13
Aseing gi ngoo ri dang: tid da:. Nyang: tid zigi ?Shid: se' da" byu we"- nyangnu" da" dang: ri Lapi: dang: khyo" mhau' tid da" Israela lapi: yiri tid kyoo" we'. Aseing da" dang: ri tam" gyoo: wa shid re" nyangnu" ri tid we".
He: zigi yoem moo" bo Aseing tid zi nghoid. ?He: nheig agyeing: da" lapi: yigi joem: lo" byug ago". Nyangnu" gi nyangnu" nya: myid thu ziri coem' yoem: byid: wigi nyangnu" nya: yoeb myang joem ri myid thu yu ago". Israela byumyu" yi we"- nanu" da" lapi: yigi byo, yoin" jo, da" voomoo" moo nyid da" myeingkhoid" joem yhang: ti" ce: akyu" aboo nghoid da:. Nyangnu" gi vang joem byo, gyo" jo, jang" moo azung"- vang joem ri we' adoem so' koid yoomo Aseing da" bidnyid moo meing: byo, loo lang" Israela ri gyi mo ayo" goem loem byid: nghoid ago". Nyangnu" da" yoeb myang joem gi agyeing" anghoid. Nyangnu" lapi: dang: gi mhau' zi danghoid ago". Nyangnu" gi nga" mungdang: ri tid nyid ga: tid fu" nghoid loug we' ngoo nyangnu" ri atid nhang:. Nyangnu" gi nyangnu" da" dang: joem jo main" loo wa ziri myid lang" ago". Ngoo nyangnu" ri nanu" myang da" hau: yoeb myang joem gi agyeing" anghoid. Houg: lho: nanu" lapi: dang: joem gi mhau' zi nghoid da:. Nanu" tid zigi hau: zigi nga" dang: joem nghoid ga loug nanu" ri ngoo dang: aji lo yu"? ga: tid.
Houg: yoomo yoem: moo" bo Aseing nyangnu" ri ?Nanu" dang: khoin" joem gi agyeing" anghoid- nanu" yoeb myang joem gi mhau' zi danghoid. Ngoo gi nanu" ri thougtheung. Ngoo gi yoeb myang joem agyeing" anghoid ziyo' khyoo: vhang: shu" vhang: da" lapi: pe: bang: lapi: nanu" ri yooboo dam byid: wa za: danghoid lo:. Nga" byumyu" yi phung: foem: lho: moo" she: myid phyed lo" uri houg: moo nanu" anyid goo" wa. Nanu" da" myeing joem gi Israela byumyu" yi da" zhayhen" moo aboo wa. Nanu" gi nanu" nya: mougmyid khyoo: khanham we' adoem tau" loo wa. Houg: lang" nanu" gi ngoo yoem: moo" bo Aseing nghoid ziri se' loo wa.
10 ?Lapi: yigi dangain" ge ga: tid wigi nga" byumyu" yiri khyoo: vhang: shu" vhang: da:. Dangain" gi gyeing" age zi nghoid da:. Nga" byumyu" yigi ateing da" lugboem yo' vang khyam: zhug lho: lapi: yi re" wigi shafuid" re" xoug" to" da:. 11 Lapi: yiri nyangnu" vang khyam: byo, gyoo" lo" nyid bye: ein: tid kyoo" we'. Ngoo gi moug: voo nhang: wa. Hau: adang moo leig voo gyo" zang" wigi thain: da" lid wigi moid zang" nhang: wa. 12 Vang khyam: gi byo, gyoeb gyoo" loo" wa. Houg: lho: yugkhang" moo" gi nanu" ri hau: shafuid" xoug" to" zi ce: akyu" bo la" ga: myid loo goo" wa? ga: tid.
