13
Lapi: anghoid lang" yhoeb mo, dang: kang: phoid: yug dayug gi Shid phyang" nanu" ano yu" da" yu phara" joem ri no' wa yo' dei byid: wa shid re" mau" pho" alhoo: again yo' mau" phoo" moo" zoo" bui" wa dangsoo" yo" byid: ri byid: wa. Nyang: dangsoo" byid: to" zi jo, loo wa nghoid loug we' Nyang: ri dajhi' we' atam" gyoo: goo". Nanu" Aseing Mangsoo gi nanu" Aseing ri nanu" oung: khoug: nheigloem: dangain" yo' jheddab la' ga: ziri si' wa shid re" nanu" ri jham" ca: yu" wa ga: nyang: ri ci: nyid zi nghoid. Aseing thang: cang wigi nyang: ri ngi: shab we'. Nya: dang: ri tam" gyo: cang yhe: wigi nya: amyeing" dang: ri cang nyid ge'. Nyang: ri no' wigi nyang: ri jhug zug ge'. Nghoid loug we' nanu" join bue" nyid da" Egutu mung" mo nanu" ri khyoid yu da" su: Aseing ri yooboo foin: thougtheung gyi koid wa tid da" yhoebmo, dang: kang: phoid: su: yo' lapi: hang" nghoid loug we' said pyam ge'. Houg: te" da" yug gi akhyeing" ziyo' nanu" dei nyid wa Aseing amyeing" byid: to" da" kangso' khyoo: moo nanu" ri khyoo: shu" vhang: wa shid re" soin' nyid su: nghoid. Nang nya: gung mo he: akyeing" da" ziri yu pyam wa shid re" nyang: ri said pyam we'.
Re" mang: nhung" re" yuggi zoo: re" myiyi: zoo: re" jheddab da" yhoem: seing: myhi' nang yo' tab thang da" byencang" dayug yug lang" gi re" phoug" phyid" yi khanham we' ano' yu" da" yu phara" joem ri no' wa shid re" asoo" nung ri nang ri yoem: ge byid: da:. Houg: moo dayug yug gi nang yo' jhang da" byumyu" yi da" yu phara" joem anghoid lang" vi: moo nyid bang: da" yu phara" joem ri noku wa shid re" nang ri yoem: ge byid: da:. Nghoid loug we' nang ri atid ngeig oung: yu nhang:. Nyangnu" dang: ri gyoo: lang" pashau" tam" gyoo:. Nyangnu" ri nheig khyeug shoomyen: ziri aci: shug. Nyangnu" ri akhoem' byid:. Nyangnu" ri said pyam we'. Nang lug boem yo' xang: shi" nyangnu" ri du" we'. Hau: thang: gootu: yugkhang" moo" ri we' lug boem yo' du" nhang: we'. 10 Shid: sho' du" ge'. Nyangnu" gi nang ri join bue" nyid da" Egutu mung" mo khyoid yu da" su: nghoid da" nanu" Aseing Mangsoo mo khyoo: shu" vhang: loo" wa soin' nyid da:. 11 Hau: thang: he: khyoo: ri Israela byu dangain" gi shau" gyo: wigi gyoug loo goo" wa. Houg: lang" houg: te" da" akhyeing" moo" ri hang" we' adoem koid loo wa.
12 Re" Aseing Mangsoo wigi nang ri byid: da" voo joem moo nang nyid nyid uri 13 Nanu" byumyu" yi mo aphoug" adab da" byu yi dayham" gi nang shid phyang" ano' yu" da" yu phara" joem ri no' wa shid re" nyangnu" da" voobyu yiri khyoo: shu" vhang: loo" bye: da" lu dang: ri nang shoug" gyoo: wa. 14 Nang houg: te" da" lu dang: lam" ri shau" gyo: nghoid rigi hau: ziri nyeing" za: sho: myid: gyo: yu we'. He: akhyeing" da" khyoo: bue" zi joo bye: nghoid rigi 15 hau: voo mo byu yi dangain" bang: ri said pyam we'. Nyangnu" gougnyhoug joem dangain" ri we' said pyam we'. Hau: voo ri jhoid za: phyo' pyam we'. 16 Hau: voo moo nyid bang: da" ziyoo jonu" dangain" ri ci: re" wigi voo mo shava jang: moo boem too" we'. Hau: thang: re" Aseing Mangsoo ri shugbyid: da" xoin" khyo" hau: voo yo' houg: moo jo, da" ja: khang" moo" ri nghe' pyam we'. Hau: ziri khanham we' byo, yoin jo, nhang: wigi khanham we' adoem de: wa. 17-18 Phyo' shoin' pyam wa dang: phyed shau" da" ce: ja: ri we' re" shid re" azoem: ci:. Houg: lang" Aseing nya: nheig joem: yo: jang" mo lheing: lo wigi nanu" ri nheig khyeug shoo myen: zi ci: shug wa nghoid. Akhid" nyid" ngoo nanu" ri byid: to" da" nya: amyeing" dang: joem dangain" ziri nanu" tam" gyo: cang yhe: wigi nyang: mho' da" gu: ri koid nghoid rigi nyang: gi re" phoug" phyid" yiri dangsoo" byid: to" ziyo' dakhyoo" ti" nanu" ri nheig khyeug lho: myo: lug ri" nhang: wa nghoid.