26
Ngoonu" pyoung" she: nyhid: too" shoug" zi daxi: dazain ein: zain - xang: shi" khyab lhoo' xain" danyid" nyid" ri Aseing gi ngoo ri dang: ji da:. Nyang: tid zigi ?Shid: se' da" byu we"- He: zigi Turu voomoo" mo byu yi gau yi nyid zi nghoid. Nyangnu" gi ?Yerusalem gi byo, sain" loo" bye:. Nya: da" ung" zoo: ung" shug da" phaga: yoem: so' bei: byug bye:. Nyang: gi ngoonu" yo' ayo" shi' goo" loo: wa.
Akhid" he: zigi ngoo yoem: moo" bo Aseing tid nyid zi nghoid. Turu voomoo" we" ngoo gi re" gyi: voo nghoid. Ngoo gi nang ri khaid zain: wa shid re" byumyu" myoo" sho' ri shu" loo byid: wa. Houg lho: nyangnu" gi panglai: being: lhung" yhang: ti" ju" lo boem goo" wa. Nyangnu" gi re" voomoo" vang khyam: joem ri phyo' shoin' pyam lho: re" pyuzung joem ri phyo' khyo' pyam wa. Hau: thang: ngoo gi pheilhoug: dangain" ziri shoem" jhoid pyam lho: lugzeing cen: cen: za: teing too" byid: khoo" wa. Hau: jang" moo wimdo, kuang bang: da" goin ri lhab' hei loo wa. Hau: zigi panglai: moo jo, jo, da:. Ngoo yoem: moo" bo Aseing tid bye:. Byumyu" yigi Turu ri phyo' sain" pyam loo: goo" wa. Houg: lho: nyangnu" da" shamcoin" joem wigi mungdain: khoug: mo nya: voomoo" joem moo nyid bang: ri said pyam boem wa. Hau: thang: Turu gi ngoo Aseing nghoid ziri se' loo wa.
Yoem: moo" bo Aseing tid zigi ?Ngoo gi khokham dangain" jang" mo gyi: thang su:- Babelon khokham Nebukhadneza ri shu" yu wigi Turu ri zain: nhang: wa. Nyang: gi mougzhung: shoid khyo" myang: joem gyi myang: rheing" joem yo' myang: dab bo bo wigi gyidab moo" dadab yo' re" loo wa. Mung: dain: khoug: mo voogung joem moo nyid nyid bang: gi gyi khaid jang: moo said pyam zi shoug" wa. Gyivoo yigi gadug du:- myid boem" boem" lho: nang ri geing: da" vang khyam: yo' kyam' jhid loo wa. Nyangnu" gi re" vang khyam: joem ri khyam: phyo' seig thung" zeing wigi she: thung" nyid lho: re" pyuzung joem ri nyangnu" da" joto' yau: joem wigi phyo' khyo' pyam loo goo" wa. 10 Nyangnu" da" myang: joem wigi nang: zhain' thu kaid da" pheilhoug: thei" joem gi nang ri nghoeb pyam wa. Byo, yoin" jo, da" voomoo" khoem" moo" khyo" nyangnu" koin" lid: lo" da" uri zi tho' rheing" yo' gyi myang: rheing" joem ri she: da" nyangnu" da" myang: joem thui: gi re" vang khyam: ri noin" nhang: loo wa. 11  Nyangnu" da" myang: ju: bang: gi re" khyoo: joem moo lid zoo" yhang: ti" lid: phyed lo" wigi re" byu yiri nyangnu" shamcoin" joem yo' said pyam ago". Re" reung: thang da" zeingboung: joem gi myidjang khyoo: du" khyo' pyam zi shoug" wa. 12  Re" gyivoo joem gi re" da" jonu" yo' kid" zi joem ri yu seing: zo: pyam lo boem wa. Nyangnu" gi re" vang khyam: joem ri lang: phyo' khyo' pyam lho: re" da" nyid ei" wa yhoem: joem ri phyo' sain" pyam wa. Nyangnu" gi lugzeing joem seig thung" joem yo' zhoothung" du joem ri shoem" yu lho: panglai: khyoo: de" khyo' pyam loo goo" wa. 13 Ngoo gi re" jikhoin" dangain" zi thang nhang: pyam lho: re" teing joem da" coung" thui: ri tam" loo" nhang: wa. 14 Ngoo gi wim: do, kuang bang: da" goin ri lhab' hei' wa shid re" lug thain: ri teing too" byid: wa. Hau: voomoo" ri khanham we' adoem zhug too" loo goo" wa. Ngoo yoem: moo" bo Aseing tid bye:.
15 Yoem: moo" bo Aseing gi Turu voomoo" shid re" he: ziri tid bye:. ?Nang ri gyi khaid oung: pyam da" uri panglai: thoem" yam cang nyid boem bang: gi said pyam shoug" bang: kyi: nyho: thui: wigi gyoug dain shau" boem goo" wa. 16 Panglai: moo shoo: zoo: shoo: shug da" byumyu" yi da" khokham yi dangain" bang: gi nyangnu" da" khokham zhungtang joem mo gyoo" lo boem goo" wa. Nyangnu" gi nyangnu" da" byisheing: joem yo' za: thau" yung" to" da" nyangnu" da" byimi joem ri khyoid pyam lho: myidgung moo nain" zhung: jo, boem wa. Nyangnu" gi re" vhu" pid: lo, kyo' ri myang lho: atho' tid dain mau" wigi nain" nyid zi ayo" theing: loo: nghoid da:. 17 Nyangnu" gi re" shid re" he: mang yang" jikhoin" khoin" byid: loo goo" wa.
Myeing gyi: da" voomoo" phyo' shoin pyam shoug" bye:.
Nya: da" gyid sangphoo joem gi panglai: moo shoem" pyam shau" abye:.
He: voomoo" mo byumyu" yigi panglai: ri vhoeb nyid wigi
Gyid yam moo nyid bang: dangain" gi gyoug dain goo" wa.
18 Akhid" hau: zi gyoeb gyoo" lo" da" bidnyid moo gugyoo: kang joem gi nain" nyid lho:
Houg: yhang: te" da" byo, yoin" khyoo: ri nyangnu" yu" dain mo, boem ago".
19 Yoem: moo" bo Aseing tid zigi ?Ngoo gi nang ri hang" anyid lo: da" byo, yoin" jo, da" voomoo" joem yhang: ti" jham" coug: youg koid pyam wa. Ngoo gi nang ri Nammugdara thoem" kang joem mo gyid wigi nhe' pyam wa. 20 Ngoo gi nang ri goonham' gooco' pyaid mo nyid lid: loo bang: yo' lo" bo nyid wa shid re" shid: moug: khyoo: nhang: khyo' kaid wa. Nang ri ngoo gi myidgung khoug: mo apyaid atoo: moo byo, yoin" jo, da" mougmyid moo shid: mo, yo' lo" zoem" khoug: nyid nhang: wa. Hau: da" akyu" gi nang gi khanham we' byu adoem nyid da" joyoo bue" lho: dei nyid bang: da" mougmyid moo re" joyoo ayo" yu loo: wa. 21 Ngoo gi nang ri gyoug dain ja: khooshid: bui" nhang: lho: hau: zigi re" da" thang: thang nghoid wa. Byumyu" yigi nang ri sho: loo goo" wa. Nghoid loug we' nang ri hang" ashau" myang goo" wa. Yoem: moo" bo Aseing tid too" bye:.