5
Aseing gi ?Shid: se' da" byu we"- tho' da" shamcoin" da cam" yu wigi re" nhoid moug" yo' re" xam: dangain" ziri phyed pyam we'. Houg: lho: hau: xam: ri jang mo leug wigi soem" boem khyo' we'. Vang: lheing zi bei: byug lang" houg: mo soem" boem mo da boem ri voomoo" khoug: moo nge' pyam we'. Nang voomoo" nghe: shoid moo so" lheing: yen" uri xam: soem" boem mo daboem ri yu lho: re" shamcoin" wigi jab, pyam we'. Deing da" soem" boem mo daboem ri lid khyoo: she: sain" pyam we'. Houg: lho: ngoo gi hau: ziri nga" shamcoin" wigi cang khaid zain: wa. Xam: dajhi ri yu wigi re" byimi thang: moo hau: ziri keig ci: we'. Hau: jang" mo dajhi' ri doem yu lho: myikhyoem moo she: pyam kaid we'. Hau: joem ri myi: nge" pyam nhang: we'. Hau: joem mo zi Israela damung" dain: goin" khyoo: myi: nge" dab ju" loo" baja"? ga: tid.
Yoem: moo" bo Aseing tid zigi ?Yerusalem ri yu" yu" we'. Ngoo gi hau: ziri mougmyid agung moo gootu: mungdain: joem dangain" wigi to" jang" moo to" too" bye:. Nghoid loug we' Yerusalem gi nga" amyeing" dang: joem ri thougtheung goemlu to' wigi nyang: gi goo" mungdain: joem tho' je akhyeing". Nya: lheing khoem mo mungdain: joem tho' je atam" gyoo: acang yhe: ziri ci: shug byid: da:. Yerusalem gi nga" amyeing" dang: ri ngeug he: pyam lho: nga" tarha" ri cang pyeing wa he: pyam da:. Yerusalem we"- akhid" ngoo yoem moo" bo Aseing tid nyid ziri tam" gyoo: we'. Nang gi nga" tarha" joem ri atam" gyoo: acang yhi:- nga" amyeing" dang: joem ri acang pyeing khyo" re" lheing khoem mo mungdain: joem tho' yau: khi" je bui" nhang: abye:. Nang gi gootu: mungdain: joem mo thung" ri: joem ri cang abye:. Houg: yoomo ngoo gi re" gyivoo nghoid ein: yoem moo" bo Aseing tid nyid bye:. Byumyu" yi dangain" yo" myang da" joyoo moo ngoo nang ri dang: phyed wa. Ngoo ngheing" da" nang koid moo" dangain" gang mo ngoo Yerusalem ri yooboo dam byid: wa. Hau: zigi shid phyang" khanham we' abue" yu"- thang: ri we' khanham we' abui" wa zi nghoid. 10 Hau: da" akyu" gi myhi' phoo yigi nya: zoo: yiri zo: wigi nya: zoo: yigi nya: myhi' phoo yiri zo: loo goo" wa. Ngoo gi nanu" ri yooboo dam byid: wa wigi ashid: loo: nyid deing bang: kha: yug ri we' shoid khang" moo" khyoo: khaid sain" pyam wa.
11 ?Houg: yoomo ngoo gi kangso' dei da" Mangsoo nghoid ziyo' dayhang: ti" he: zigi yoem moo" bo Aseing da" mungdang: nghoid. Nang gi nga" Noku Yhoem: Moo" ri akhyeing" moo" dangain" yo' nang koid bye: da" aco' ajhoid moo" wigi ayung" alho' bui" nhang: pyam yoomo ngoo gi nang ri nheig khyeug myid aboo loo: za: thougtheung pyam wa. 12 Re" byu soem" boem mo daboem gu: gi voomoo" khoug: moo noo phyoo" yo' zooyoid shau" wigi shid: byug goo" wa. Soem" boem mo daboem gu: gi voomoo" tunggung shoid mo shamcoin" joem wigi zain: ceing khyo' pyam zi shoug" wa. Houg: lho: lo" thang soem" boem mo daboem gu: rigi lid khyoo: khaid sain" pyam lho: nyangnu" ri shamcoin" wigi cang khaid wa.
13 ?Nang gi nga" nheig yo: ziyo' nheigloem: yoin da" yoem: dangain" ri ngoo nheugdeug da" ayo, ju" sho' shoug" kham zo: loo wa. He: zi dangain" bue" loo lang" nang jhug azug ziri ngoo nheig yoo: yoomo ngoo Aseing nang ri dang: ji bye: ziri nang gyeing" se' loo wa. 14 Re" aqei: ayam lheing khoem moo nyid boem da" mungdain: byu yi yugkhang" moo" gi re" nam khyo" lid: lo" uri nang ri yu" juang" wigi nyangnu" da" vi: moo: to" too" wa.
15 ?Nga" nheig yo: ziyo' nheig joem: yo: khyoo: wigi nang ri ngoo yooboo dam byid: uri re" aqei: ayam lheing khoem mo byumyu" yi gyoug dain loo goo" wa. Nyangnu" nang ri yu" nge pyam wigi nang ri yi juang" pyam wa. 16 Ngoo gi re" zookhoo: pang" thoug ziri phyed pyam byid: wigi nang ri zooyoid nhang: wa. Nang ri phyo' shoin' pyam wa shid re" nhang: kaid da" coin: da" myoo: joem yhang: ti" nang gi zooyoid thui: gyo: loo wa. 17 Ngoo gi zooyoid ziri nhang: kaid wa. Nanu" da" zooshang: yiri said pyam wa shid re" gougnyhoug lam" joem ri nhang: kaid wa. Houg: lho: noo phyoo"- athoug" akhyoug: byo, yoin" khyoo:- nanu" ri said pyam wa shid re" meing: zain: pui" ri nhang: kaid wa. Ngoo Aseing tid too" bye:.