22
?Nang gi Israela mang: nhung" dayug da" nu: anghoid lang" yang so" lam" yen" ziri shau" myang ri agoin: ayu" lhid: kaid. Nya: jang" khyoo: doem koin" loo" byid: we'. Nghoid loug we' gougnyhoug seing: gi gye ve jang" moo nyid anghoid lang" hau: gougnyhoug ri hang" seing: ziri nang ase' nghoid rigi re" yhoem: khyoo: koin" loo" we'. Hau: gougnyhoug yhoem: seing: sho: re" ri hau: zi nyang: ri byid: we'. Loo zei: nghoid nghoid byimi dakhyab nghoid nghoid gootu: cinghoid loug we' re" Israela mang: nhung" dayug yug ci: phyug pyam ziri we' houg: yo' dakhyo" koid we'.
?Israela mang: nhung" dayug yug da" loo zei: anghoid lang" nu: dadu: leung jo, nghoid ri asi' goin koid wigi ayu" lhid: too" khoo' goo". Hau: gougnyhoug khyoo: doem yo" soo" sho' nyang: ri bo pang" thoug we'. ?Myiyi: yigi yuggi yi byimi age void. Yuggi yigi myiyi: yi byimi age void. Hougsu" koid bang: ri nanu" Aseing Mangsoo ngheing" nyid da:.
?Seiggam moo anghoid lang" myidgung moo ngho' zeing gi ngho' u joem adang moo vhoeb nyid zi anghoid lang" ngho' nu" bo ngho' soid ri nang yhe: myang nghoid ri ngho' zeing ri age yu pyam. Nanu" gi ngho' nu" joem ri yo" shoem" yu da:. Nghoid loug we' ngho' zeing ri nhang: kaid ca" da:. Houg: lang" nanu" kangso' sheing: wigi nyid gi yab ge yhe: loo" wa.
?Nang yhoem: seig zhug uri yhoemkhung: dang gainbyam: lheing khab moo akhoem' lo, zei: tab wa shid re" boin: we'. Houg: lang" byu dayug yug byed gyo" shid: da" yooboo nang moo ajo, wa.
?Nanu" da" zabyid khyam: moo gootu: shivoo: ri zabyid yo' dage" age shoo" wa. Hougsu" sho" nghoid rigi zabyid ri nghoid nghoid gootu: shivoo: mo ashi" ri nghoid nghoid azoo: wa shid re" toem' pyam zi shoug" wa. 10 Nu: yo' loo zei: ri dage" zoem" tei" yoothung" age phug. 11 Yang moug" yo' zin: yung" khyeing: ri lheig lho: yo, to" da" byimi ri age void. 12 Re" byimi myid: khyoug: goin" jang" moo bain: byoug khyoeb tab too" we'.
13 Byu dayug gi myiyi: dayug ri lo, xo' yu thang: ri nyang: ri avhoo: loo: ga: doem myid phyed pyam ein: shang 14 Hougsu" yoomo nyang: gi hau: myiyi: ri nyang: lo, xo' yu uri zoomyi: gyeing" anghoid nhung: ga: tid wigi shoid da" khyo" yooboo zhug da:.
15 ?Hid: yhang: te" zi bue" thu lo nghoid rigi myiyi: nu" da" nya: myhi' phoo gi nyang: zoomyi: gyeing" nghoid da" asoo" khyo" suid" dab da" lo, xo' phyang" myhu" ri yu re" wigi tarha" yung" moo voogung vhujhung: yiri ci: shug ca" da:. 16 Myiyi: nu" da" nya: phoo gi nyangnu" ri ?Ngoo gi nga" myiyi: zoo: ri he: yuggi pho jhang tho' zo: kaid bye: nghoid loug akhid" nyang: avhoo: loo: nghoid da:. 17 Myiyi: nu" ri nyang: lo, xo' yu da" uri zoomyi: gyeing" anghoid loo: nhung: ga: tid nyid wigi shoid da" khyo" yooboo zhug da:. Nghoid loug we' nga" myiyi: nu" zoomyi: gyeing" nghoid da" sagse: hid: moo: jo, da:. Suid" dab da" lo, xo' phyang" myhu" ri yu" yu" ge'? ga: tid ca" da:. 18 Hau: thang: voogung vhujhung: ludaid yigi hau: yhoem: seing: phoo ri khe: yu wigi baid ca" zi nghoid. 19 Nyangnu" gi nyang: ri ngei dashoo: pyi" ri we' khyoug" nhang: lho: hau: ngei ri myiyi: nu" da" nya: phoo ri byid: ca" da:. Ciwim gari hau: yug gi Israela myiyi: nu" dayug ri sho' phu" nhang: abye:. Hau tho' agoo" hau: myiyi: myhi' gi nya: myi: doem xo' koid wa zi nghoid. Houg: lho: nya: pyaid thang sho' hau: myiyi: ri age kang" pyam nghoid da:.
