5
1 Noku Yhoem: Moo" khyoo: yhe: da" ziri lhid' we'. Houg: khyo: xoin" ngei" byid: wa shid re" shoid ziyo' jo ziri ase' kho' da nheig agyeing: mo yhe: yhang: ti" yhe: tho' jhau" yu wa shid re" yhe: zigi je ge da:.
2 Nang dang: atid shi" ri nyheing" za: myid yu" we'. Houg: lho: Mangsoo ri ahain: akhyoid dangsoo" abyid:. Nyang: gi mougkhung: moo nyid wigi nang gi myidgung moo nyid da:. Houg: yoomo nang tid ca" zi mo lid wigi ajain" atid.
3 Nang je myid myo: jang" moo age da" yhoebmo, je myang loo wa. Nang dang: myoo: myoo: tid jang" mo anghoid akhuang dang: je thu re" wa.
4 Houg: yoomo nang khyo" Mangsoo ri dangsoo" koid too" lang" yo" myab yhi' myab myab koid pyeing pyam we'. Nyang: gi nheig agyeing: bang: shid re" ce: akyu" abui" nhang: nghoid da:. Nang koid wa dangsoo" to" ziri koid we'.
5 Dangsoo" byid: lho: ayo" cang pyeing wa tho' moo dangsoo" nyang: ajha" byid: ri je ge da:.
6 Mangsoo khainjung ri nang khyo" anghoid zi tid pyam bye: ein: adoem tid ca" sho' nanya: dang: khoin" joem gi nanyang: ri yooboo dabue" nhang:. Mangso wigi nang ri nheig yoo wa khyo" ciwim se' koid la". Nang zei too" da" moo" ri nyang: ri ciwim phyo' pyam nhang: la".
7 Nang khanhoo' yhoebmo, myang nghoid loug we' moo" koem: khanhoo' zei: nghoid loug we' khanhoo' dang: tid nghoid loug we' nang gi Mangsoo ri gyoug phoug" zoo" ri nyid yhi: ca" shi" wa.
8 Asuya wigi myung shoo" mo, ri doin: zeig lho: nyangnu" shid re" tarha" deing byeung" ziyo' nyangnu" yoo" eung: da" akho: akhang" ri abyid: ziri shau" myang ri ayu" moug". Gyizoug: khang" moo" ri nya: dang mo su: wigi goem loem byid: lho: nya: eig yug goin" ri je gyi: da" zoug: wigi goem loem byid: to" ago".
9 Khokham lang" gugzoo shivoo: yham" yo, ri nghe: nyid da:.
10 Nang gi ngei ri jheddab nyid nghoid rigi khanham we' nheig yo" deig wa zi anghoid. Nang gi yoo" zoo: yoo" shug yhoo: ga: myid nghoid rigi nang vho: gu dangain" ri khanham we' yo" yu wa zi anghoid. Houg: zigi akoem: nghoid da:.
11 Nang jonu" je yoo" lang" nang wigi voem: zoo: wa nhoid je myo: re" da:. Nang yo" yu zigi nang yoo" zoo: yoo" shug yug nghoid ein: da" lasi phajhi" za: nghoid da:.
12 Moo" zei: yug gi zoo: wa gi" sho' yo" ri yoo" wa ayo" ri ayoo" wa. Nghoid loug we' nyang: gi nheing: thang myen" ri nyeing" za: shoug" yhoeb yu da:. Nghoid loug we' sung yoo" zoo: yoo" shug su: koem' gi myid myoo: yoomo ayo" yhoeb nghoid da:.
13 He: mougmyid moo ngoo shau" myang: da" gyoug dain pho" zi daja: gi hidsu" nghoid da:. Byu yigi ngei ri nyangnu" yhung: ca" wa ayo, shid re" yung: to" ago".
14 Hau: thang: age da" phaga: ga: jang" moo dangain" soem" pyam wigi nyangnu" da" zooshang: yiri byid: too" khoo' wa ci: we adeing loo goo" nghoid da:.
15 Ngoonu" gi he: mougmyid khyoo: ci: aci: loo: vang re" ziyo' dakhyoo"- thu' lo" da" uri we ci: aci: loo doem thu lo" da:. Ngoonu" khayhi' moo" zei: nghoid loug we' ngoonu" yo' dage" yo" ci: lo" zi ci: ajo,.
16 Hau: zigi ajoo nghoid da:. Ngoonu" re" ziyo' dakyoo" ngoonu" lo" da:. Ngoonu" gi moo" zei: boem- lid ri cang khaid myheig boem. Houg: lho: nyangnu" ci yo" yu la".
17 Ngoonu" apyaid ri moug: coid khoug: moo kougshu: zi myid myo: zi nheig yoo: nheig teig ziyo' noo phyoo" shau" wigi nyid ca" da:.
18 He: ziri ngoo shoug" myang yu byu dayug shid re" ge thang khyoo: yo" koid zigi Mangso wigi nyang: ri byid: to' da" apyaid aleing" kyeing" da" ayo, moo ayo" ziri zo: lho: shug lho: pyoo: pyoo: yo" nyid zigi nghoid abye:. He: zigi byu xangsu: da" vhu" pi: lo, kyo' nghoid da:.
19 Mangso wigi byu dayug ri ngei sheing: yo' jonu" byid: lho: hau: gu: ri pyoo: pyoo: yhung: wa akhang" byid: nghoid rigi nyang: gi jeju" boin: so" lho: nyang: moo" zei: jang" mo yo" ziri pyoo: pyoo: yhung: ge da:. Hau: zigi Mangsoo mo jhungshug nghoid da:.
20 Mangso wigi nyang: ri ngei pyoo: wa akhang" byid: yoomo nyang: gi byu apyaid khayhi' leung" ziri myid wigi gye" myid myoo: wa zi anghoid.