45
1 Byumyu" kung: yiri mougmyid gamboem kho' byid: uri mougmyid gamboem daboem rigi Aseing ri shugbyid: ca" da:. Hau: zigi 10 main: sheing: wigi 8 main: lam da:. Hau: joyoo bain sho' gi gyeung" shang: da:.
2 Hau: joyoo moo shoid khang" moo" khyoo: 840 pi: bo da" Noku Yhoem: Moo" shid re" myidgung dajoyoo jo, ca" da:. Aqei ayam lheing khoem moo 84 pi: bo da" myidgung cen: jo, ca" da:.
3 He: joyoo mo agung dayi" 10 main: sheing: wigi 4 main: lam da" joyoo ri ke' phyed too" ca" da:. Hau: gu: gi dangain" tho' gyeung" shang: thang da" Noku Yhoem: Moo" joyoo bue" loo wa.
4 Hau: gu: gi hau: mungdain: mo gyeung" shang: thang da" joyoo nghoid wigi Noku Yhoem: Moo" khoug: moo Aseing ri dei byid: da" khainjung yi shid re" teing too" byid: ca" goo" wa. Houg: moo nyangnu" da" yhoem: joem yo' Noku Yhoem: Moo" shid re" yhoem: yoo myidgung nghoid loo goo" wa.
5 Hau: joyoo mo gootu: agung dayi" gi Noku Yhoem: Moo" moo moo" zei: da" Levi byu yi shid re" teing too" ca" da:. Hau: joyoo moo nyangnu" nyid da" voogung joem jo, wa zi nghoid.
6 Gyeung" shang: joyoo da" ayam moo jo, da" myidgung dadu nghoid da" 10 main: sheing: wigi 2 main: lam da" gu: gi Israela byumyu" yi mo hang" nghoid loug we' yo" nyid da" voomoo" khyo" teing too" ca" da:.
7 Vhoeb khang" nyid da" khokham nu" shid re" we' mougmyid teing too" byid: ca" da:. Gyeung" shang: da" joyoo bidvang shoid moug kyoo" mo zi bidvang shoid Meing: gung panglai: ju" sho' bidthu shoid mougkyoo" mo zi hau: mungdain: da" bidthu shoid mougkyoo" ju" sho' gyi: lam: wigi Israela byumyu" kung: yiri kho' gam byid: da" mougmyid yo' dayi" za: nghoid ca" goo" wa.
8 He: mougmyid gi Israela mougmyid ri vhoeb nyid da" khokham nu" yi shid re" gamboem nghoid wa. Houg: lang" nyang: gi shava byu yiri azeig zoo: loo: wa. Nghoid loug we' deing da" mougmyid ri Israela byumyu" kung: yiri seing: nhang: ca" wa.
9 Yoem: moo" bo Aseing tid. ?Israela ri vhoeb bang: nanu" we"- nanu" gi sung nyang: myang" sho' yooboo shoid abye: go". Nanu" da" athoug" akhyoug: moo" yo' zeug zo: moo" ri theing: pyam ge'. Jo ziyo' deingmain" ziri koid we'. Nanu" gi nga" byumyu" yiri nyangnu" da" mougmyid mo khanham we' adoem yo" khaid thu loo goo" wa. Ngoo yoem: moo" bo Aseing gi nanu" ri he: zi tid nyid bye:.
10 Yugkhang" moo" gi deingmain" da" jang shi" yo' laki' ri ci: ca" da:.
11 ?Kyug ziri leug da" Epha gi ayeing ri leug da" Batha yo' dayi" nghoid ca" da:. Ke' phyed wa zigi Home nghoid wa. Bue" loo wa laki' gi 1 homa- 10 epha- 10 bad
12 Nanu" da" jang shi" gi hid: su" nghoid wa.
13-15 Nanu" shugbyid: wa shid re" ayang: gi hid: su" nghoid wa.
Sungsoo: nanu" yham" yu jang" mo 1/60-
Yoono,- nanu" yhoem" yu jang" mo 1/60-
Zhainloin: xu:- nanu" khyam mo zhainloin: gam mo thu zi 1/100.
