5
Nanu" gi Mangso da" jheddab nya: zooyi nghoid boem bye: yoomo nyang: yo' du goo" sho' yoem: kaid loo" ca" nyid boem bye:. Khristu gi nanu" ri jheddab ziyo' nanu" da" shid re" nya: da" gung ri Mangsoo vho: ngei da" nam, pyo: xoin" to' pyam wigi ab, nung" byid: pyam yhang: ti" nanu" da kangso khyoo: ri jheddab da" nheigloem: yo' vhoeb khang" nyid ge.
Nanu" gi Mangso da" byumyu" yi nghoid boem bye: yoomo yau: shoo: go" da" moozoo"- ayung" alho' da" asam" aved joem yo' vhoo: boo myo, no, da" khyoo: ri nanu" da" nhoid yo' lang" atid' nyid goo". Aved avhu: da" khoin" co' dang- anyhoin: athoung" da" dang: co' joem kyang: da" dang: ri tid wa shid re" we' nanu" shid re" adu nghoid da- hau: gungkhoo: nanu" gi Mangsoo ri jeju" daboin: nyid ge. aco' ajhoid da" nheigloem: boo su- sho' ase' ziyo' phoug" shoid, yen" su- vhoo: boo: loug, gyi: su- hang" nghoid loug we' Khristu yo' Mangso da" mungdain mo agyid aso: gam, boem" ri khanham we' yo" kham: yu boem wa anghoid ziri nanu" se' too" ge- Khasu" wim gari vhoo: boo myo, no' loug gyi: da" khyoo: gi soolhoo: no' da" khyoo: daja: nghoid.
Hang" wigi we' adu: adam: wim da" dang: nanu" ri ayo" jhuphyo' pyam nhang: goo"- Khasu" wim gari hau" khyoo: joem yoomo Mangso nheig khoo" yo: da" khyoo: gi atam" gyoo: acang loo" mo, da" atho' moo gyoo" loo wa zi nghoid. Hougsu" nghoid yoomo houg: yhang: te" da" byu yi yo' dajhi' we' azoem" goo". Shid phyang" gi nanu" we' mougcoid khoug: moo nyid lid lo yu" boem bye:- Nghoid loug we' akhid" gi Aseing da" byumyu" yi bue" lo boem bye: yoomo bidbang khoug: moo ju" vang lo boem bye:- hougsu" nghoid yoomo nanu" gi bidbang da" nya: zooyi yhang: ti" zei: so' nyid yab, loo: ge. Khasu" wim gari hau: bidbang gi ge da" khyoo: aja: ja: deing byeung" ziyo' deingmain" khyoo: ri myoo" sho' bue" loo nhang: nyid. 10 Aseing vho: ngei nyid zigi ce: noem nghoid nyid ziri yoem: kaid lho: jhau" kham: yu nyid ge. 11 Byu yi koid nyid da" mougcoid yo' sen: da" akyu" abo ce" ja: moo zoo" moo we' dajhi' lang" abo zei: loo: za: houg: yhang: te" da" moozoo" ri bidbang moo pang shug nyid ge. 12 (Khasu" wim gari nyangnu" amyang afu' gau" koid da" moozoo" joem ri goolhoo' tid thu shang ein: rigi tid thu' wa zi lang" gye" sho' cang bo da" moozoo" nghoid nyid.) 13 Hau: khyoo: joem jo, moojo, ri bidbang moo to' ci: thu' kaid nghoid rigi nyangnu" asam" aved agung ri gyeung: gyeung: nyang: myang loo wa nghoid. 14 Khasu" wim gari bidbang gi dangain" ziri pang shug byid: nyid. Houg: yoomo jhoem: mungdang: moo tid to" ziri
?Yhoeb jo, su: we" too re- shid: jo, jangmo too re- houg: lang"
Khristu gi re" tho' moo thoin" pang byid: wa nghoid.?
ga: wigi tid to".
15 Hougsu" nghoid yoomo nanu" gi khasu" koid lho: kangso dei so" yen" boem zigi jid" jid" myid yu" nyid ge- phajhi" abo da" koo" fang: joem yhang: ti" akoid loo: za: phajhi" bo da" byu yi yhang: ti" daso" yen" ge. 16 Khasu" wim gari akhid" da" bidnyid ayo, joem gi akhyeing" ashoeb da" bidnyid nghoid nyid yoomo nanu" yo" da" ayo, gi ri goolhoo: za: akyu" boo sho' ci: yhoung: nyid ge. 17 Hougsu" nghoid yoomo akoo" afang: akoid nyid goo"- hau: Aseing nang ri zei: nhang: nau da" khyoo: ri yoem: kaid lho: phoid: sho: zei: so nyid ge. 18 Yhid: ashug yed, nyid goo"- hau: zigi nanyang: ri lhu: phyo' shoin pyam wa zi nghoid nyid. Hau: gungkhoo: Venyi: yo' joeb byeung" nyid ge. 19 Nanu" nyang: cang" nyang- coung" nghei da" jikhoin" dang- Venyi: loem" jeing" khyoo: yo' sen: da" gyeungshang: da" lid' jhoem" dang: yo' tid go" nyid lho: nanu" da" emyed khoug: moo Mangsoo ri jikhoin" khoin" wigi coung" nghei nyid boem ge. 20 Nanu" da" Aseing Yesu Khristu da" myeing ri lang: lho: khyoo: khaid gu: khang" moo" moo phoo Mangsoo gi khanham we' jeju" boin: coung" nghei nyid ge.
