17
Aseing gi ngoo ri dang: tid da:. Nyang: tid zigi ?shid: se' da" byu we"- Israela byumyu" yiri Ngoo yoem: moo" bo Aseing nyangnu" ri tid nyid ziri se' gyoo: wa shid re" dang: tu' daloem: tid kyoo" we'. Houg: moo gye" yung" da" ngho' moug" yo' gye" rua da" dung ri pyo: ci: da" zoin bung: dadu: nyid. Nyang: gi lebanon boem joem khyoo: dang: yhe: lo" lho: shamu dagam mo anyug ri khyau" yu da:. Nyang: gi hau: ziri phaga: moug: khyoo: yu lo lho: phaga: byu yi da" voomoo" daloem: moo lo zhung" to" da:. Hau: thang: nyang: gi Israela moug: mo seig zoo: dagam ri yu lho: hau: ziri yug gyi: loo nhang: wa shid re" khanham we' gyid jo, da" myid xu: ge joyoo moo sho" to" da:. Hau: seig zoo: gam gi anyug toid lo lho: nyhoem: nyhoem: moo za: afu' gye" mung" da" zabyid nei danei bue" loo bye:. Hau: seig kung: joem gi zoin bung: jhang yug do, lo" lho: agyi: joem gi myid khyoo: no, no, nyang: cen' vang lo" da:. Hau: zabyid nei gi akung: joem yo' afu' joem byeung" nghoeb to" da:.
Gye" rua da" dung joem yo' ngho' moug" gye" thu: da" zoin bung: gootu: dadu: we' nyid da:. Houg: lho: nyang: yug jo, da" joyoo tho' gyid je yo" byid: abe? ga: myid byu ziyo' akhid" hau: zabyid nei gi nya: agyi: ri hau: zoin bung: jhang khyoo: cen' kaid lho: nya: afu' joem ri hau: zoin bung: jhang yhoin" kaid da:. Nghoid loug we' hau: zabyid nei gi myid xu: ge lho: gyid goolhoo' yo" da" joyoo moo bain sho" too" bye: yoomo nyang: gi afu' gye" mung" wigi ashi" zei: da" zabyid gam moo" dagam bue" jo, abye:.
Houg: yoomo ngoo yoem: moo" bo Aseing myid: bye:. He: zabyid nei gi yeing" wigi yug gyi: loo wa la". Xang: shi" mo zoin bung: gi hau: ziri agyi: mo lang: noid ziyo' zabyid shi" joem ri lang: nhoin' khyo' pyam wigi akung: joem ri khyau" pyam byid: lho: kyug shid: loo" nhang: wa la". Hau: ziri lang: noid pyam wa shid re" yoem: myoo: sho' aca" wa. Yoem: gyi: da" byumyu" damyu" we' aca" wa. 10 Nghoid- hau: ziri zhung" too" bye:. Nghoid loug we' hau: zigi yug gyi: sheung: loo wa la". Bid thu shoid mo lid lo hau' zang" kaid ri ashoem: byug wa rhe". Houg: gi nyang: yug jo, da" jang" moo ayhau" shid: loo" wa rhe".
11 Aseing gi ngoo ri dang: tid da:. 12 He: goemlu too' bang: ri hau: dang: tu' da" dang: kang: ci: nghoid zi si' go" la" ein: myid: yu" we'. Babelon khokham gi Yerusalem khyoo: re" lho: khokham phoo yo' nya: zoug: ludaid yiri Babelon khyoo: shu" loo" bye: ziri nyangnu" ri tid kyoo" we'. 13 Nyang: gi khokham pho da" yhoem: byu yi mo dayug ri shu" yu wigi nyang: yo' dang: theing daloem: koid da:. Houg: lho: nyang: ri dang: zung" wa shid re" jham' tang: nhang: da:. Nyang: gi yhouggyen: da" byu yiri zoonhoo" khyo" shu" lo" da:. 14 Hougsu" koid zigi hau: mungdain: adoem to' loo wa shid re" yo' dang: theing ri nyangnu" zoem: ci: wa shid re" nghoid da:. 15 Nghoid loug we' Yuda khokham gi goemlu to' wigi myang: joem yo' gyidab moo" dadab yo" yu wa shid re" Egutu khyoo: lagyoo: yiri nhang: kaid da:. Nyang: oung: doid wa la". Nyang: houg: mo yo" loid wa la". Nyang: gi dang: theing ayo" phyo' pyam wa yooboo dam aloem zoo: loo za: gi aloid byoin wa.
