37
Ngoo gi Aseing shidkhoin" mo yoem: so' ri shoug" kham zo: lho: nya: da" Venyi: gi ngoo ri shu" lo" wigi myidjang moo shooyoug: byeung" jo, da" lang: khau: moo lo" nyhid: to" da:. Nyang: gi ngoo ri lang: khau: goem: sho' shu" so" yen" wigi hau: joyoo moo shooyoug: joem gi gye" kyug jo, ziri shau" myang. Nyang: ngoo ri tid zigi ?Shid: se' da" byu we" he: shooyoug: joem gi kangso' doem yo" dei loo goo" wa la"? ga: myid:.
Ngoo gi ?Yoem: moo" bo Aseing we" hau: zigi nang kyeing" dayo" phid: wa? ein: tid bye:.
Nyang: tid zigi ?Shooyoug: joem ri lapi: pe: we'. He: shooyoug: joem ri Aseing da" mungdang: tam" gyoo: wa shid re" tid we'. Nyangnu" ri tid kyoo" we'. Ngoo gi nanu" akhoug: khyoo: so' moid zei kaid lho: nanu" ri kangso' doem dei loo nhang: wa. Ngoo gi nanu" ri shoogyi: shoomyen joem kaid byid: lho: nanu" ri shooyid yo' thoeb byid: wa. Ngoo gi nanu" akhoug: khyoo: kangso' moid kaid byid: wigi doem dei to' loo nhang: wa. Houg: lang" nanu" gi ngoo Aseing nghoid ziri se' loo goo' wa ga: tid da:.
Hougsu" yoomo ngoo ri tid bye: ziyo' dayhang: ti" Lapi: pe: bye:. Ngoo dang: tid nyid uri khyug khyug khya khya ga: myeing thui: shau" gyo:. Houglho shooyoug: joem dage" xo' go" lo" boem ago". Ngoo zung" yu" nyid uri shooyoug: joem mo shoogyi: yo' shoomyen joem dab lo wigi hau: thang: shooyid thoeb lo" ago". Nghoid loug we' hau: gung du: joem moo so' aboo nghoid ago".
Mangsoo ngoo ri tid zigi ?Shid: se' da" byu we" lid ri Lapi: pe: we'. Hau: lid ri shoid khang" moo" khyo" lo lho: hau: manggung joem akhoug: khyoo: hau' vang lo" wigi nyangnu" ri kangso' doem dei nhang: wa ga: yoem: moo" bo Aseing amyeing" byid: bye ein: tid we'? ga: tid da:.
10 Hougsu" yoomo ngoo ri tid byid: ziyo' dayhang: ti" lapi: pe: bye:. Kangso' gi shid: manggung joem khyoo: vang lo" lho: hau: joem gi kangso' dei wigi to' yab lo ago". Nyangnu" gi gyidab dadab yhi' myo: ago".
11 Mangsoo ngoo ri tid zigi ?Shid: se' da" byu we"- Israela byu yigi he: shooyoug: joem yo' du ago". Nyangnu" gi kyug byug wigi myid byu jang ayo" ziyo' ju" lo wa ayo, ga: zi ajo, loo ga: tid ago". 12 Houg: yoomo nga" byumyu" Israela ri lapi: pe: wigi ngoo yoem: moo" bo Aseing gi nyangnu" da" loeb duang: joem ri phang kaid wa ga: ein: tid kyoo" we'. Ngoo gi nyangnu" ri doem shu" yu lho: nyangnu" ri Israela moug: khyoo: shu" tau" yu wa. 13 Ngoo gi nga" da" byumyu" Israela ri myhoeb to" da" loeb duang: joem ri phang kaid lho: nyangnu" ri shu" tau" yu da" uri nyangnu" gi ngoo Aseing nghoid ziri se' loo goo" wa. 14 Ngoo gi nga" Venyi: kangso' nyangnu" ri kaid byid: lho: nyangnu" ri Venyi: kangso' doem dei nhang: ziyo' nyangnu" nya: mougmyid moo doem nyid nhang: wa. Houg: lang" nyangnu" gi ngoo Aseing nghoid ziri se' loo goo" wa. Ngoo gi he: ziri koid wa ein: dang: so" to" ziyo' dayhang: ti" koid wa. Ngoo Aseing tid bye:.
