3 Dalheing: dam Uphrad gyid lang bidvang shoid mo mung" gyi Tateni yo' Shetha Bozenai nyangnu" byencang" yi Yerusalem khyoo: re" wigi nanu" ri he: Noku Yhoem: Moo" ri zhoug wigi bain so' koid sho' hang" amyeing" khyo" koid go"? ga: re" myid:. 4 Nyangnu" gi Noku Yhoem: Moo" koid jang" moo bo pang" nyhid da" byu dangain" da" myeing ri myid: yu ago". 5 Nghoid loug we' Mangsoo gi Yuda vhujhung: yiri zung" yu" nyid wigi nyangnu" Dari jhang khyoo: mougsoug" yo" lhid" kaid ziyo' doem phug lhid" kaid mougsoug" ayo" yu yu gi Persi moo" voin bang: gi nyangnu" ri ayhen: yu wa ga: myid phyed pyam ago". 6 He: zigi khokham jhang khyoo: nyangnu" foin: kaid da" pyeing: dang: nghoid. 7 ?Khokham Dari yug yoo tung" yo" vhoeb khang" nyid baja" o". 8 ?Nang aseing khokham gi ngoonu" Yuda mung" du khyoo: yhe: wigi myhang: thang Mangso da" Noku Yhoem: Moo" ri lug moo" zeing joem yo' koid nyid ziyo' vooyam vang khyam: ri we' seig ti: doem: koid nyid ziri yo" se' myang baja" gye" zeing: kham: yoem: kaid ziyo' moo" zoo" oung: doid lo wigi lo, zoo" shid khyoo: zo" zo" mo yui: lo" nyid abye:. 9 ?Hau: thang: ngoonu" gi byumyu" yi da" vhujhung: yiri nyangnu" ri Noku Yhoem: Moo" ri zhoug wigi bain nyeing sho' hang" koid nhang: ein: ziri ngoonu" ri tid kyoo" wa shid re" myid: yu" bye:. 10 Ngoonu" re" jhang khyoo: he: moo" zoo" da" vhujhung: hang" nghoid ein: ziri yo" tid kyoo" sho' nyangnu" myeing joem ri we' myid: yu bye: zi nghoid. 11 Nyangnu" doem phoug tid zigi ngoonu" gi mougkhung: yo' myidjang mo Mangso da" dei zoo: yi nghoid nyid ziyo' ngoonu" gi Israela khokham dayug da" yoem: so' khyo" wigi shid phyang" mo koid to" da" Noku Yhoem: Moo" ri doem koid zi danghoid. 12 Nghoid loug we' ngoonu" da" phoug" phyid" yigi mougkhung: mo Mangsoo ri nheig yoo: nhang: wigi nyang: nyangnu" ri Khalde mung" mo Babelon khokham Nebukhadneza lo, khoug: moo vang nhang: lho: Noku Yhoem: Moo" ri lhu: phyo' pyam nhang: wigi byumyu" yigi Babelon mung" khyoo: pyoung" she: loo" shoug" ca" bye: zi nghoid. 13 Hau: thang: Babelon khokham Kuru vhoebkhang" da" xang: shi" zain ri Kuru gi Noku Yhoem: Moo" doem koid wa shid re" amyeing" byid: bye: zi nghoid. 14 Nebukhadneza: gi Yerusalem Noku Yhoem: Moo" mo ngei sheing: yo' koid to" da" Noku Yhoem: Moo" mo jonu" joem ri yu wigi Babelon mo yu phara" yhoem: moo lo" to" to" ziri Kuru gi Shebaza ga: myheing da" Yuda mung" gyi lo, moo doem ab byid: wigi nyang: hau: ziri zoem: shoung: too" bye: zi nghoid. 15 Khokham gi nyang: ri hau: joem ri Yerusalem mo Noku Yhoem: Moo" khyoo: doem tau" ci: lo" wigi shid phyang" da" joyoo moo nyang: Noku Yhoem: Moo" doem koid wa shid re" ci: loo" we'? ga: tid bye:. 16 Hougsu" nghoid yoomo Shebaza lo wigi Noku Yhoem: Moo" da" ayang: zhoug lho: hau: bidnyid mo akhid" nyid" ju" sho' koid nyid nghoid loug we' abain shi" nghoid da? ga: tid. 17 ?Akhid" nang khokham jeju" mo Kuru gi Yerusalem mo Noku Yhoem: Moo" ri koid nhang: akoid nhang: ein: ziri Babelon mo lhid" xoem" pug moo yu" wigi he: moo" zoo" nang khasu" koid wa ein: ziri ngoonu" ri doem kyoo" we'? ga: lhid" to" ago".