1 Aseing ngoo ri dang: tid da:. 2 Nyang: tid zigi ?Shid: se' da" byu we"- nang gi byu said bang: byeung" jo, da" voomoo" ri dang: phyed wa jen" bye: lha". Nyang: koid da" aco' ajhoid moo" joem dangain" ri jhoid koid pyam wa. 3 Ngoo yoem: moo" bo Aseing tid nyid ziri voomoo" ri tid kyoo" we'. Nang gi nanya: byu myoo" sho' ri said pyam gang mo yu phara" soolhoo: joem ri no' da" khyo" nanya: gung ri ayung" alho' bue" nhang: da" gang mo we' re" ayo, gi ju" re" nyid bye:. 4 Nang gi hau: byu said yooboo yo" wigi nang koid da" yu phara" soolhoo: joem koid khyo" nang nyang: ayung" alho' bue" nhang: da:. Houg: lho: re" bidnyid ju" re" nyid wigi re" akhyeing ayo, gi byeung" byug abye:. Houg: gang mo ngoo gi nang ri byumyu" yi wigi yi juang" nhang: bye:. Mungdain: dangain" wigi nang ri yu" nyhab nhang: bye:. 5 Nang tarha" aci: yoomo jang" moo vi: moo jo, da" mungdain: joem gi nanu" ri nyhab' boem ago". 6 Israela vhujhung: yi dangain" gi nyangnu" nya: yoem: ri myid loem lho: byu said moo" shoid ago". 7 Voomoo khoug: mo hang" dayug we' nya: myhi' phoo ri ngi: ashab' byid: nghoid ago". Nang gi tungbau byu yiri mhoug zo: lho: cougmoo" yi yo' coug" zoo: yiri atu" amyaid sho: da:. 8 Nang gi gyeung" shang: da" joyoo joem ri aphoug"- Dougno: Bidnyid ri acang nghoid da:. 9 Re" da" byu dayham" gi subi" ri yo" said pyam nhang: wa shid re" mhau' dang: tid ago". Nyangnu" mo dayham" gi yu phara" soolhoo: joem ri ngei" byid: da" xoin" joem ri zo: boem. Dayham" bang: gi nyangnu" mhain: khyoo: ri khanham we' nheugdeug sho' koid nyid ago". 10 Nyangnu" mo dayham" bang: gi nya: pho da" yhoem: seing: myhi' yo' yhoeb ago". Dayham" bang: gi myiyi: yiri mi ci: da" ayo, gyoo: moo gung shoo" zoem" khoug: wa shid re" agyoo: atho' jhoin" boem. 11 Dayham" gi myi: shoid lang: shoid ago". Houg: lho: dayham" gi nyangnu" da" du moo" yi anghoid lang" nyangnu" da" nham" moo" yiri mhid" phyo' yu ago". 12 Re" byumyu" yi mo dayham" gi aphoug" yoo" wa shid re" byu said da:. Dayham" gi nyangnu" da" Israela byumyu" nyang: cang" ngei jhid" byid: lho: atu" amyaid yu zo: ago". Houg: bang: jang" mo atu" amyaid yu nyid lho: nyangnu" yoo" zoo: yoo" shug lo ago". Nyangnu" ngoo ri to" myhid pyam bye:?. Yoem moo" bo Aseing tid bye:.

13 ?Ngoo gi re" lhoid zoo lhoid shug khyoo: yo' byu said moo" moo nga" lo zhoeb ri thoin: khyo' kaid wa. 14 Ngoo nang yo' moo" thang: said uri nang gi nheigloem: yo" zeing: kham: lho: re" lo, yo" tu: too' wa yhi' yoem: boo shi" wa ein: nang myid jho: nyid rhe". Ngoo Aseing tid bye: wigi nga" dang: ri cang pyeing we'. 15 Ngoo gi re" byumyu" yiri mungdain: loem: khang" moo" khyoo: byumyu" ja: khang" moo" khyoo: khaid sain" pyam wa. Houg: lho: re" akhyeing" da" avid joem ri thang nhang: pyam wa. 16 Houg: lho: gootu: byumyu" yigi nang ri ngi: yoem" nhang: loo wa. Nghoid lang" nang gi ngoo Aseing nghoid ziri se' loo wa.

