11
1 Re" ngei ri tungbau meing: mo phaga: moo" moo arang" kaid too" we'. Houg: ri hau: gu mo danyid" nyid" ri nang atu" amyaid shoug" zoo: wa.
2 Re" arang" ngei ri joyoo myoo: sho' khyi' khang" moo" moo kaid too" we'. Ciwim gari he: mougmyid dang moo nang joem: lo" khyoo: khasu" thung" shoug" phu" zoo: wa ga: ziri nang khanham ayo" se' too".
3 Seiggam dagam gi khasoid khyoo: leung gyoo" gyoo" nyang: leung lo" jang" moo jo, jo, wa. Jhoemmoug" thei" byeung" jo, lang" moug: voo wa.
4 Nang gi lid yo' ayo, gi ri dalang" nyid nghoid rigi khanham we' ci: yo" shoo" wa zi anghoid. Houg: lho: khanham ce: daja: ri we' yo" yham" wa zi anghoid.
5 Mangsoo gi ja: khang" moo" ri phain" so: phug to" da:. Houg: lho: nang gi zoo: voin gung lid: da" myiyi: dayug da" voem: dau: khoug: moo kangso khasu" bue" shid" lo ziri ase' yhang: ti" Mangso wigi koid da" moo" ri we' nang ase' gyoo: wa.
6 Nab soin: ri we' myen" thang: ri we' shivoo: shigam zhung" nyid ge'. Hau: joem gi dangain" yug gyi: loo wa lug- anghoid lang" dayham" gi gootu: tho' je yug gyi: loo wa lug ga: ziri nang khanham we asi.
7 Nyid" gung ayo, ri yug yo da" bidbang moo pyoo: pyoo: shau" nyid zigi ge da:.
8 Nang dei nyid da" zain nyid khang" mo" shid re" jeju" boin: soo" we'. Nang gi khamyhang nyid myang" loug we' aca". Hau: tho' je myang" sho' nang shid: jo, wa ein: ziri myid boin: we'. Shid khyo myid lang" wa zi ce: daja: we' ajo,.
9 Zoomyi: zooyam yi we"- nanu" da" zoomyi: zooyam akhyeing" ri pyoo: pyoo: nyid we'. Nanu" zooyam nghoid shi" uri ngei pyo: nyid ge'. Nanu" koid nau ziri koid lho: nanu" nheigloem: myid vho: khyo" cang ge'. Nghoid loug we' Mangsoo gi nanu" koid zi ci: nghoid loug we dang: phyed byid: loo wa ziri myid boin: we'.
10 Nanu" gung ri ci: yo' we' myid amyoo: nhang:- noo we' anoo nhang:. Nang gi gye" myang" sho' apyaid nge nyid wa zi anghoid.