13 Akhid" he: zigi yoem: moo" bo Aseing tid zi nghoid. Ngoo nheig yo: zigi vang ri phyo' shoin' pyam wa shid re" thain: da" lid- moug: yo' leig voo ri nhang: kaid loo wa. 14 Ngoo gi nyangnu" shafuid" xoug" to" da" vang khyam: ri phyo' khyo' pyam wa. Abyi asain" koid pyam wa. Ayang zhug lugzeing ri di: di: myang thu jo, nhang: wa shid re" myidyung too" bye:. Hau: zi byo, gyoo" lo wigi nanu" dangain" ri said pyam wa. Houg: lang" yugkhang" moo" gi ngoo Aseing nghoid ziri se' loo goo" wa.
15 Hau: vang khyam: yo' hau: ziri shafuid" xoug" bang: gi nga" nheig yo: ziri shoug" kham: zo: loo goo" wa.
Houg: lang" ngoo gi nanu" ri vang khyam: gi bei: byug abye:. Hau: vang khyam: ri shafuid" xoug" bang: we' bei: byug bye:. 16 Hau: lapi: yigi dangain" age da" uri dangain" ge ga: Yerusalem ri tid boem ago". Yoem: moo" bo Aseing tid bye:.
17 Aseing tid zigi ?Shid: se' da" byu we"- akhid" re" byumyu" yi phung: moo Lapi: pe: mhau' tid da" myiyi: yiri yu" we' nyangnu" ri ngi: tid yoem" pyam byid: we'. 18 Houg: lho: nyangnu" ri yoem: moo" bo Aseing tid nyid ziri tid kyoo" we'.
?Myiyi: nanu" gi joem: lo" abye:. Nanu" gi yugkhang" moo" shid re" main tain: lo, theing" joem zeig byid: wigi houg: bang: gi nyangnu" ri nyangnu" vhuloem tho' moo zhung" wa shid re" main dain: leung yoeb joem ri koid byid: da:. Hougsu" lang" nyangnu" gi gootu: byumyu" yi da" kangso' gyung: khyoo: joem moo yoem: so' yo" yu wa zi nghoid. Nanu" gi nga" byumyu" yi jang" moo shid: wa yo' dei wa yoem: so' ri yo" yu to" wigi hau: ziri nanu" nya: akyu" shid re" ci: nau boem ago". 19 Nanu" gi Yoono, dajhi' yo' zooyho' dajhi' ri yo" shau" yu wa shid re" nga" byumyu" yi shidkhoin" moo ngoo ri ngi: yoem" nhang: da:. Nanu" gi shid: wa amoin: bang: ri said pyam lho: nanu" gi dei nyid wa amoin: bang: ri dei nyid nhang: da:. Houg: lho: nanu" gi nga" byumyu" yiri mhau' dang: tid wigi nyangnu" gi nanu" ri loem ago"? ga: tid da:.
20 Akhid" he: zigi yoem: moo" bo Aseing tid zi nghoid. Kangso' dei ziyo' shid: ziri zei: ci: wa shid re" yoem: kaid wigi nanu" ci: da" hau: lo theing" joem ri ngoo ngheing" da:. Ngoo gi hau: joem ri nanu" lo, yoem: mo khyoid pyam byid: lho: nanu" zei: ci: da" byu yiri nhang: thu kaid byid: wa. 21 Ngoo gi hau: nanu" da" leung yoeb joem ri khyoid pyam byid: wa wigi nga" byumyu" yiri nanu" da" yoem: so' mo dalheing: dam bain sho' phang: loid loo" nhang: wa. Houg: lang" nanu" gi ngoo Aseing nghoid ziri se' lo boem wa.
22 Nanu" gi nanu" da" mhau' tid da" dang: joem wigi ngoo anau noo nhang: da" byu gi yiri yoem: shoin: nhang: da:. Akhyeing" bang: gi nyangnu" da" akhyeing" ziri to" pyam wigi nyangnu" da" kangso' joem ri khyoid yu wa ziri toem' pyam ago". 23 Houg: akhid" re" agyeing" anghoid da" yoeb myang joem yo' khyoo: vhang: shu" vhang: da" mhau' tid dang: thang byug abye:. Ngoo gi nga" byumyu" yiri nanu" da" yoem: so' mo khyoid yu wa. Houg: lang" ngoo Aseing nghoid ziri nanu" se' loo wa? ga: tid.