17 Aseing ngoo ri 18 ?Shid: se' da" byu we"- Israela byumyu" yigi nga" shid re" ce: akyu" aboo nghoid ago". Nyangnu" gi to' khyid" yo' tu da:. Ngei ri khyoem' moo" myi: moo phoid shoug kyeing pyam thang: ri deing jo, da" gyid: ni- to' phyu:- joto'- xuid: yo' du da:. 19 Hougsu" yoomo akhid" ngoo yoem: moo" bo Aseing gi nyangnu" ri nyangnu" gi hau: ziyo' dayhang: ti" ce: akyu" abo boem ziri tid nyid bye:. Ngoo gi nyangnu" dangain" ri Yerusalem moo dage" shu" nyhid: too" wa. 20 Hau: zigi ngei joem:- gyid: ni- joto'- to' phyu: joem ri phoid shau' kyeing yu da" khyoem' moo" myikhyoem khoug: moo zheing" kaid to" yhang: ti" du da:. Ngei joem ri myi: wigi nghe' shau' kaid yhang: ti" nga" nheig joem: yo: ziyo' nheigloem: nge" lung zigi nyangnu" ri nghe' shau' pyam wa. 21 Nghoid bye:- ngoo gi nyangnu" ri Yerusalem moo zheing" nyhid: to" wigi nyangnu" agyid" moo myi: moid to" lho: nga" nheig yo: zi wigi nyangnu" ri nghe' shau' pyam wa. 22 Ngei ri khyoem' moo" myi: moo nghe' shau' pyam yhang: ti" Yerusalem moo nyangnu" ri nghe' shau' pyam wa. Houg: lang" nyangnu" gi Aseing da" nheig yo: khyoo: ri shoug" kham zo: nyid boem ein: ziri se' loo goo" wa.

23 Aseing gi ngoo ri dang: doem ji da:. 24 Nyang: tid zigi ?Shid: se' da" byu we"- Israela byumyu" yiri nyangnu" da" mougmyid gi agyeungshang: loo: yoomo nga" nheig yo: zigi hau: ziri yooboo dam byid: nyid zi nghoid ein: tid kyoo" we'. 25 Vhujhung: yigi nyangnu" said to" da" shoo" ri nyho: hung: nyid da" khang: khyi: joem yo' du ago". Nyangnu" gi byu ri said. Nyangnu" yo" yu nhoo' ngei yo' zi joem dangain" ri yu wigi nyangnu" da" byu said moo" gi myiyi: myoo" sho' bang: ri cougmoo" khyo" nyid deing nhang: boem ago". 26 Khainjung yigi nga" tarha" ri phyo' pyam lho: gyeung" shang: khyoo: ri aphoug" nghoid ago". Nyangnu" gi gyeung" shang: ziyo' agyeungshang: khyoo: ri ci: akho' too" nghoid ago". Nyangnu" gi younglho' ziyo' ayounglho' khyoo: joem shoug" go" ziri ajhau" shid nghoid ago". Nyangnu" gi Dougno: Bidnyid ri cishu: anhang: nghoid ago". Hau: gang mo Israela byumyu" yigi ngoo ri aphoug" nghoid ago". 27 Mung" vhoeb zoug: yigi nyangnu" yo" khaid yu to" da" shoo" ri ngaid phyo' zo: nyid da" zeigni joem yo' du ago". 28 Lapi: yigi vang khyam: ri moo" zei: bang: shoofuid" wigi xoug" phyu: nyid yhang: ti" hau: yooboo joem ri nyhoem" zau" ci: ago". Nyangnu" gi ajo da" yoeb myang joem ri myang lho: ajo da" khyo" Lapi: pe: da:. Nyangnu" gi yoem: moo" bo Aseing da" mungdang: ri tid nyid ga: tid nghoid loug we' ngoo Aseing gi nyangnu" ri dang: aji. 29 Yoo" zoo: yoo" shug bang: gi mhoug zo:- lhoid zo: ago". Nyangnu" gi sho" jhen: bang: ri anghoid khyo" zoem" khau: wigi tungbau byu yiri ajoo aeung: khyo" zeig zo: ago". 30 Ngoo gi vang khyam: ri nga" nheig yo: ziyo' phyo' shoin' pyam uri doem yo" zhug too" wa byu dayug yug yo' vang khyam: gyoeb gyo" jo, da" joyoo moo yu" yab jo, lho: hau: mougmyid ri yu" goin coung: byid: wa byu dayug yug ri sho: nghoid loug we' ngoo gi dayug ri we' ashau" myang. 31 Hougsu" yoomo ngoo gi nga" nheig yo: khyoo: ri nyangnu" adang moo nhang: khyo' kaid wa. Houg: lho: ngoo gi nyangnu" koid lid: lo da" moo" zoo" gang mo myi: yhang: ti" nyangnu" ri phyo' shoin' pyam wa. Yoem: moo" bo Aseing tid too" bye:.