20 ?Nghoid loug we' yooboo zhug zi jo wigi hau: myiyi: nu" zoomyi: gyeing" nghoid ziri sagse: ajo, nghoid rigi 21 Nyangnu" gi myiyi: nu" ri nya: pho da" vang khyam: khoem" khyoo: shu" yhe: wigi nya: voogung mo yuggi yi wigi hougmoo nyang: ri lug boem yo' coem' du" said ca" da:. Nyang: gi nya: pho yhoem: moo nyid shi" uri yhoem: ayoo" shi" ri gung shoo" zoem" pyam khyo" ngoonu" da" byumyu" phung: khoug: moo sho' phu" moo" zoo" koid abye:. Hid: su" khyo" wigi nanu" gi he: akhyeing" ashoeb moo" ri yu pyam ca" da:.
22 ?Yuggi dayug gi gootu: yuggi dayug da" yhoem: seing: myhi' yo' gung shoo" zoem" go" nyid ziri zang" myang nghoid rigi nya: eig yug goin" ziri said pyam ca" da:. Hid: su" khyo" wigi nanu" gi he: akhyeing" ashoeb moo" ri yu pyam ca" da:.
23 ?Yuggi dayug gi gootu: dayug yug wigi mho' too" bye: da" myiyi: nu" dayug yo' voogung daloem: moo gung shoo" zoem" nyid uri zang" myang ein: shang. 24 Nanu" gi nya: tang: ri voogung nghe: shoid khyoo: shu" thu lo" wigi nya: tang: ri lug boem yo' du" said ca" da:. Myiyi: nu" we' shid: ca" da:. Ciwim gari nyang: gi voogung moo nyid nyid wigi nyang: yoid nyhoo: kaid ri yo" shau" gyo: nghoid loug we' bo pang" yu wa shid re" ayoid nyho: nghoid da:. Houg: lho: yuggi pho we' shid: ca" da:. Ciwim gari subi" mho' too" bye: da" myiyi: nu" yo' gung shoo" zoem" yoomo nghoid da:. Hid: su" khyo" wigi nanu" gi he: akhyeing" ashoeb moo" ri yu pyam ca" da:.
25 ?Yuggi dayug gi gootu: dayug yug mho' too" bye: da" myiyi: nu" ri siyoo moo gung shoo" zeig zoem" pyam ein: shang- houg: lang" yuggi yug ri khyeing" dage said pyam da:. 26 Myiyi: nu" ri ciwe' age koid wa zi nghoid da:. Ciwim gari nyang: gi shid: moin: da" yooboo ci: ashoid nghoid da:. He: yau: sho: moo" gi byu dayug yug gootu: dayug ri khaid zain: wigi said pyam uri yo' dayhang: ti" nghoid da:. 27 Yuggi dayug gi gootu: dayug wigi mho' too" bye: da" myiyi: nu" ri siyoo moo gung shoo" zeig zoem" yoomo pang" yu wa shid re" myiyi: nu" yoid nyho: nghoid loug we' nyang: ri pang" yu wa hang" anyid nghoid da:.
28 ?Yuggi dayug gi hang" amho' too" shi" da" myiyi: nu" dayug ri gung shoo" zeig zoem" nyid uri zang" myang ein: shang 29 Nyang: gi myiyi: nu" da" nya: phoo ri myhi seig phoug" ngei wim: xi: khyoug" wigi hau: myiyi: nu" gi nya: yhoem: seing: myhi' bui" ca" da:. Ciwim gari nyang: gi hau: myiyi: nu" ri nyang: yo' gung shoo" zoem" wa shid re" agyoo: ayoid zoem" abye:. Nyang: gi nya: pyaid thang sho' hau: myiyi: nu" ri age kang" pyam nghoid da:.
30 ?Yuggi hang" nghoid loug we' nya: pho da" yhoem: seing: myhi' dayug yug yo' gung shoo" zoem" wigi nya: phoo ri sho' age phu" nhang: nghoid da:.