12
Aseing gi ngoo ri dang: tid da:. Nyang: tid zigi ?Shid: se' da" byu we" nang gi goemlu to' da" byumyu" yi phung: gung moo nyid nyid da:. Nyangnu" myojid" dab nghoid loug we' ci: amyang nghoid da:. Nukhyab dab nghoid loug we' ci: ashau" gyoo: nghoid da:. Ciwim gari nyangnu" gi goemlu too' nau ago".
Shid: se' da" byu we"- akhid" phang: khau: yen" su: yhang: te" zi soin' deing: wigi moug: acoid shi" ri thu so" loo" we'. Nang thu lo" ziyo' gootu: joyoo khyoo: yhe: lo" ziri yugkhang" moo" shau" myang boem goo" baja". Hau: goemlu too' bang: gi nang ri xoem" ri xoem" abe. Nyid" gung myo, myang shi" uri re" zi joem ri pyoung" yu too" wa shid re" ein: soin' deing: shug we'. Hau: thang: pyoung" she: too" jang" khyoo: yhe: lo" yhang: ti" myen" thang: zoo" ri nang yhe: lo" ziri nyangnu" coem' zung" yu" kaid boem baja". Nyangnu" coem' zung" yu" nyid boem uri re" yhoem: mo pyiyam moo aduang: daduang: thoung" phang wigi re" zi deing: ri hau: khyo" yu thu loo" we'. Re" zi deing: ri re" koo" tho' moo koid: vu, wigi nang khakhyoo: yhe: lo" ziri ashau" myang sho' re" myojid" ri nghoeb ci: wigi moug: coid khoug: khyoo: thu lo" ziri nyangnu" zung" yu" boem goo" baja". Nang koid zigi Israela byumyu" yi shid re" tid poin" byid: zi nghoid loo wa? ga: tid.
Ngoo gi Aseing koid nhang: gu: ri koid bye:. Hau: nyid" ri ngoo gi phang: khau: yen" su: dayug yhang: ti" zi soin' deing: wigi hau: nyid" myen" moug: coid zoo" ri ngoo gi pyiyam moo nga" lo, wigi aduang: daduang: phang lho: thu loo" bye:. Yugkhang" moo" coem' zung" yu" nyid boem uri ngoo gi zi deing: ri nga" koo" tho' moo koid: vu, wigi thu loo" bye:.
Thang: nab soin: Aseing ngoo ri dang: tid da:. Nyang: gi ?Shid: se' da" byu we"- akhid" he: Israela byumyu" goemlu to' bang: gi nang cikoid nyid ga: ziri myid: nyid ago". 10 Ngoo yoem: moo" bo Aseing nyangnu" ri tid nyid gu: ri nyangnu" ri tid kyoo" we'. He: mungdang: gi Yerusalem moo vhoeb nyid da" khokham nu" yo' houg: moo nyid da" byu dangain" bang: shid re" nghoid. 11 Nang koid bye: da" khyoo: gi nyangnu" moo bue" loo wa da" asoo" nghoid ziri nyangnu" ri tid kyoo" we'. Nyangnu" gi phang: khau: yen" bang: yo' myheig to" da" thung: byu yi bue" lo boem goo" wa. 12 Nyangnu" ri vhoeb da" khokham nu" gi nya: shid re" vang khyam: ri duang: phang byid: da" duang: khyo" moug: coid khoug: moo nya: byimi deing: koo" tho' moo koid: vu, lho: phang: lo" byug wa. Nyang: gi nya: myojid" ri nghoeb ci: wigi nyang: khakhyoo: yhe: lo" ziri amyang nghoid da:. 13 Nghoid loug we' ngoo gi nga" goin ri pei: myu" kaid wigi hau: ze wigi nyang: ri myheig yu wa. Houg: lho: ngoo gi nyang: ri Babelon voomoo" khyoo: shu" loo" wa. Hau: joyoo moo nyang: amyang loo: shid: lo" byug wa. 14 Ngoo gi nya: khokham vang" mo byu yi dangain"- nya: da" phajhi" byid: bang:- kang: zung" bang: ri shoid khang" moo" khyoo: khaid sain" pyam byid: wigi byu yigi nyangnu" ri said pyam wa shid re" cang sho: yen" wa.