16 Yoem: moo" bo Aseing tid zigi ?Ngoo gi kangso' dei nyid da" Mangsoo nghoid nyid ziyo' dayhang: ti" he: khokham gi Babelon moo shid: wa. Ciwim ga: ri nyang: ri khokham zhungtang moo zhung: nhang: su: Babelon khokham yo' to" da" nya: jham' tang: da" dang: yo' dang: theing ri phyo' pyam yoomo nghoid da:. 17 Babelon byu yi wigi byu myoo" sho' ri yo" said pyam wa shid re" myidzhoo" boem" yo' gadug joem ri du: uri yoem: so' gyi: da" Egutu khokham lang" nyang: ri gyipui" moo ayo" pang" yu wa. 18 Nyang: gi nyang: koid to" da" jham' tang: dang: yo' dang: theing ri phyo' shoin' pyam da:. Nyang: he: gu: dangain" koid bye: yoomo akhid" nyang: ayo" phang: loid loo wa.
19 Yoem: moo" bo Aseing tid zigi ?Ngoo gi kangso' dei nyid da" Mangsoo nghoid nyid ziyo' dayhang: ti"- zoem: ci: wa shid re" nga" myeing ri lang: lho: to" da" dang: theing ri phyo' shoin' pyam da" gang mo nyang: ri ngoo yooboo dam byid: wa. 20 Ngoo gi shoo" khaid su: da" goin ri yu myhu" lho: hau: ziyo' nyang: ri kuang wa. Ngoo gi nyang: ri Babelon khyoo: shu" lo" wigi nyang: ri hau: joyoo moo yooboo dam byid: wa. Ciwim gari nyang: gi nga" dang: ri jhug azug yoomo nghoid da:. 21 Bue" thang da" nya: gyizoo: yigi meing: zain: jang: moo said pyam zi shau" boem goo" wa. Houg: lho: ashid: lhoo: nyid deing bang: gi shoid khang" moo" khyoo: khaid tang" pyam zi shoug" wa. Hau: thang: nanu" gi ngoo Aseing dang: tid bye: ziri se' loo goo" wa.
22 He: zigi yoem: moo" bo Aseing tid zi nghoid.
?Ngoo gi myhang: da" shamu gam aphyoo" ri yu lho:
seig nyug ri khyau" pyam wa
Ngoo gi hau: ziri myhang: da" boem daloem: moo lo" sho" too" wa.
23 Hau: zigi Israela mo myhang: thang da" boem nghoid wa.
Hau: zigi akung: ako'' joem thu re" wigi ashi" zei: loo wa.
Houg: lho: atho' tid mung" da" shamu gam bue? loo wa.
Byumyu" cang: joeb da" ngho' joem gi houg: moo nyid wigi
hau: seig yoeb moo khau: nghi: joyoo myang boem wa.
24 Hau: moug: moo jo, da" seiggam dangain" gi ngoo Aseing nghoid ziri se' loo goo" wa.
Ngoo gi myhang: da" seiggam joem ri thug lheing: pyam lho: nge da" seiggam joem ri yug gyi: loo nhang: wa.
Ngoo gi seig nyau gam joem ri kyug shoem: loo" nhang: lho:
seig kyug gam joem ri nyau joem: loo nhang: wa.
Ngoo Aseing tid too" bye:. Ngoo gi ngoo koid wa ein: tid too" bye: da" ziri koid wa.