30
Aseing ngoo ri dang: doem tid da:. Nyang: tid zigi ?Shid: se' da" byu we". Ngoo yoem: moo" bo Aseing tid nyid ziri Lapi: pe: wigi tid fu" we'. Nang gi hau: dang: khoin" joem ri nyho: tid ca" da:.
Gyug dain ca" da" bidnyid ju" lo nyid bye:.
Aseing lo, moo" zei: wa da" bidnyid gi jhang lo nyid abye:.
Byumyu" yi shid re" jhoemmoug" pung yo' yau: khi" bidnyid nghoid da:.
Egutu moo meing: zain: loo goo" wa.
Houg: lho: Etiopi moo gye" yoem: shoin: nheig nge khyoo: bue" loo wa.
Egutu moo byu myoo" sho' bang: ri said pyam shoug" wa.
Hau: mungdain: gi lhoid yu pyam zi shau" wigi byo, yoin" jo, boem wa.
Hau: meing: zain: zigi Etiopi- Libya- Lidia- Arabia yo' Kuba mo lhung: to" da" gyizoo: joem ri said pyam boem wa. Houg moo nga" byumyu" yi akhoug: mo lang" bo da:.
Aseing tid zigi ?Mougzhung: shoid Migdola mo zi mougpyi: shoid Asvan ju" sho' mo Egutu ri goem loem byid: bang: dangain" gi meing: zain: jang: moo said pyam zi shoug" wa. Egutu mo nghoid boin: da" gyidab gi phyo' shoin' pyam zi shoug" wa. Ngoo yoem: moo" bo Aseing tid too" bye:.
Hau: mougmyid gi moug: gyab goin" moo jham" coug: youg thang da" joyoo bue" loo wa. Houg: mo voomoo" joem gi bain sho' phyo' shoin' pyam zi shoug" wa. Ngoo Egutu ri myi: nghe' kaid lho: nyang: ri goem loem: byid: bang: dangain" shid: loo" lang" ngoo Aseing nghoid ziri nyangnu" se' loo goo" wa.
Hau: bidnyid ju" lho: Egutu ri phyo' shoin' pyam da" uri ngoo gi Etiopi mo cishu: anhang: nyid boem da" byu yiri tid zhuang" kaid wa shid re" lagyoo: yiri sangphoo mo nhang: kaid wa. Houg: lang" nyangnu" gyoug dain goo" wa. Hau: bidnyid gi ju" lo nyid bye:.
10 Yoem: moo" bo Aseing tid zigi ?Ngoo gi Egutu da" ziyoo jonu" thang byug wa shid re" Babelon khokham Nebukhadneza ri ci: yhung: wa. 11 Nyang: yo' nya: akhyi" akhyoid da" gyidab gi re" wigi hau: moug: ri phyo' shang: pyam goo" wa. Nyangnu" gi shamcoin" joem wigi Egutu ri khaid zain: lho: hau: moug: gi byu shid: mang byeung" jo, wa. 12 Ngoo gi Nila gyid lang ri kain" kyug loo" nhang: wigi Egutu ri akhyeing" bang: da" yoem: so' lo, khoug: moo to" too" wa. Tungbau byu yigi hau: damung" goin" ziri phyo' shoin' pyam loo goo" wa. Ngoo Aseing tid too" bye:.
13 Yoem: moo" bo Aseing tid zigi ?Ngoo gi Memphi mo yu phara" soolhoo: joem yo' agyeing" anghoid da" Mangsoo joem ri phyo' shoin' pyam wa. Egutu moo vhoeb zoo: wa byu dayug we' anyid wa. Ngoo gi byu dangain" bang: ri kyug nhain' wa. 14 Ngoo gi Egutu mung" mougpyi: shoid ri jham" coug: youg koid pyam lho: mougzhung: shoid mo Zoan voomoo" ri myi: wigi nghe' pyam wa. Ngoo gi Thebe da" voomoo" zeing ri yooboo dam byid: wa. 15 Ngoo gi Egutu ri gyi: thang reung: thang da" gyidab voomoo" Pelusium ri nga" nheig yo: khyoo: ri loem zoo: nhang: wa. Ngoo gi Thebe da" jonu" ziyoo ri phyo' shoin' pyam wa. 16 Ngoo gi Egutu ri myi: nghe' kaid wigi Pelusium gi kougshu: loo wa. Thebe vang khyam: joem gi byo, gyo" lo" byug wa. Voomoo" gi gyid je: nhoeb pyam wa. 17 Heliopoli yo' Bubasti voomoo" joem mo zooyam yigi gyi khaid jang: moo shid: byug wa. Houg: lho: gooji gu: gi thung: byu khyo" myheig shu" lo" zi shoug" wa. 18 Egutu da" yoem: so' ri ngoo khyau" pyam lho: nyangnu" gye" nghoid boin: da" yoem: ri thang nhang: pyam da" uri Taphan voo moo moug: coid wigi gyo" nghoeb pyam nhang: wa. Egutu moo jhoemmoug" dathei" nghoeb to" wigi nya: voomoo" joem mo byu dangain" gi thung: byu khyo" shu" lo" byug zi shoug" wa.
19 Egutu ri ngoo hid su" yooboo dam byid: da" uri ngoo Aseing nghoid ziri nyangnu" se' lo boem goo" wa.
20 Ngoonu" ri pyoung" she: nyhid: to" zi daxe: dazain ein: zain- xang: shi" lhammoo" khyab- nyhed nyid" nyid" ri Aseing ngoo ri dang: tid da:. 21 Nyang: tid zigi ?Shid: se' da" byu we"- ngoo gi Egutu khokham da" lo, yoem: ri khyau" pyam byid: bye:. Hau: lo, gi ge lo, wigi shamcoin" doem yo" zei: sho' byi: cu' hang" athoeb byid: anghoid lang" lo, voin tei" hang" afoid byid: nghoid ago". 22 Akhid" he: zigi ngoo yoem: moo" bo Aseing tid nyid zi nghoid. Ngoo gi Egutu khokham da" gyivoo nghoid. Ngoo gi nya: lo, eig shoid goin" nghoid da" gi shi" da" lo, yo' bain gyoug: bye: da" lo, ri khyoug" pyam byid: wa. Houg: lho: nya: lo, mo shamcoin" byid gyo" lo" byug wa. 23 Ngoo gi Egutu byumyu" yiri mougmyid goem: sho' khaid sain" pyam wa. 24 Hau: thang: ngoo gi Babelon khokham da" lo, ri yoem: boo nhang: wigi nga" shamcoin" ri nya: lo, khyoo: ab byid: wa. Nghoid loug we' Egutu khokham da" lo, ri khyoug" pyam byid: wa. Houg: lho: nyang: gi nya: gyivoo yi shidkhoin" moo noo kyeing" kyeing" lho: shid: lo" byug wa. 25 Nghoid bye:- ngoo gi nyang: ri yoem: neing: nhang: lho: Babelon khokham ri yoem: boo nhang: wa. Ngoo gi nyang: ri nga" shamcoin" byid: lho: nyang: gi hau: ziri Egutu shoid khyoo: yeing kaid uri ngoo Aseing nghoid khyoo: ri yugkhang" moo" se' loo goo" wa. 26 Ngoo gi Egutu byumyu" yiri mougmyid goem: sho' khaid sain" pyam wa. Houg: lang" nyangnu" gi ngoo Aseing nghoid ziri se' loo goo" wa.