15 Ngoo wigi nyangnu" ri gootu: byumyu" yi phung: khyoo: yo' tungbau mungdain: joem khyoo: khaid sain" kaid uri ngoo Aseing nghoid ziri nyangnu" se' loo goo" wa. 16 Ngoo gi nyangnu" mo dajhi' ri za: meing: zain: pui" mo phang" khoug mo noo phyoo" mo asaid pyam wigi nyid deing nhang: wa. Houg: lang" hau: byumyu" yi phung: gung moo nyangnu" koid khyoo: khayhi' aco' ajhoid nghoid ziri boin: lo wigi ngoo Aseing nghoid ziri nyangnu" yhen: yu loo goo" wa? ga: tid.
17 Aseing gi ngoo ri dang: tid da:. 18 Nyang: gi ?Shid: se' da" byu we" nang zo: uri nain" we' shug uri gyoug wigi nain" we'. 19 He: zigi nyangnu" mougmyid moo dei nyid shi" da" Yerusalem voobyu yi shid re" yoem: moo" bo Aseing da" mungdang: nghoid ein: damyu" goin" ri yhe: tid kyoo" we'. Nyangnu" zo: uri nain" wigi shug uri gyoug nain" loo goo" wa. Nyangnu" mungdain: ri akoem: to" pyam loo goo" wa. Ciwim gari hougmoo nyid da" yugkhang" moo" gi tarha" aci: nghoid ago". 20 Akhid" byu byeung" sho' nyid da" voomoo" joem gi phyo' shoin' pyam zi shoug" loo goo" wa. Houg: lho: mungdain: gi dain" pyoid yoo bui" nhang: pyam we'. Houg: lang" ngoo Aseing nghoid ziri nyangnu" se' loo goo" wa.
21 Aseing ngoo ri dang: tid da:. 22 Nyang: gi ?Shid se' da" byu we"- Israela byu yigi ?Ayo, akhyeing: lid: lo" wigi tid to" zigi ci: abue" loo? ga: da" he: dang: zhoem' ri ciwim doem pug tid nyid boem loug la". 23 Akhid" hau: ziyo' sen: wigi yoem: moo" bo Aseing ngoo tid ca" ziri nyangnu" ri tid kyoo" we'. Ngoo gi hau: dang: zhoem' ri thang byug nhang: loo: wa. Hau: ziri Israela mung" moo adoem pug tid nhang: loo: wa. Hau: gungthid nyangnu" ri ?Ayo, akhyeing: ju" bye:- tid to" zi jo rhi" bye:? ein: tid we'.
24 ?Israela da" byumyu" yi phung: gung moo mhau' da" yoeb myang joem yo' khyoo: vhang: shu" vhang: da" lapi: dang: joem ajo, loo: wa. 25 Ngoo Aseing gi nyangnu" yo' dang: tid wa wigi ngoo tid zi bue" loo wa. Ane" nyid loo wa. Goemlu to' bang: nanu" we"- nanu" nya: apyaid moo ngoo koid wa ein: nanu" ri tid poin" to" ziri ngoo koid loo: wa. Ngoo tid bye:? ga: yoem: moo" bo Aseing tid.
26 Aseing ngoo ri 27 ?Shid: se' da" byu we"- re" yoeb myang yo' lapi: dang: joem gi ju" loo wa ayo, gye" vi: shi" ayo, khyoo: danghoid ga: Israela byumyu" yi myid jho: da:. 28 Houg: yoomo ngoo yoem: moo" bo Aseing tid nyid ziri nyangnu" ri tid kyoo" we'. Ane" nyid loo: wa ngoo tid too" bye: ziri bui" nhang: loo: wa ngoo yoem: moo" bo Aseing tid bye:? ga: tid.