33
He: zigi Mangso da" byu Moshe- nyang: ashid: shi" ri Israela byumyu" yiri tid da" mainkaid dang: joem nghoid.
 
Aseing gi Sina boem mo gyoo" loo bye:.
Nyang: gi Edom atho' moo bid yhang: ti" thu wigi
Nya: byumyu" yi atho' moo Paran boem mo zhoo: byid: da:.
Moug: lagyoo: damoin gi nyang: yo' dage" nghoid nyid.
Nya: lo, yo lo, moo nge" nyid da" myiyham: bo da:.
Aseing gi nya: byumyu" yiri jheddab wigi
nyang: wigi seing: da" bang: ri goem loem byid: nyid.
Houg: yoomo ngoonu" gi nya: khyid: yang: moo goeb pid wigi
nya: amyeing" dang: joem ri tam" gyo: cang yhe: nyid boem.
Ngoonu" ri Moshe byid: to" da" tarha" ri ngoonu" tam" gyo: cang yhe: nyid.
Hau zigi ngoonu" byumyu" da" phoug" thang da" jonu" nghoid da:.
Aseing ri nya: da" byumyu" kung: yi yo' vhujhung: yi dage" zeing: foem: to" uri
Nyang: gi nya: Israela byumyu" yi da" khokham bue" loo bye:.
 
Moshe gi Ruben kung: yo' sen: wigi tid zigi
?Ruben gi byu amyoo: nghoid loug we' khanham we' ashid: doem: goo" baja"? ga: zi nghoid.
 
Nyang: gi Yuda kung: yo' sen: wigi tid zigi
?Aseing we"- bo pang" wa shid re" nyangnu" yoid mho' nyid ziri tam" gyo: byid: la o".
Nyangnu" ri gootu: kung: bang: yo' doem zheing" foem: byid: we'.
Aseing we" nyangnu" shid re" zain: byid: we'.
Houg: lho: nyangnu" da" gyivoo joem ri thougtheung wa shid re" nyangnu" ri bo pang" we'? ga: zi nghoid.
 
Nyang: gi Levi kung: yo' sen: wigi
?Nang- Aseing we"- re" myid vho: khyoo: ri Urim yo' Thumin khyo" jhug zug da" re" dei zoo:
Levi yi khyo" ci: shug byid: we'.
Nang gi nyangnu" ri Masa moo jham" ca: yu" abye:
houg: lho: Meriba joyoo mo gyid moo nyangnu" yo' gyi koid goo" bye:.
Nyangnu" gi nang ri myhi' phoo yi mang: nhung" yi yo' zoo: yi tho'
je wigi dang: zung" khyoo: ri ci: shug byid: ago".
Nyangnu" gi re" amyeing" dang: joem ri tam" gyo: ago"
Houg: lho: re" dang: theing ri jhug zug nyid ago".
10 Nyangnu" gi re" tarha" ri tam" gyoo: wa shid re" re" byumyu" yiri jhau" byid: loo goo" wa.
Nyangnu" gi re" phoin: moo xoin" to' byid: loo goo" wa.
 
11 Aseing we"- nyangnu" byumyu" kung: yi yoem: bo loo wa shid re" pang" thoug byid: we'.
Nyangnu" koid da" moo" joem moo vho: ngei byid: we'.
Nyangnu" gyivoo dangain" ri mhoin' pyam byid: we'.
Nyangnu" ri khanham we' adoem to' loo nhang: loo? ga: zi nghoid.
 
12 Nyang: gi Benyamin kung: yo' sen: wigi tid zigi
?He: byumyu" kung: gi Aseing jheddab wigi goem loem byid: da" akung: nghoid da:.
Nyang: gi nyangnu" ri nyid" khang" nyid" lhoug zung" nyid.
Houg: lho: nyang: gi nyangnu" phung: moo bo nyid nyid da? ga: zi nghoid.
 
13 Nyang: gi Yoseb kung: yo' sen: wigi tid zigi
?Aseing gi nyangnu" da" mung" ri moug: vo khyo" wigi we'
houg: lho: myid khoug: mo gyid khyo" we' mainkaid byid: baja".
14 Nyangnu" da" mung" gi bid wigi lhab' myheing da" shi" khyo" mainkaid byid: baja".
Lhammoo" khyab khang" moo" moo ge thang da" shi" myoo" sho' zei: baja".
15 Goonham' mo jo, da" nyangnu" da" bouggung joem moo ge thang da" shi" joem yo' byeung" baja".
16 Nyangnu" da" mung" moo ge zi dangain" byeung" jo, baja".
Myi: nge" nyid da" mhain" pung mo dang: ji thu kaid da" Aseing da" ge thang ziyo' mainkaid byid: baja".
Yoseb kung: moo hau: mainkaid jeju" loo baja"
Ciwim gari nyang: gi nya: mang: nhung" yi phung: moo vhujhung: nghoid da:.
17 Yoseb gi nuloo: dadu: yhi' yoem: bo da:.
Nyang: moo nulam" yhang: ti" khyau: joem yug da:.
Nya: khyau: joem gi Manashe da" khyeing" khyeing" yo'
Ephrim da" moin moin nghoid da:.
Nyang: gi hau: khyau: joem yo' byumyu" yiri thung" ceig pyam da:.
Houg: lho: nyangnu" ri mougmyid thang sho' khaid jhen" pyam da? ga: zi nghoid.
 
