri tid kyo" boem lang" nyang: gye" myid myo: byug da:. Nyang: gi Modekhai ri jid: moo" byimi ri thid wa shid re" byimi joem ri foin: byid: nghoid loug we' Modekhai gi hau: byimi joem ri alhoem: khab yu nghoid da:. Hau: thang: nyang: gi khokham pho wigi nya: dei zoo: khyo" sain too" byid: da" unug dayug nghoid da" Hathad ri khe: yu lho: cibue" nyid ziyo' ciwim yoomo bue" ziri yhe: myid: yu" wa shid re" Modekhai jhang nhang: kaid da:. Hathad gi khokham kho" vang khyam: khoem" yang: mo voomoo" joyoo moo nyid nyid da" Modekhai jhang yhe: da:. Modekhai gi nyang: moo bue" lo da" ja: khang" moo" yo' Yuda byumyu" yi dangain" ri yo" said pyam lang" khokham da" ngei jhi: khyoo: ngei khanhoo' sho: kaid wa ga: Haman dangsoo" byid: to" zi nyang: ri tid kyo" da:. Nyang: gi Yuda byumyu" yiri said toem" pyam wa shid re" Susa moo fu" pyo: to" da" amyeing" lu dang: mougsoug" dakhyab ri Hathad lo, moo byid: kaid da:. Modekhai gi hau: ziri Estha jhang voin lo" lho: bue" nyid da" moo" ri sho' kyo" wigi nyang: nya: byumyu" dang moo khokham pho wigi nheig khyeug byid: wa shid re" yhe: vang mho' baja" ga: Hathad ri tid nhang: kaid da:. Hathad we' hougsu" koid bye:. 10 Houg: lho: Estha gi Modekhai jhang doem voin tau" loo" wa he: lu dang: nyang: ri pyeung: kaid da:. 11 ?Yuggi dayug yug anghoid lang" myiyi: dayug yug gi khokham pho wigi akhi: loo: nya: shidkhoin" khyoo: vang yhe: nghoid rigi shid: ca" da:. He: zigi tarha" nghoid. Khokham pho da" phajhi" byid: mo, mo wigi mung" du joem moo nyid da" byu yugkhang" moo" hau: ziri se' ago". Nghoid loug we' khokham pho wigi dayug yug ri nya: sheing: lhamdung: tu: yhoin" byid: nghoid rigi hau: yug da" kangso' yo" loid da:. Khokham pho wigi ngoo ri akhe: zi we' lhammoo" dakhyab myang" byug bye:? ga: kyo" kaid.
12 Estha mo lu dang: ri Modekhai shoug" yu lang" 13 Nyang: gi Estha ri he: tid poin" dang: ri pyeung: kaid da:. ?Nang khokham kho" moo shoug" nyid yoomo Yuda byu gooji tho' nang je goem loem wa ein: pashau" jho: nyid. 14 Hid: yhang: ti" ayo, moo sam: za: tam" to" nghoid ri Yuda byumyu" yiri pang" yu zi mougkhung: mo ju" re" lho: nyangnu" gi goem loem zi shoug" yu boem wa. Nghoid loug we' nang gi shid: wa nghoid lho: re" pho da" yhoemkhung: byu yigi thang lo" byug wa. Nghoid loug we' hid yhang: ti" ayo, shid re" nang khokham myhi' bue" lo zi nghoid abe hang" si' wa? ga: tid da:. 15 Estha gi Modekhai jhang he: dang: doem pyeung: kaid da:. 16 ?Susa mo Yuda byu dangain" ri yhe: khe: zheing" too" we'. Zooshug jang" lho: nga" shid re" akyu" mho' byid: we'. Soem" nyid" soem" myen goin' ci: we' azoo: ashug goo". Nga" dei zoo: myiyi: nu" yi yo' ngoo we' hougsu" koid boem wa. Hau: thang: tarha" ri thougtheung zi bui" sho' nghoid loug we' khokham pho jhang ngoo yhi: wa. Hidsu" koid yoomo ngoo shid: ca" nghoid rigi ngoo shid: kham wa? ga: tid da:.
17 Hau: thang: Modekhai gi to' yhe: lo" wigi nyang: ri Estha koid nhang: zi ja khang" moo" ri koid bye:.