EZEKIEL
MOUGSOUG" PUG
(Ezekiel)
Lapi: Ezekela gi 586 BC moo Yerusalem abyo, gyo" shi" ayo, mo zi byo, gyo" lo" thang: ayo, ju" sho' Babelon moo pyoung" she: nyhid: too" shau" jang" moo nyid lid: loo bye:.
Nya: mungdang: gi Babelon moo pyoung" she: nyhid: too" shoug" bang: yo' Yerusalem byu yiri tid to" zi nghoid. Ezekela byu yiri tid to" zi nghoid. Ezekela mougsoug" moo dang: kang khyug du bo. 1) Mangso wigi Ezekela ri Lapi: koid wa shid re" khe: khyoo: 2) Byumyu" yi adang moo Mangso wigi dang: phyed wa yo' Yerusalem byo, gyo" lo" wigi phyo' shoin' pyam shoug" wa khyoo: byumyu" yiri tid poin" nyid khyoo:. 3) Nya: byumyu" yiri doin: zeig zo: wigi khyoo: shu" vhang: da" byumyu" mungdain: myoo: sho' bang: adang moo Aseing da" dang: phyed khyoo: mungdang:. 4) Yerusalem byo, gyo" lo" da" thang: Israela shid re" nheig teing khyoo: yo' je pyo: da" ju" loo wa ayo, ri dangsoo" byid: to" da" khyoo:. 5) Goga ri thougtheung da" lapi: dang:. 6) Noku Yhoem: Moo" yo' byumyu" mungdain: ri doem nyheing koid da" Ezekela myang khyoo:.
Ezekela gi laloem lakhoug: gyi: wigi gye" se' myid tu' yu" su: nghoid. Nyang: yo" myang kyang se' yu gu: myoo: phyang" gi yoeb myang khyo" myang thu yu wigi nya: mungdang: myoo: phyang" gi lo, moo" khyo" bang bang ci: shug byid: da:. Ezekela gi akhoug: mo nheigloem: yo' Venyi: ri aseig thid ca" ziyo' yugdu: ngab gi nyang: yug nya: yooboo shid re" yoovoin yu ca" khyoo: ri yhouggyen: khyo" tid to" da:. Nyang: gi byumyu" yi da" kangso' dei khyoo: aseig doem thid wa shid re" myid byu nyid khyoo: ri we' tid fu" bye:. Nyang: gi khainjung dayug khyo" we' lapi: dayug khyo" we' Noku Yhoem: Moo" ri yo" gyeung" shang: ca" khyoo: ri gooki" lid nheig dab myid bo da:.
1
EZEKELA XANG: SHI" MYANG DA" MANGSO YOEB MYANG (1:1-7:27)
1 Apyaid soem" xi: zain lhammoo" myid: khyab wim: nyid" ein: nyid" ri Buzi da" yuggi zoo: ngoo khainjung Ezekela gi pyoung" she: nyhid: too" shau" wigi Yuda byumyu" yi yo' dage" Babelon mung" Kheba gyid yam moo nyid nyid. Mougkhung: bang" lo wigi Mangso yoeb myang ri ngoo myang. (
2 Hau: zigi Khokham Yehoiakhin pyoung" yu zi shoug" thang: wim: zain ein: zain ri nghoid da:.)
3 Babelon mung" Kheba gyid yam moo ngoo ri Aseing dang: ji thui: shau" gyo: wigi nya: yoem: so' ri we' ngoo shoug" kham zoo: bye:.
4 Ngoo nghang yu" kaid ri mougzhung: shoid khyo" uglid zoo" lo nyid ziri shau" myang. Jhoemmoug" pung zeing mo lhab' myeug thu re" wigi hau: aqei: ayam mo mougkhung: gi bang jo, da:. Lhab' myeig nyid da" joyoo moo gyid: mid" yhang: te" zi daja: bang jo, da:.
5 Uglid da" agung moo byu alhoo: yhang: te" dei noem myid: ja: ri ngoo shau" myang.
6 Nghoid loug we' hau: joem du: khang" moo" moo myonhoo: myid: loem yo' dung myid: loem: dab.
7 Nyangnu" khyid: joem gi dain: wigi nyangnu" da" khyid: sain" gi nu: khyid: sain" yo' du da:. Nyangnu" gi boid yung" to" da" gyid: mid" yhang: ti" bang da:.
8 Hau: tho' agoo" nyangnu" da" myonhoo: myid: loem: yo' dung myid: loem: mo loem: khang" moo" da" dung vhoo: moo xangsu: byu lo, joem yhang: te" zi dab da:.