21 Nanu" gi Khristu ri gyoug phau" da" nheigloem: yoomo nyang: cang" nya: vhoo: moo tam" gyoo: go" nyid ge. 22 Yhoem: seing: myhi' yi we"- nanu" gi Mangso da" vhoeb khang" khyoo: ri tam" gyo: nyid boem ziyo' dakhyoo" ti" nanu" yhoem: seing: phoo' yi da" vhoeb khang" khyoo: moo tam" gyo: nyid ge. 23 Khristu gi hau: phung: da" atho' moo vhuloem bui" wa da" amyeung" akhang" yo" ziyo' dakhyoo" ti" hau" yhoem: seing: phoo' we' yhoem: seing: myhi' da" atho' moo vhuloem" bui" wa da" akhang" yo' Khristu gi nya: gungdu: nghoid nyid da" hau: phung: da" khyoid yu Aseing we' nghoid nyid. 24 Hau: phung: gi Khristu da" vhoeb da" khyoo: ri kham: yu nyid yhang: ti" yhoem: seing: myhi' we' yhoem: seing: phoo' yi vhoeb khang" da" khyoo: ri bain sho' kham: yu ca" nyid boem.
25 Yhoem: seing: pho we"- Khristu gi hau: phung: ri jheddab yoomo hau: shid re" kangso ab, noung" pyam byid: yhang: ti" nanu" da" yhoem: seing: myhi' yi ri hougsu" jheddab nyid ge. 26 Nyang: hougsu" koid da" khyoo: gi phung ri gyid yo' bain cid" kyeung pyam thang: moo nya: mungdang: yo' hau" phung: ri Mangso jhang khyoo: ab, nung" byid: khyoo: nghoid. 27 Hougsu" nyang: gi hau" phung: ri young" lho' gyeungshang: nhang: ziyo' ca" yo da" khyoo: ci" we' aboo- atug atuang' akoin: ajoeb, zi anghoid loo: za: joeb byeung" ce" yoo, aboo loo: sho' nya: shid re" cid" young" kyeung shang: yu da" khyoo: nghoid. 28 Hougsu" nghoid yoomo yhoem: seing: pho gi nyang: tu: nya: da" gungdu: ri jheddab nyid yhang: ti" nya: da" yhoem: seing: myhi' ri jheddab nyid wa zigi young" du da" khyoo: nghoid- nya: yhoem: seing: myhi' ri jheddab su: gi nya: gung ri nyang: jheddab nyid su: nghoid. 29 Hang" nghoid loug we' nyang: nya: da" gungdu: ri anoug, angei koid nyid su: gi hang" anyid- Khristu gi hau: phung ri coung: goin nyid yhang: ti" nyhang" gi nyhang" nya: da" gungdu: ri coung: goin nyid. 30 Hougsu" wigi nyhang" gi nya: da" gungdu: mo da" akung: ako' joem nghoid nyid boem. 31 Hau" jhoem: mungdang: moo tid to" ziyo' dakhyoo" ti" He: khyoo: yoomo yug gi zoo: gi nya: myhi' nya: phoo' ri to" pyam kho' lho: nya: yhoem: seing: myhi' yo' shoin" nyid lo" wigi nya: eig yug gi dagung dashoo" za: bue" loo wa zi nghoid. 32 He: khyoo: gi jhoem: mungdang: moo tid shed to" da" deingmain" khyoo: dakhaid nghoid wigi Khristu yo' phung: da" khyoo: ri yeung, lho: tid zi nghoid ein: ngoo se' gyoo: bye:. 33 Nghoid loug we' hau: zigi nanu" yo' we' sen: nyid yhoem: seing: pho yug khang" moo" gi nya: yheom: seing: myhi' ri nya: gung ri yhang: ti" jheddab nyid ca" wigi yhoem: seing: myhi' yi yug khang" moo" we' nya: yheom: seing: phoo' ri gyoug phau" nyid ca".