15 Aseing ngoo ri dang: doem tid da:. 16 Nyang: tid zigi ?Shid: se' da" byu we" voosi" daloem koid: yu lho: hau: adang moo ?Yuda khokham mungdain: ein: lhid" tab too" we'. Hougthang: gootu: voosi" daloem: doem koid: yu lho: hau: adang moo ?Israela khokham mungdain: ein: lhid" tab too" we'. 17 Houg: lho: hau: voosi" eig loem: goin" athang: thang: moo zei: ci: we'. Houg: lang" nyangnu" gi voosi" dakhaid kyeing" ti" yu" thu da:. 18 Re" byumyu" yigi nang ri ?He: zi ce: dang: kang: nghoid ga: myid: boem lang" 19 Nyangnu" ri ngoo yoem: moo" bo Aseing gi Israela ri gungthid koid da" voosi" ri yu lho: Yuda ri gungthid koid da" voosi" yo' xo' too" wa. Ngoo gi hau: voosi" eig khaid ri dakhaid za: koid pyam lho: hau: ziri nga" lo, moo: zei: ci: wa.
20 ?Hau: voosi" eig khaid ri re" lo, moo zei: ci: lho: byumyu" yiri myang nhang: we'. 21 Hau: thang: ngoo yoem: moo" bo Aseing gi nga" da" byumyu" dangain" bang: ri nyangnu" nyid sain" lo" byug boem bye: da" byumyu" yi khoug: mo shu" tau" yu lho: nyangnu" ri khe: zheing" to" lho: nyangnu" da" mougmyid khyo: doem shu" tau" loo" wa. 22 Ngoo gi nyangnu" ri Israela boem joem atho' hau: mougmyid moo byumyu" damyu" za: shoin" pyam wa. Houg: lho: nyangnu" gi nyangnu" ri vhoeb wa khokham dayug za: yoo" goo" wa. Houg: lho: nyangnu" gi byumyu" eig ja: khyo" akho' loo: goo" wa. Khokham mungdain: eig loem: khyo" we' abyo, gang: loo goo" wa. 23 Nyangnu" gi nyangnu" da" gung ri aco' ajhoid yu soolhoo: joem khyo" ayung" alho' bui" nhang: loo: wa anghoid. Nyangnu" nya: gung ri yooboo wigi we' byo, yoin" nhang: loo wa anghoid. Ngoo gi nyangnu" ri nyangnu" yooboo shoid da" khyoo: dangain" mo yo' ngoo ri gyi koid jang" mo loid byoin nhang: wa. Ngoo gi nyangnu" ri kyeing sain' yu wa. Nyangnu" gi nga" da" byumyu" yi bue" lho: ngoo gi nyangnu" da" Mangsoo nghoid wa. 24 Nga" da" dei zoo: David yhang: ti" da" khokham dayug gi nyangnu" da" khokham nghoid loo wa. Nyangnu" dangain" bang: gi vhoebkhang" zoug: dayug akhoug: moo zeing: foem: nyid lho: nga" da" tarha" joem ri jhug zug tung" tam" gyo: cang yhe: loo goo" wa. 25 Nyangnu" gi nga" da" dei zoo: Yaku ri ngoo byid: to" da" mougmyid- nyangnu" da" phoug" phyid" yi nyid lid: lo da" mougmyid tho' moo nyid lo boem goo" wa. Nyangnu" gi houg: moo apyaid atoo: nyid lo boem goo' wa. Nyangnu" da" zooshang: yi yo' amyed ashen yi dangain" we' hougsu" koid loo goo" wa. Nga" dei zoo: David yhang: ti" da" khokham dayug gi nyangnu" da" atho' moo apyaid atoo: vhoeb nyid wa. 26 Ngoo gi apyaid atoo: moo nyangnu" goem loem wa khyoo: dang: theing daloem: ri nyangnu" yo' koid too" wa. Ngoo gi nyangnu" ri nyhid: to" lho: myo: lug je: loo nhang: wa. Houg: lho: nyangnu" da" mougmyid moo apyaid atoo: jo, jo, wa shid re" nga" da" Noku Yhoem: Moo" ri to" too" byid: wa. 27 Ngoo gi houg moo nyangnu" yo' dage" nyid wa. Ngoo gi nyangnu" da" Mangsoo nghoid wa wigi nyangnu" gi nga" byumyu" yi nghoid wa. 28  Ngoo gi nga" da" Noku Yhoem: Moo" ri houg: moo apyaid atoo: jo, jo, wa shid re" nyangnu" da" phung: gung moo to" too" byid: uri byumyu" yigi ngoo Aseing wigi Israela byumyu" ri nga" da" byumyu" bui" wa shid re" khyen: yu ziri se' loo goo" wa.