(10 bad
= 1
homa
= 1
kor. khyo" ki' ge)
Yang- Israela coung" yoo mo yang 200 du nghoid khang" moo" 1 du.
?Nanu" gi shivoo: xoin" joem du goin" nghe' ngei" da" gougnyhoug xoin"- zoem" khau: xoin" shid re" gougnyhoug joem ri shugbyid: ca" ago". Houg: lang" nanu" da" yooboo joem ri khyoid pyam byid: wa. Ngoo yoem: moo" bo Aseing amyeing" byid: too" bye:.
16 ?Hau: mung" mo byumyu" yi dangain" gi he: xoin" joem ri Israela mung" ri vhoeb nyid da" khokham nu" jhang ci: yhi: ca" ago".
17 Lhammoo" xain" pui" joem dougnoo: pui" joem yo' gootu: pui" joem moo Israela damyu" goin" shid re" du: goin" goin" nghe' ngei" ca" da" gougnyhoug joem shivoo: xoin" joem zabyid yhid: xoin" joem thu wa moo" gi nya: moo" nghoid da:. Nyang: gi yooboo khyoid xoin" joem shivoo: xoin" joem du goin" nghe' ngei" da" xoin" joem yo' zoem" khau: xoin" joem ri Israela byumyu" yi da" yooboo yu pyam byid: wa shid re" thu ca" da? ga: tid.
(Thu 12: 1-20 Xng 23:33-34)
18 Yoem: moo" bo Aseing tid. ?Xang: shi" lhammoo" khyab- xang: shi" nyid" moo nanu" gi ce: dam abo da" nuloo: dadu: ri ngei" byid: wigi Noku Yhoem: Moo" ri kyeing sain' pyam ca" ago".
19 Khainjung phoo gi he: yooboo khyoid xoin" mo suid" ri yu wigi Noku Yhoem: Moo" khoem" bung joem moo phoin: mo akhyoug: myid: loem: moo Akhoug: shoid shava jang: vang khoem" duang: khyoo: moo gyoid ca" wa.
20 Hau: lhammoo" khab' lhammoo" xain" nyhed nyid" nyid" moo nanu" gi pa: yhi: anghoid looza: yooboo shoid bang: anghoid lang" aboin: asoo" yoomo yooboo shoid bang: gungthid khyo" houg yo' dakhyoo" za: koid ca" goo" wa. Hid: su" khyo" wigi nanu" gi Noku Yhoem: Moo" ri gyeung" shang: jo, nhang: wa.
21 ?Xang: shi" lhammoo" khyab daxe: myid: nyid" nyid" moo nanu" gi lhid: kaid pui" ri koid shid" ca" da:. Yugkhang" moo" gi doocid" akaid da" zooyho' ri nyhed nyid" goin" zoo: ca" da:.
22 Hau: pui" mo xang: shi" bidnyid moo vhoebkhang" nyid da" khokham nu" gi nyang: nya: da" yooboo joem shid re" yo' byumyu" yi da" yooboo khyoid xoin" khyo" nuloo: dadu: shugbyid: ca" da:.
23 Pui" nyhed nyid" goin" moo nyid" khang" nyid" nyang: gi ce: dam abo da" nuloo: nyhed du: du: yo' yang loo: nyhed du: du: ri Aseing jhang xoin" khyo" du: goin" goin" nghe' ngei" ca" da:. Nyang: gi yooboo khyoid xoin" shid re" nyid" khang" nyid" coidbaid loo: dadu: du: xoin" ngei" byid: ca" da:.
24 Xoin" ngei byid: da" nuloo: du: khang" moo" yo' yang loo: du: khang" moo" shid re" shivoo: dajoid: jain" yo' zhainloin: xu: khyug kug boo ca" da:.
25 Lhammoo" nyhed khyab ein: khyab daxe: wim: nyid" moo shid" da" Zoem" pui" shid re" khokham nu" gi nyhed nyid" nyid" khang" moo" yooboo shid re" xoin" dakhyoo" ti" za: du: goin" goin" nghe' ngei" xoin" da khyoo" ti" za: shivoo: yo' zhainloin: xu: dakhyo" za: shugbyid: ca" ga: tid da:.