4
1 Hougsu" nghoid yoomo hau: Aseing da" moo" voin vu, da" gang mo thung: loung" jo, su: ngoo Polu gi Mangso wigi nanu" ri nyang: khe: yu da" bidnyid moo nyang: ke' too" byid: da" laleug laki azhang myhi: da" kangso dei khyoo: moo kangso dei so" loo" wa shid re" ngoo nanu" ri joug, jhoin" nyid.
2 Khanham we' khyo' nyhoem: lho: wigi nu" nham' ziyo' kham zeung: nyid ge- nanu" nyang: cang" zeung: kham go" lho: jheddab emyed ri toin" shid go" nyid ge.
3 Nanu" ri myeug, deung: to" ngei pyo: myenjham" khyoo: yo' hau: Venyi: wigi byid: lo da" nheigloem: shikain" shoin" zheung" shoin" deung: foem: khyoo: ri zoem: too" wa shid re" yoemso thang sho' kaid nyid ge.
4 Mangsoo nanu" ri khe: yu da" khyoo: gi nheig byu khyoo: dakhaid moo za: nghoid nyid ziyo' dakhyoo" ti" gungdu: daloem: za: yo' Venyi: we' daloem: za: nghoid nyid.
5 Aseing dayug za: loem" jeing" khyoo: dakhaid za: babtisma khyoo: dakhaid za: nghoid nyid.
6 Byumyu" bain sho' bang: da" nya: phoo' yo' Mangsoo we' dayug za: nghoid- nyang: gi dangain" da" Aseing nghoid wigi dangain" bang: da" atho' moo we' dangain" bang: da" akhoug: moo we' yo" bo nyid
7 Nyhang" dangain" bang: gi gooki" lid da" mainkaid jeju" jhungshug- Khristu da" laleug laki yo" dakhyoo" ti" yo" yu boem bye:.
8 Joem mungdang: moo tid ziyo' dakhyoo" ti"
Nyang: gi myhang: da" joyoo khyoo: do, lo" ri nyang: yo' dage"
thung: byu yi myoo" sho' ri shu" do, lo"- nyang: gi byu yi ri
jhungshug joem gam, byid:- ga: tid to".
9 akhid" nyang: do, lo" ein: da" khyoo: gi ce: noem ri tid lha". Aseing gi nyhoem: thang da" myidjang moo- xangshid" gyoo" loo" bye: ga: tid nau zi nghoid.
10 Hougsu" gyoo" loo" su: gi nya: da" phung: nghoid bye:.
11 Nyang: gi byu yi ri jeju" jhungshug joem ri gam, byid: su: nyang: nghoid bye:- nyang: gi dayham" bang: ri lagyoo- dayham" bang: rigi lapi- dayham" bang: rigi ngeibu: lu dang: gi kho" kyo" yen" mo, dayham" rigi phung: vhoeb yi yo' sara yi bui" wa shid mo zheung: nyheung too" bye:.
12 Nyang: hougsu" koid da" khyoo: gi Khristu da" gungdu: ri so' koid nyheung zhoug too" baja"- ga: Khristain moozoo" yo" zei: sho' Mangsoo gi nya: zooyi dangain" bang: ri soin' nyheung wa shid re" nghoid nyid.
13 Hougsu" nghoid yoomo ngoonu" da" loem" jeing" khyoo: khyo" we' hau: Mangso nya: zoo: ri se' loo bye: khyo" we' ngoonu" nyid, moo nyid bang: dangain" gi dagung dashoo" za: bue" lo wigi ngoonu" gi Khristu da" joeb, byeung"- myhang: thang da" gungdu: laki moo myhi: sho' nheig boo ung: gyeung: gyi: myhang: loo mo, bue" lo" boem bye:.
14 Hougsu" nghoid lang" ngoonu" gi subi" ri nyangnu" da" phajhi" khyau" ziyo' khyoo: shu" vhang: mo, da" jhau" mhau' khyoo: ein: da" beingmhoid' uglid zo" wigi moid tang" loo" shau nyid da" zoonu" yi yhang: ti" abue" nyid boem loo: wa.
15 Hau: gungkhoo: jheddab da" emyed yo' deingmain" da" dang: ri tid nyid khyo" vhuloem nghoid da" Khristu moo khyoo: khaid khang" moo" moo gyi: sheung: to' loo ca" nyid boem.
16 Hau" vhuloem da" vhoeb khang" lo" da" akhoug: moo nyang: cang" adu go" da" gungshoo" akung: ako' joem gi daloem: yo' daloem: tei" xo' go" ziyo' gungdu: goin" ziri yug: xeig yug: myo, mo wigi tei" xo' go" to"- hougsu" nghoid yoomo adu go" da" akung: ako' gi nyang: tu: nya: da" moo zoo" ri voin vu, nyid nghoid rigi jheddab da" nheigloem: yo' dagung goin" ziri zhoug to' gyi: sheung: loo" nhang: nyid.
