20
?Nanu" gi nanu" da" gyivoo ri zain: wa shid re" to' yhe: lo" ziyo' nanu" tho' je myo: da" myang: rheing" joem myang: joem yo' gyidab joem ri myang lang" nyangnu" ri agyug goo". Nanu" ri Egutu mo khyoid yu da" nanu" Aseing Mangsoo gi nanu" yo' dage" nghoid nyid wa. Nanu" gyi akhaid shid" shi" ri khainjung dayug shid khyoo: thu re" wigi gyidab ri ?Israela byu yi we" tam" gyoo: ge'. Akhid" nyid" nanu" gyi khaid yhi: wa nghoid nanu" da" gyivoo yiri agyug goo" yoem: ashoin: goo". Seing" we' anain" goo". Nanu" Aseing Mangsoo gi nanu" yo' dage" yhe: lo" wigi nyang: gi nanu" ri oung: doid nhang: wa? ga: tid ca" da:.
?Hau: thang: gyizoug: yigi gyizoo: yiri mungdang: khyo" tid wa zigi ?Amyang" shi" ri yhoem: koid wigi yhoem: avang kho' shi" zi hid: moo dayug yug bo ga" la". Bo nghoid rigi nyang: yhoem: khyoo: doem loo" baja". Hougsu" anghoid rigi nyang: gi meing: zain: jang: moo said pyam zi shau" wigi gootu: dayug yug nya: yhoem: ri yhoem: seig vang pyam wa. Zabyid khyam sho" to" wigi ayo" phyo' yu shi" da" byu dayug yug hid: moo boo go" la". Bo nghoid rigi nyang: yhoem: khyoo: doem loo" baja". Hougsu" anghoid rigi nyang: gi meing: zain: jang: moo said pyam shoug" lang" gootu: dayug yug zabyid phyo' zo: pyam byid: wa. Lo, xo' wa shid re" myi: mho' to" zi dayug yug hid: moo boo go" la". Bo nghoid rigi nyang: yhoem: khyoo: doem loo" baja". Hougsu" anghoid lang" nyang: gi meing: zain: jang: moo said pyam shoug" lang" gootu: dayug gi nyang: mho' to" da" myiyi: ri lo, xo' yu pyam byid: wa? ga: wa zi nghoid.
?Gyizoug: yigi yug gi yiri ?Hid: moo seing" ayang" zi dayug yug boo go" la". Bo nghoid rigi nyang: yhoem: khyoo: doem loo" baja" hougsu" anghoid rigi nyang: gi gootu: gyi yiri yoem: shoin: nhang: pyam wa? ein: we' tid wa zi nghoid. Gyizoug: yigi nyangnu" gyizoo: yiri dang: bain tid lang" phung: nge khang" moo" shid re" vhujhung: yi khyen: too" ca" da:.
10 ?Nanu" gi voomoo" daloem: ri yhe: khaid zain: uri xang: shi" hau: voo byu yiri lo, tu: asoem" byid: wa akhang" shi" byid: ge'. 11 Nyangnu" khoem" moo" duang: phang wigi lo, tu: asoem' byid: nghoid rigi nyangnu" dangain" gi nanu" da" join bui" wigi nanu" shid re" moo" zei: byid: ca" goo" wa. 12 Nghoid loug we' hau: voomoo" mo byu yi lo, tu: wigi asoem" abyid: loo: meing: zain: wa khyen: yu boem nghoid rigi hau: voomoo" ri nanu" gyidab yo' lheing khab vang: lheing too" wa zi nghoid. 13 Hau: thang: nanu" Aseing Mangsoo wigi nanu" ri hau: voomoo" ri oung: yu nhang: lang" hau: akhoug: mo yuggi khang" moo" ri said pyam ge'. 14 Nghoid loug we' myiyi: yi zooshang: yi gougnyhoug yo' voomoo" khoug: mo gootu: cinghoid nghoid nanu" nya: shid re" seing: yu ge'. Nanu" da" gyivoo yi seing: zi ciri nghoid loug we' nanu" yo" yhung: boem. Aseing gi nanu" ri hau: ziri byid: bye:. 15 Hau: zigi nanu" yhe: nyid seing: yu wa mung" yo' gye" ve: jang" moo: jo, da" voomoo" joem ri koid wa khyoo: nghoid da:.
16 ?Nghoid loug we' nanu" Aseing Mangsoo wigi nanu" ri byid: to" da" mougmyid ri shoug" seing: yu lang" yugkhang" moo" ri said pyam ge'. 17 Nanu" ri Aseing koid nhang: ziyo' dayhang: ti" Hiti- Amori- Khanan- Perizi- Hivi- yo' Yebusi- dangain" ri jhoid za: said toem" pyam ge'. 18 Nyangnu" gi nyangnu" yu phara" joem ri noku da" uri koid da" aco' ajhoid zi nanu" ri jhau" byid: khyo" Aseing ri yooboo ashoid athougtheung nhang: wa sho' nyangnu" ri said pyam ge'. 19 Nanu" gi voomoo" daloem: ri seing: yu wa soin' ri vang: lheing lho: lhoem: nyid da" ayo, myang" nghoid loug houg: moo yug da" shigam joem ri athug pyam goo". Ashi" zoo: ge'. Nghoid loug we' agam joem ri asaid pyam goo". Seiggam joem gi nanu" gyivoo joem anghoid. 20 Gootu: seiggam joem koem' gi nanu" thug yu wigi hau: voomoo" ri yo" seing: yu da" ayo, ju" sho' voomoo" ri lheing khoem to" da" gyilhoem: gadug joem moo yo" ci: da:.