18 Nyang: gi Zebulun kung: yo' Ishakha kung: yo' sen: wigi
?Zebulun gi panglai: mo nyangnu" da" phaga moo" moo: myo: loo je: loo goo" baja".
Ishakha gi yhoem: khoug: moo jonu" myo: lug je: be: loo baja".
19 Nya: tang: gi tungbau byu yiri nya: tang: da" boem moo khe: yu wigi
Houg: moo deingmain" da" xoin" joem shugbyid: ago".
Nya: tang: gi nya: tang: da" jonu" ri panglai: yo'
panglai: thoem" yam moo jo, da" midcoo: mo shoug" yu ago"? ga: zi nghoid.
 
20 Nyang: gi Gad kung: yo' sen: wigi
?Nyangnu" da" mougmyid ri gyi: loo nhang: da" Mangsoo ri coung" ge'.
Gad gi lo, sain: anghoid lang" vhu" gyab ri ngaid ceig zoo: wa lang" nyid da" khangkhyi yo' du da:.
21 Nyangnu" gi nyangnu" shid re" ge thang da" mung" ri yu ago".
Nyangnu" ri vhujhung: dayug da" gamboem ri gam byid: bye:.
Israela vhujhung: yi yo' dage" za: phung: foem: nyid uri
Nyangnu" gi Aseing da" amyeing" dang: joem yo' tarha" joem ri tam" gyo: abye: go".
 
22 Nyang: gi Dan akung: yo' sen wigi
?Dan gi khangkhyi bam: nghoid da:.
Nyang: gi Bashan mo byam thu lo" da? ga: zi nghoid.
 
23 Nyang: gi Naphtali akung: yo' sen: wigi
?Naphtali gi Aseing da" ge da" jeju" yoomo myoo" sho' mainkaid byid: zi shau" da:.
Nyangnu" mung" gi Galile thoem" mo zi mougpyi: shoid ju" sho' nghoid da? ga: zi nghoid.
 
24 Nyang: gi Ashera kung: yo' sen: wigi
?Ashera gi gootu: kung: bang: tho' je" wigi mainkaid jeju" shoug" wa.
Nyang: gi nya: mang: nhung" yi da" vho: ngei thang su: bui" baja".
Houg: lho: nya: mougmyid gi zhainloin: gam myoo" sho' yug jo, baja".
25 Nya: da" voogung joem gi joto' khoem" moo" joem yo' goem loem byid: too" goo" baja"
Houg: lho: nyang: gi khanham we' goem loem tung" yo" nyid baja"? ga: zi nghoid.
 
26 Israela byumyu" yi we" nanu" da" Mangsoo yo' du da" yu phara" anyid.
Nyang: gi mougkhung: byeung" sho' da" younglho' gyi: sheung: jang" mo zhung: lid lo" da:.
Nanu" ri pang" thoug yu wa shid re" jhoemmoug" thei" moo zhung: wigi re" da:.
27 Mangsoo gi khanham we' nanu" ri gyi khouggoo koid byid: su: nghoid.
Nya: da" apyaid atoo: lo, sain: gi nanu" da" pang" thoug joyoo nghoid da:.
Nanu" jhen" do, lo nyid uri nyang: gi nanu" da" gyivoo yiri khaid thu pyam byid: wigi
nyangnu" dangain" ri phyo' shoin' pyam wa shid re" nanu" ri tid abye:.
28 Houg: yoomo Yaku amyed ashen yigi mougkhung: mo nghain: wigi myidjang ri jhu' nhang: da" joyoo
Shivoo: yo' zabyid yhid: byeung" da" mougmyid moo goem loem za: yug yoo tung" nyid boem ago".
29 Israela we"- nanu" gi khayhi' pyo: nyid la".
Aseing wigi khyoid yu shau" da" nanu" yhang: ti" byumyu" anyid goo" nghoid da:.
Aseing nyang: nyang: nanu" ri gyi khouggoo koid byid: wigi oung: doid nhang: wa shid re"
nanu" da" goo yo' shamcoin" bui" byid: nyid da:.
Nanu" gyivoo joem gi nheig khyeug yu wa shid re" nanu" jhang re" mho' yoid loo goo" wa.
Houg: lho: nanu" gi nyangnu" ri yo" nang: pye" pyam wa zi nghoid.