17 Ce" phoug" adab da" nheig byu khyoo: yo" da" tungbau byu yi yhang" ti" kangso adei nyid wa shid re" Aseing da" myeing khyang" yo' ngoo nanu" ri zid" lhid nhang: nyid bye:.
18 Nyangnu" da" se' yeug, phajhi" juyi gi mougcoid nghoid nyid wigi bain sho' nyang: akoo" afang: nghoid nyid nheigloem: thain: nyid boem yoomo Mangsoo byid: da" kangso gam boem' moo nyangnu" gi aboo bang: nghoid nyid ago".
19 Nyangnu" moo gi gyoug sho' ga: da" nheigloem: dangain" ci: phyoug pyam boem bye: yoomo nyangnu" gi aco' ajhoid da" khyoo: moo cang zoore aved avhu: anyhoin: athoung" da" moo" aja: ja: yo' noug moo noug koid wa shid re" nyang: nya: da" gung ri ab byid: too" bye: mo, nghoid.
20 Khristu da" khyoo: ri nanu" gi hougsu" jhau" yu boem zi anghoid.
21 Nya: khyoo: ri nanu" gyeing" nyang: shau" gyo: yu" boem bye: wigi nya: thang: moo cang soo" mo, nghoid boem yoomo Yesu moo bo da" hau: deingmain" khyoo: ri nanu" shau" jhau" kham: yu boem bye:.
22 Hougsu" nghoid nyid yoomo nanu" gi shid phyang" nanu" nyang: cang lo yu" bye: da" kangso dei khyoo: mo byu xoug" ri we' mougmyid pyo: khyoo: ri vhoo: boo myo, no, yoomo mhoug zoo: fain" zoo: nau da" nheigloem: yoomo byo, loo" bye: da" byuxoug" ri she: pyam loo ge.
23 Nanu" da" ung: khoug: nheigloem: yo' myid soin: khyoo: dangain" gi aseig bue" loo nhang: ca" bye:.
24 Nanu" gi Mangso da" void, du gungdu: yo' phain" to" lho: deing byeung" ziyo' gyeungshang: da" kangso ein: da" kangso dei khyoo: aseig moo soo" ge.
25 Houg: yoomo mhau' da" dang: ri atid nyid goo"- yug khang" moo" gi nyang: nya: da" loem" jeing" phung: byu mangnhung" phoo' ri deingmain" da" dang: za: da tid nyid goo" baja"- Khasu" wim gari ngoonu" dangain" bang: gi Khristu da" gungdu: mo akung: ako' joem za: nghoid nyid boem.
26 Nanu" nheig yo: ri hau: yoo: nau da" nheigloem: yo' yooboo akoid nhang: goo"- bidvang, sho' we' nheig ayo: nyid goo".
27 Yu ri we' vang wa akhang" abyid: nyid goo".
28 Lhoung khau" yu" su: gi khau" da" moozoo" ri to" pyam lho: adoem khoug" loo goo"- ca" yo nyid bang: ri yo" pang" thoug sho' nyang: nya: da" lo, yo' deingmain" da" voemdoug: khu: da" moozoo" ri zei: shid" lo" boem loo: ge.
29 Subi" ri noo, nhang: da" dang: dakhoin" we' nanu" da" nhoid mo athu' nhang: goo"- tam" gyo: nyid bang: akyu" yoo" sho' byu yi ri yo" se' koid so' nyheung byid: ziyo' ca" yo nyid mo, ri yo" pang" thoug byid: da" dang: gi riza: da tid nyid ge.
30 Hau: tho' moo gootu- gyeungshang: da" Venyi: ri nheig akug nhang: goo"- Khasu" wim gari hau: gyeungshang: da" Venyi: gi nanu" ri Mangso seung: nyid khyoo- sagsi dazid' nghoid lho: Mangso wigi nanu" ri lhoid pyoin kaid shau" da" bidnyid ju" loo wa ziri kookham: kham: byid: su: nghoid nyid.
31 Houg: yoomo nheigloem: moo no khyoo: nheig khoo" yo: khyoo: nyho: yoid phau: nheung" ziyo' aphoug" akhyoid koid zi anoug, angei da" nheigloem: aja: ja: yo' houg: yo' du go" da" khyoo: joem dangain" ziri shoem" shoung: pyam ge.
32 Hougsu" koid wa da" gungkhoo: gi nanu" nyang: cang" nyang: nheigkhyeig go" khyoo: nheigloem: nu" nham' ziri toin" shid go" nyid wigi Mangsoo gi Khristu khyo" wigi nanu" da" yooboo ri khyoid pyam byid: bye: ziyo' dakhyoo" ti" nanu" we' nyang: cang" nya: da" yooboo ri khyoid pyam byid: go" nyid ge.