24
Ngoonu" pyoung" she: too" shoug" zi gau: zain ein: zain- lhammoo" daxi: khyab- daxi: nyid" ein: nyid" moo Aseing gi ngoo ri dang: tid da:. Nyang: tid zigi ?Shid: se' da" byu we"- Akhid" nyid" da" bidnyid ri lhid" xoem" too" we' ciwim gari he: bidnyid gi Yerusalem ri Babelon khokham wigi vang: shid" da" bidnyid nghoid da:. Nga" da" thougtheung byumyu" yiri ngoo yoem: moo" bo Aseing nyangnu" shid re" to" to" da" he: dang: tu' ri tid kyoo" we'.
Myikhyoem moo oug" xoug wigi gyid kaid pyeing we'.
Ge thang da" shoo" ri kaid we'.
Lo, sain: yo' bung sain: joem ri kaid we'.
Houg: moo khyen: to" da" shooyoug: jab joem ri we' kaid pyeing we'.
Reung: thang da" yang shoo" ri ci: we'.
Oug" gyid" moo thang" kaid we'.
Gyid ri zhu: nhang: we'. Shoo" youg: joem yo' shoo" joem boo baja".
He: zigi yoem: moo" bo Aseing tid nyid zi nghoid. ?Byu said bang: da" voomoo" gi joem: lo" abye:. Hau: zigi khanham we' acid" lho' pyam da" shoopoo" oug" yo' du da:. Shoo" dajab thang: dajab xue: yu wigi dajab we' adeing loo. Voomoo" khoug: moo byu said moo" bue" jo, bye:. Nghoid loug we' suid" joem gi pheilhoug: boem" wigi yo" nghoeb pyam wa te" da" myidgung moo agyoo" nghoid da:. Hau: zigi lug thain: dang moo gyo" shoin: jo, da:. Ngoo gi suid" ri ayo" nghoeb shoung: da" joyoo- nheig yoo: nheig teig latoo: phug wa da" hau: joyoo moo too" khoo' bye:.
He: zigi yoem: moo" bo Aseing tid nyid zi nghoid. ?Byu said bang: da" voomoo" gi joem: lo" abye:. Ngoonyang: thang" zang zang too" wa. 10 Seig thang" loung: kaid shi" we'. Lid shab wigi myi: hau' tab we'. Shoo" jhoug we'. Shoo" yeing ri zhu: kain" nhang: we'. Shoo youg: joem ri poo" nghe' pyam we'. 11-12 Akhid"- gyid: mid" oug" koem: ri myi: gyu: tho' moo hougsu" nyang: xug nge' pyam we'. Oug" kyab joem dangain" gi myi: moo abyug loo" nghoid loug we' hau: oug" kyab joem nghe' khyug pyam thang: ri hau: oug" gi laloem lakhoug: thung" khyo" doem young" gyeing" loo wa. 13 Yerusalem we"- re" akhyeing" ashoeb lo, moo" gi nang ri ayung" alho' bui" nhang: bye:. Ngoo gi nang gyeung" shang: sho' yoem: kaid nghoid loug we' nang gi ayung" alho' za: bue" jo, da:. Nang gi nga" da" nheig yo: yoem: so' ri gyi: sho' ashau" loem zoo: rigi nang doem yo" gyeung" shang: wa zi anghoid. 14 Ngoo Aseing tid too" bye:. Ngoo moo" zei: wa ayo, ju" lo abye:. Ngoo gi re" yooboo joem ri ato" pyam wa. Nheig khyeug myid we' aci: shug wa nheig we' akhyeing wa. Nang koid bye: da" lo, moo" shid re" yooboo dam shoug" kham: zoo: wa. Yoem: moo" bo Aseing tid too" bye:.
15 Aseing gi ngoo ri dang: tid da:. 16 Nyang: tid zigi ?Shid: se' da" byu we"- ngoo gi nang jheddab thang da" byu ri damyo, nyeig riza: shu" yu pyam wa. Nang gi myeing" we' age myoo: wa. Ngoug we' age ngoug wa. Ngoug byid: we' age thu wa. 17 Re" ngoug thui: ri ashau" gyoo: nhang:- kougshu: da" asoo" khyo" vhuthoeb khyoid pyam- khyid: zhung" azhung" khyid: cen: anyid yen". Re" myonhoo: ri anghoeb ci:- kougshu: bang: zo: da" zoo: noem ri we' azoo:.
18 Nab soin: no' ngoo gi byu yi yo' dang: doem go" nyid. Hau: nyid" myen" thang: nga" yhoem: seing: myhi' shid: loo" bye:. Houg: lho: thang: nab kyoo' ri ngoo gi ngoo ri tid to" khyo" koid bye:. 19 Byumyu" yigi ngoo ri ?Nang ciwim hid: su" koid shug nyid la"? ga: myid: ago".
20 Houg: lang" ngoo nyangnu" ri tid zigi ?Aseing gi ngoo ri dang: ji wigi tid zigi 21 He: mungdang: Israela byumyu" yiri byid: we' ga: zi nghoid. Nanu" gi Noku Yhoem: Moo" geing: teing ziri phau: boem ago". Nanu" gi hau: ziri yu" nau wigi yhe: koem" nau da:. Nghoid loug we' Aseing gi hau: ziri aco' ajhoid bui" nhang: pyam loo wa. Houg: lho: Yerusalem moo teing too" kho' da" nanu" yhoem: byu yi mo ngi bang: gi meing: zain: jang" moo said pyam zi shoug" loo goo" wa. 22 Houg: lang" nanu" gi ngoo koid lid: lo yhang: ti" koid loo goo" wa. Nanu" gi nanu" da" myonhoo: moo we' anghoeb ci: loo: kougshu: bang: zo: da" zoo: noem ri we' azoo: goo" wa. 23 Nanu" gi vhuthoeb khyoid ci: lho: khyid: zhung" azhung" aso" yen" goo" wa. koug we' akug ngau we' angau goo" wa. Nanu" gi nanu" nya: yooboo gang mo nyid joem: loo" goo" wa. Nanu" nyang: cang" noo kyeing" kyeing" shug loo goo" wa. 24 Houg: lang" ngoo gi nanu" shid re" asoo" bui" byid: wa. Nanu" gi ngoo koid lid: lo da" ja: khang" moo" ri koid loo goo" wa. Aseing gi he: zi bue" loo lang" nyang: gi yoem: moo" bo Aseing nghoid ziri nanu" se' loo goo" wa ga: tid da:.
25 Aseing tid zigi ?Shid: se' da" byu we"- akhid" ngoo gi nyangnu" phoug: lho: ngei pyoo: wa. Nyangnu" yu" ei" nau- yhe: ei" nau da" geing: teing Noku Yhoem: Moo" ri nyangnu" mo yu pyam byid: wa. Houg: lho: ngoo gi nyangnu" da" yuggi zoo: yi yo' myiyi: zoo: yiri shu" yu pyam byid: wa. 26 He: ziri ngoo koid kaid da" bidnyid moo hau: byo, yoin" jang" mo yo" phang: loid lo da" byu dayham" gi nanu" ri hau: khyoo: lo tid kyoo" wa. 27 Hau: bidnyid ri nang ci: phyug pyam bye: da" dang: ji wa yoem: so' ri doem yo" yu lho: nang gi nyangnu" yo' dang: doem go" loo wa. Hid: su" khyo" wigi nang gi byumyu" yiri asoo" koid shid wigi nyangnu" ngoo Aseing ri se' loo goo" wa.