6
1 ?Hid: joem gi nanu" ri jhau" byid: wa shid re" nanu" Aseing Mangsoo wigi ngoo ri amyeing" byid: da" tarha" dangain" nghoid da:. Hid: joem ri nanu" vang yhe: wigi seing: yu wa za: danghoid lo: da" mung" moo yhe: tam" gyo: cang yhe: nyid ge'.
2 Nanu" kangso' dei nyid myhang nanu" yo' nanu" amyed ashen yigi nanu" Aseing Mangsoo ri ngi: shab byid: lho: ngoo nanu" ri byid: nyid da" nya: tarha" dangain" ri tam" gyo: cang yhe: nyid ge'. Houg: lang" nanu" gi hau: mung" moo apyaid sheing: sho' dei nyid boem wa.
3 Hau: joem ri tam" gyo: nyid ge'. Israela byumyu" yi we"- Hau: joem ri cang yhe: nyid ge'. Houg: lang" nanu" dangain" nyid gi yab gi loo wa. Ngoonu" phoug" phyid" da" Aseing Mangsoo dangsoo" byid: too" bye: ziyo' dakhyo" nanu" gi byumyu" zeing bue" lo lho: hau: mougmyid nu" da" mung" moo shoug" nyid boem wa.
4 Israela byumyu" yi we"- he: ziri boin: so" nyid ge'. Aseing za: nyha" Mangsoo nghoid.
5 Nanu" Aseing Mangsoo ri nanu" emyed nheigloem: dangain" yo' nanu" ung: khau: soozoo: dangain" yo' nanu" yoem: so' dangain" yo' jheddab nyid ge'.
6 Ngoo nanu" ri akhid" nyid" byid: nyid da" he: amyeing" dang: joem ri khanham we' ato" myhed goo".
7 Nanu" zoo: yiri hid: joem ri jhau" byid: ge'. Nanu" yhoem: moo we' nanu" gyung: khyoo: moo we' nanu" theing: nyid uri we' nanu" moo" zei: nyid uri we' hau: joem ri pug loo: pug jhau" byid: nyid ge'.
8 Hau: joem ri nanu" lo, joem moo tei" tab ci: ge'. Hau: joem ri boin: nhang: da" zi khyo" nanu" ngilang: moo tab ci: ge'.
9 Hau: joem ri nanu" da" yhoem: khoem" bung yo' khyam: khoem" atho' moo lhid" too" ge'.
10 ?Nanu" da" Aseing Mangsoo nanu" phoug" phyid" yi nghoid da" Abraham- Isag yo' Yaku bang: ri dangsoo" byid: to" ziyo' dakhyo" nyang: gi nanu" ade: to" da" gyi: wigi ziyoo bo da" voomoo" joem yo' dage" mungdain: ri byid: wa zi nghoid.
11 Yhoem: joem gi nanu" ayung: to" da" jonu" gi joem yo' byeung" shoin: loo" wa. Houg: moo nanu" adu: da" gyid thung" joem jo, wa. Nanu" asho" da" zabyid khyam: yo' zhainloin: khyam: joem: jo, wa. Aseing gi nanu" ri hau: mung" khyoo: shu" vang yhe: wigi nanu" vho: ja: dangain" nanu" shoug" zoo: lang"
12 nanu" join bue" nyid lo da" Egutu mung" mo nanu" ri khyoid yu da" Aseing ri ato" myhed wa shid re" lhid' nyid ge'.
13 Nanu" Aseing Mangsoo ri gyoug phau" myang: lho: ngi: shab nyid ge'. Nyang: ri kyeing" noku ge'. Nya: myeing ri kyeing" lang: wigi dangsoo" koid ge'.
14 Gootu: yu phara" joem ri a no' goo". Nanu" aqei: ayam moo nyid da" byumyu" yi yu phara" joem ri we' ano' goo".
15 Nanu" gootu: yu phara" ri no' nghoid rigi Aseing da" nheig yo: zigi nanu" ti thougtheung wa shid re" myi: yhang: ti" ri" wa nghoid lho: nanu" ri bain sho' said toem" pyam wa nghoid. Ciwim gari nanu" yo' dage" nyid da" nanu" Aseing Mangsoo gi nyang: ri: mi shi' bang: ri ayo" zeing: kham: nghoid da:.
16 Nanu" Masa joyoo moo koid bye: ziyo' dakhyo" nanu" Aseing Mangsoo ri ajham" yu" goo".
17 Nyang: nanu" ri byid: to" da" tarha" dangain" ziri tam" gyo: cang yhi: wa shid re" boin: nyid ge'.
18 Aseing tid da" jo ziyo' ge ziri koid nyid ge'. Nanu" dangain" nyid gi yab ge lo boem wa. Nanu" da" phoug" phyid" yiri Aseing dangsoo" byid: to" da" mougmyid nu" da" mung" ri nanu" shoug" seing: yu wa zi nghoid.
19 Nyang: dangsoo" byid: to" ziyo' dakhyo" nanu" gi nanu" da" gyivoo yiri yo" khaid thu pyam wa zi nghoid.
20 Thang: phyang" nanu" zoo: yigi nanu" ri ?Ngoonu" Aseing Mangsoo gi he: tarha" dangain" ri tam" gyo: nyid wa shid re" ciwim yoomo ngoonu" ri amyeing" byid: to" la"? ga: myid: wa zi nghoid.
21 Houg: lang" nyangnu" ri Ngoonu" gi ?Egutu khokham da" join yi bue" bye: wigi Aseing gi ngoonu" ri nya: yoem: so' moo" yo' khyoid yu bye:.
22 Egutu byu yiri we' nyangnu" khokham ri we' nya: da" gyizoug: yiri we' mau" pho" moo" alhoo: again yo' gyoug dain ja: moo" koid shug ziri ngoonu" da" myojid" yo' nyang: myang: lo boem bye:.
23 Nyang: gi nyang: koid wa ga: nyha" phoug" phyid" yiri dang: soo" byid: to" ziyo' dayhang: ti" ngoonu" ri hid: khyoo: shu" lo lho: he: mungdain: ri byid: wa shid re" nyang: ngoonu" ri Egutu mo loid byoin loo nhang: bye:.
24 Hau: thang: ngoonu" Aseing Mangsoo gi he: tarha" dangain" ziri tam" gyo: wa shid re" yo' nyang: ri ngi: shab byid: wa shid re" ngoonu" ri amyeing" byid: too" bye:. Ngoonu" cang koid nghoid rigi nyang: gi ngoonu" byumyu" yiri khanham we' lhoug zung" byid: lho: nyid gi yab ge nhang: wa zi nghoid.
25 Ngoonu" gi Mangso wigi ngoonu" ri amyeing" byid: to" zi ja: khang" moo" ri jhug zug za: tam" gyo: nyid nghoid rigi nyang: ngoonu" ri vho: ngei loo wa zi nghoid? ein: tid kyoo" we'.