18
1 ?Khainjung kung: nghoid da" Levi byu yigi Israela mung" mo mougmyid gamboem ayo" yu goo" wa. Hau: gungthid nyangnu" gi Aseing ri byid: da" jhungshug alu: yo' gootu: xoin" joem wigi kangso' dei nyid boem ca" ago".
2 Nyangnu" gi gootu: kung: bang: yhang: ti" mougmyid age seing: nghoid da:. Nyangnu" da" gamboem gi Aseing wigi dangsoo" byid: to" bye: ziyo' dakhyoo" ti" Aseing da" khainjung aya: ri goo" ki" lid yo" bui" bye: zi nghoid da:.
3 Nu: anghoid lang" yang xoin" to' khang" moo" khainjung yiri lo, sain:- amcam" yo' vhuphei" thung: byid: ca".
4 Nyangnu" gi xang: shi" yo" da" shivoo:- zabyid yhid:- zhainloin: xu: yo' yang moug" joem gamboem yo" yu ca" ago".
5 Aseing gi nanu" akung: dangain" mo Levi kung: ri apyaid atoo: khainjung yi khyo" nyang: ri noku dei byid: wa shid re" khyen: yu bye:.
6 Levi kung: mo nau yug hang" nghoid loug we' Israela mung" goin" nyang: nya: voogung mo zi daloem: kyeing" da" noku joyoo khyoo: re" wigi
7 hau: joyoo moo gootu: Levi yi dei byid: yhang: ti" nya: Aseing Mangsoo ri khainjung dayug khyo" dei byid: baja".
8 Nyang: gi gootu: khainjung yi yo' dakhyo" zoo: shug dayi" yi" yoo" ca" da:. Houg: lho: nyang: gi nya: yhoem: byu yi foin: byid: da" zi ci: nghoid loug ge zoem: ci: da:.
9 Nanu" da" Aseing Mangsoo wigi nanu" ri byid: wa mung" khyoo: nanu" vang yhe: da" uri houg: mo byumyu" yi da" aco' ajhoid thung" ri: thang: khyoo: acang goo".
10 Nanu" nya: zoo: yiri phoin: tho' moo anghe' ngei" goo". Houg: lho: nanu" da" byumyu" yiri boid aphyed nhang: goo". Gyo, joo: ayu" goo". Maindain afa" nhang: goo".
11 Maindain khain" pha' aci: goo". Shid: bye: bang: da" soobyoo ri amyed: nhang: goo".
12 Nanu" Aseing Mangsoo gi hid: yhang: te" aco' ajhoid moo" ri koid mo, ri ngheing" da:. Houg: yoomo nanu" ju" lo" da" hau: mung" mo byumyu" yiri khaid thu pyam nyid zi nghoid.
13 Aseing ri bain sho' jhug zug nyid ge'.
14 Hau: thang: Moshe gi ?Nanu" yhe: seing: yu wa zi za: danghoid lo: da" mung" mo byu yigi boid phyed bang: da" phajhi" byid: khyoo: ri cang wigi boid phyed- gyo, joo: yu" ago". Nghoid loug we' nanu" Aseing Mangsoo gi nanu" ri hau: ziri koid wa shid re" akhang" abyid: nghoid da:.
15 Hau: gungthid nyang: gi ngoo yhang: te" lapi: dayug ri nanu" nya: byu yi mo nhang: kaid byid: loo wa. Houg: lho: nanu" gi nya: dang: tam" gyoo: byid: ca" wa.
16 Nanu" ri Sina boem moo khe: foem: to" da" bidnyid moo nanu" gi shid: wa gyoug boem yoomo Aseing dang: doem tid ziri ashau" gyoo: nhang: loo: nya: shidkhoin" moo dab da" myi: ri azang" myang nhang: wa shid re" mho' yoid ago".
17 Houg: yoomo Aseing ngoo ri ?Nyangnu" ngoo ri phajhi" bo khyo" mho' yoid ago".
18 Ngoo gi nang yhang: te" da" lapi: dayug ri nyangnu" nya: byumyu" yi khoug: mo nyangnu" jhang nhang: kaid byid: wa. Ngoo gi nyang: ri citid wa ein: ziri tid kyo" wigi nyang: gi ngoo amyeing" byid: zi ja: khang" moo" byumyu" yiri xo tid kyo" loo wa.
19 Nyang: gi nga" myeing khyo" dang: tid wigi nya: dang: tam" gyoo: wa ziri he: pyam su: hang" ri we' ngoo yooboo dam byid: wa zi nghoid.
20 Nghoid loug we' lapi: dayug yug gi nga" myeing khyo" ngo wigi tid wa amyeing" abyid: ziri voem" koid nghoid rigi nyang: gi hau: shid re" shid: ca" wa. Houg: lho: gootu: yu phara" joem da" myeing khyo" tid da" lapi: hang" nghoid loug we' houg: yo' dakhyoo" ti" shid: ca" wa zi nghoid? ga: tid.
21 ?Nanu" gi Lapi: dayug da" mungdang: gi Aseing jang" mo are" ziri khasu" yo" tid wa la" ga: myid re" boem goo" wa.
22 Lapi: dayug gi Aseing da" myeing khyo" tid kaid wigi nyang: tid zi ajo lo nghoid rigi hau: zigi Aseing da" mungdang: anghoid wa. Hau: lapi: gi nya: amyeing" akhang" khyo" tid thu kaid zi nghoid da:. Houg: lho: nanu" gi nyang: ri agyug ca" nghoid da:.