9 Dei noem du: khang" moo" da" dung eig dung ri pyo: khyo' ci: da:. Nyangnu" da" dung thang: joem tain" go" to" wigi dei noem joem gi myid: khyoug: bui" jo, da:. Nyangnu" dang: lo" uri nyangnu" gung joem ri aphug lheing: loo" loo: daphung: za: dang: lo" ago".
10 Dei noem du: khang" moo" moo adu da" myonhoo: myid: loem: dab. Shidkhoin" shoid moo byu myonhoo:- lo, yo shoid moo khangkhyi myonhoo:- lo, kung" shoid moo nuloo: myonhoo:- nungthang shoid moo zoin bung: myonhoo: dab da:.
11 Dei noem du: khang" mo" da" dung eig dung gi tu: ci: wigi nyangnu" da" dung thang: gi nyangnu" ayam mo dei noem dung thang: yo' tain" go" to" da:. Nyangnu" da" gootu: dung eig loem: gi nyangnu" gung ri vu, ci: da:.
12 Dei noem du: khang" moo" gi myid: shoid goin" khyoo: myonhoo: shu: yoomo hau: phung: gi alheing: phug ca" loo: nyangnu" myid vho: da" shoid khyoo: yo" yhe: ago".
13 Dei noem joem phung: moo ajang" yu: yen" lho: myiyham: dab nyid da" myidoem yo' du: zi daja: bo da:. Myi: gi myiyham: dab thu lo wigi myijhen" zain thu re" da:.
14 Dei noem joem nyangnu" nyang: we' thang: khyoo: shid khyoo: myijhen" yo' thu jhu" yen" da:.
15 Dei noem myid: ja: ri ngoo yu" nyid ri rheing" cab myid: cab gi myidjang moo tain" wigi nyangnu" dacab anam moo dacab jo, jo, da:.
16 Rheing" cab myid: loem: goin" gi du go" wigi cab khang" moo" gi phoug" dab lug yhang: ti" bang jo, da:. Rheing" cab- cab khang" moo" gi dacab akhoug: moo gootu: dacab jhoin: veing" tab to" da:.
17 Houg: yoomo rheing" cab joem gi myid: shoid goin" nau shoid khyoo: yo" leung yen" da:.
18 Rheing" cab khuang joem moo myojid" joem nghoeb tab to" da:.
19 Dei noem joem so" loo" khang" moo" rheing" cab joem we' houg: bang: yo' dage" bo yu: lo" da:. Houg: lho: dei noem joem myidjang mo to' loo" lang" rheing" cab joem we' bo to' lo" da:.
20 Dei noem joem gi nyangnu" nau jang" khyoo: yhe: ago". Rheing" cab joem gi dei noem joem koid da" khyo" bo cang da:. Ciwim gari dei noem joem gi nyangnu" ri khang" nyid.
21 Hougsu" yoomo dei noem joem so" lo" ayo,- theing: da" ayo,- moug: khyoo: do, da" ayo, khang" moo" rheing" cab joem hougsu" nyang: cang" koid da:.
22 Dei noem joem da" vhuloem tho' moo lug phyu: yi yi wim da" ziyo' koid to" da" mougkhung: yo' du zi daja: jo, da:.
23 Hau: mougkhung: vhoo: moo dei noem joem yab jo, da:. Du: khang" moo" gi nyang: nya: dung eig loem ri nya: ayam mo du: shoid khyoo: pyo: rhua: ci: da:. Gootu: dung eig loem: wigi nyang: nya: gung ri nghoeb ci: da:.
24 Ngoo gi nyangnu" dang: lo" uri nyangnu" dung phab thui: ri shau" gyo: da:. Hau: thui: gi panglai: myeing thui: yhang: ti"- gyidab moo" zeing lu: fu: thui: yhang: ti"- myhang: thang Mangso thui: yhang: ti" nghoid da:. Nyangnu" dang: zi theing: lang" nyangnu" da" dung joem ri yoeb ci: da:.
25 Nghoid loug we' nyangnu" vhuloem joem dang mo mougkhung: atho' khyo" thui: damyeing nyid shi".
26 Hau: mougkhung: tho' moo Nila lug yo' koid to" da" zhungtang te" zi daloem: jo, da:. Hau: zhungtang tho' moo byu yhang: te" zi dayug zhung: jo, da:.
27 Hau: alhoo: gi myikhyoem' agung mo gyid: mid" yhang: ti" yi yi bo" bang jo, da:. Hau: zigi dangain" jang" moo bang jo, da:.
28 Hau: jang" moo seing: yhang: yo, gain: mo asam" avoid dangain" bo da:. He: yi yi bang zigi Aseing nyid ziri ci: shug byid: zi nghoid.
Ngoo hau: ziri myang lang" myidjang khyoo: goeb pid bye:. Hau: thang: ngoo thui: dathui: shau" gyo: