4
1 Khokham Nebukhadneza gi mougmyid gyab goin" mo byumyu" yi byumyu" kung: yi myeing" aja: ja: ji bang: dangain" bang: jhang vhoo: mo amyeing" lu dang: ri pyeung: kaid byid: da:.
?Being" se' kaid o"
2 Gyi: sheung: myhang: thang Mangso wigi ngoo ri toin" shed byid: da" mau" pho" ziyo' mau" pho" alhoo: again akhyoo" ri tam" gyoo: we'.
3 ?Ngoonu" ri Mangso wigi toin" shed byid: da" moug" pho" zigi khayhi' gyi: sheung: nyid la".
Nyang: koid da" mau" pho" alhoo: again joem gi khayhi' yoem: so' gyi: nyid la".
Mangsoo gi apyaid atoo: mo Khokham nghoid da:. Nyang: gi ayo, byeung" sho' moo vhoeb nyid wa.
4 ?Ngoo gi nga" Khokham khoo" moo jonu" ziyoo myoo: sho' kham zo: wigi myen myen nyid loo bye:.
5 Nghoid loug we' ngoo yhoeb jo uri gyoug dain thung" da" yhoebmo, daja: mo, wigi yu" gyoug yu" lhung: sho' da" yhoeb myang joem ri shau" myang.
6 Ngoo gi hau: yhoebmo, da" dang: kang: ri yo" tid kyoo" wa shid re" Babelon mo khokham phajhi" byid: mo, dangain" ri khe: too" wa amyeing" byid: kaid bye:.
7 Hau: thang: boid phyed bang:- main tain fa" bang:- join: zei: bang: yo' lo, kyoo' yu" bang: dangain" ri khe: shu" vang lo" ago". Ngoo gi nyangnu" ri nga" yhoebmo, tid kyoo" nghoid loug we' nyangnu" hau: dang: kang: ngoo ri ayo" tid kyoo" nghoid ago".
8 Hau: thang: Daniela vang lo da:. (Nyang: myeing gi nga" da" yu phara" myeing khyo" cang wigi Belteshaza ga: we' myheing da). Gyeung" shang: da" yu phara" joem da" Venyi: gi nyang: moo bo wigi ngoo yhoebmo, myang khyoo: ri: nyang: ri tid kyoo" bye:.
9 Boid se' phyed mo da" vhujhung: Belteshaza we"- gyeung" shang: da" yu phara" joem da" Venyi: gi re" akhoug: moo bo ziri ngoo shau" myang wigi nang gi no thang mau" pho" khyoo: dangain" ri yo" se' da:. He: ziri nga" yhoebmo, nghoid. Hau: zi ce: dang: kang: bo ziri ngoo ri tid kyoo" la.
10 ?Ngoo yhoeb jo, uri mougmyid gyab agung moo gye" gyi: da" seig moo" gam dagam ri yoeb myang moo shau" myang-
11 Hau: zigi je je yug gyi: re" lho: mougkhung: khyoo: ju" da:. Houg: lho: myidgung tho' moo byu yugkhang" moo" wigi hau: ziri yo" myang boem ago".
12 Hau: da" afu' joem gi young" lho: ashi" joem gi mougmyid gyab goin" coem' zoo: wa nhoo' nyang: to' to' zei: lhang" jo, da:. Hau: seiggam yoeb moo siyoo gougnyhoug joem no: nyid ago". Hau: seig kung: joem moo ngho' joem ngho' soid koid lho: kangso' dei da" ja: khang" moo" gi hau: ashi" ri zo: ago".
13 ?Hau: yoeb myang yo' sen wigi ngoo myid yu" nyid ri mougkhung: mo moug: lagyoo: dayug lhid zid" zoo" re lhoug yu" yhang: ti" gyoo" re" nyid ziri shau" myang-
14 Nyang: gi thui: zeing yo' ?Hau: seiggam ri thug lheing: kaid lho: seig kung: joem ri khyau" pyam seig fu' joem ri kyid pyam wigi shi" joem ri phyo' pyam we'. Hau: seiggam yoeb mo gougnyhoug joem ri we' khaid tang" pyam lho: seig kung: joem mo ngho' joem ri we' khaid sain" pyam we'.
15 Nghoid loug we' hau: seig poem: rigi joto' yo' gyid: mid" joem wigi lheing khoem to" da- Hau: ziri pa: dain" mo vufu" yo' dage" too" khoo' we'.
? Akhid" he: byu adang moo nghain: gyo" zeig nhang: lho: nyang: gi gougnyhoug joem yo' seiggam joem yo' dage" nyid nyid baja".
16 Nyang: gi nyhed zain nyang: byu nheigloem: aboo loo: za: gougnyhoug myid boo wa zi nghoid.
17 He: zigi lhid zid" zoo" re lhoug yu" nyid da" moug: lagyoo: joem da" myid phyed to" da" khyoo: nghoid da:. Houg: yoomo khyi' khang" moo" mo byu dangain" ri xangsu: byu mungdain: joem dang mo myhang: thang gyi: sheung: da" Mangso yoem: so' wigi vhoeb nyid lho: nyang: gi nyang: khyen: yu da" byu nghoid da" je abui" adoid thang da" byu yiri lang" hau: mungdain: joem ri yo" byid: khyoo: ri si' nhang: da:.?
18 Khokham Nebukhadneza gi ?He: zigi ngoo myang da" nga" yhoebmo, nghoid da:. Belteshaza we"- yhoebmo, hau: zi ce: dang: kang: bo zi ngoo ri akhid" tid kyoo" la- nga" khokham vang" mo phajhi" byid: mo, hang" we' ngoo ri ayo" tid kyoo" nghoid ago". Nghoid loug we' nang koem' gi yo" tid kyo" da:. Ciwim gari gyeung" shang: da" yu phara" joem Venyi: gi re" da" akhoug: moo bo da? ga: tid.
19 Hougsu" lang" Belteshaza ga: we' myeing da" Daniela gi gyo: dain mau" pyam lho: ci: asi' tid loo nghoid da:. Khokham phoo gi nyang: ri ?Belteshaza- hau: yhoebmo, yo' hau: da" dang: kang: gi nang ri agyug mau" nhang: baja"? ga: tid.
Belteshaza gi ?Aseing: khokham we"- hau: yhoebmo, yo' hau: da" dang: kang: gi nang ri anghoid loo:- re" gyivoo yiri nghoid wa ziri ngoo myid vho:-
20 Hau: seiggam gi mougkhung: ju" myi: sho' myhang: wigi mougmyid dang moo byu dangain" bang: wigi coem' myang boem ago".
21 Hau: da" seig fu' joem gi gye" young" lho: houg: moo damoug: gyab goin" mo yugkhang" moo" ri yo" khu: wa yhi' shi" zei: da:. Hau: da" seiggam yoeb vhoo: moo siyoo gougnyhoug joem theing: no: nyid wigi hau: da" seig kung: joem moo ngho' joem gi ngho' soid soid nyid ago".
22 ?Aseing khokham we"- nang gi hau: gye" myhang: lho: geing: da" seig moo" gam nghoid da:. Nang gi gye" gyi: sheung: sho' yug do, lo" lho: mougkhung: ri myhi: da:. Houg: lho: re" da" yoem: so' gi damoug: gyab goin" khyoo: lam je: lo" da:.
23 Aseing: khokham nang lhoug yu" nyid uri mougkhung: mo moug: lagyoo: dayug gyoo" lo lho: tid zigi ?Hau: seiggam ri thug lheing: kaid wigi phyo' shoin' pyam we' nghoid loug we' seig ngoid rigi myidgung moo teing too" byid: we'. Hau: ziri joto' yo' gyid: mid" tei" wigi tei" lho: hau: jang: pa: moo vufu" yo' dage" too" kho' we'. He: yug dang moo nghain: gyoo" baja"- Houg: lho: nyang: gi gougnyhoug joem yo' dage" nyhed zain nyid nyid baja".
24 Houg: lho: hau: dang: kang: gi hidsu" ga: zi nghoid da:. ?Aseing: khokham we"- he: zigi nang moo bue" loo wa ziri gyi: sheung: myhang: thang da" Mangso wigi tid kyo" zi nghoid da:.
25 Nang gi byu phung: mo khaid thu pyam zi shau" wigi siyoo gougnyhoug joem yo' nyid ca" wa. Nang gi nuloo: yhang: ti" nyhed zain goin" vufu" zo: lho: re" adang moo nghain: gyo" da" jang: pa: moo yhoeb ca" wa. Houg: lang" nang gi xangsu: byu mungdain: dangain" ri gyi: sheung: myhang: thang da" Mangso wigi zei: ci: ziyo' nyang: gi hau: ziri nyang: yo" byid: pyam ziri nang kham: yu loo wa.
26 Moug: lagyoo: gi seig ngoid ri myidgung moo teing too" wa shid re" amyeing" byid: da:. He: ziri damoug: gyab goin" ri Mangsoo vhoeb nyid ziri nang yhen: yu lang" nang khokham doem bui" wa ga: da" zi nghoid.
27 Houg: yoomo aseing: khokham we"- nga" phajhi" byid: dang: ri cang we' yooboo koid ziri theing: pyam we'. Jo ziri koid wigi sho" jhen: bang: ri nheig khyeug we' houg: lang" nang xo' lho: yoo" zoo: shug loo wa? ga: tid.
28 He: zi dangain" khokham Nebukhadneza moo gyeing" nyang: bue" loo bye:.
29 Lhammoo" daxe: eig khyab shi" dakyo: thang: ri Babelon mo nya: da" khokham khoo" yhoemkhung: dang mo so" ei" yen" uri
30 Nyang: gi ?Babelon khayhi' gyi: sheung: ziri yu" yu" shige'- ngoo gi nga" da" yoem: so'- yo' yoem: vhoo"- nga" da" phung: yo' phung" yoeb ri ci: shug byid: wa shid re" hau: ziri nga" voomoo" khyo" tam: to" zi nghoid? ga: tid da:.
31 Hau: dang: khoin" joem nya: nhoid mo athu shi" re- mougkhung: mo thui: dathui: ji thu re" da:. ?Khokham Nebukhadneza we" ngoo tid ziri tam" gyoo: byid: la. Re" khokham yoem: so' ri akhid" nang mo yu pyam byid: abye:.
32 Nang ri xangsu: byu phung: mo kaid thu pyam zi shoug" wa bye:. Siyoo gougnyhoug joem yo' nyid ca" wa. Houg: lho: nyhed zain myang" sho' nuloo: dadu: yhang: ti" vufu" zoo: ca" wa. Houg: lang" gyi sheing: myhang: thang da" Mangsoo gi xangsu: byu yi da" mungdain: joem ri vhoeb wa yoem: so' yo" lho: nyang: khyen: to" da" byu hang" ri nghoid loug we' hau: zi yo" byid: ziri nang yhen: yu loo wa? ga: tid.
33 Hau: dang: joem gi houg: jang: nyang: jo re" da:. Nebukhadneza ri xangsu: byu phung: mo khaid thu lho: nyang: gi nuloo: dadu: yo' dayhang: ti" vufu" zo: da:. Nya: da" gung dang moo nghain: gyo" wigi nya: da" shoomoug" joem gi zoin bung: moug" yo' dayhang: ti" yug thu re" da:. Nya: da" lo, seing" joem gi ngho' khyid: seing" joem yo' dakhyo" sheing: re" da:.
34 Khokham phoo gi ?Nyhed zain lid loo" lang" mougkhung: khyoo: ngoo nghang yu" kaid ri nga" nheig doem gyeing: lo da:. Ngoo gi gyi: sheung: myhang: thang Mangsoo ri coung" lho: apyaid atoo: moo dei nyid yug ri ngoo gi phung" yoeb yo' ngi: shab byid: bye:.
Nyang: gi apyaid atoo: moo vhoeb loo wa.
Houg: lho: nya: da" mungdain: gi ayo, dangain" mo lo" thang geing: teing jo, wa.
35 Nyang: gi mougmyid dang mo byu joem ri ci: anghoid khyo" yu" da:.
Mougkhung: mo moug: lagyoo: yi yo' myidjang mo byu yigi nya: da"
vhoebkhang" akhoug: moo nghoid da:.
Nyang: myid vho: ziri hang" wigi we' ayo" ngeig toem' pyam nghoid da:.
Nyang: koid ziri dang: myid: ayo" myid: nghoid da:.
36 Nga" nheigloem: doem gyeing: lo ri nga" da" langi:- nga" da" phung" yoeb- nga" mungdain: da" phung" yoeb joem ngoo ri doem byid: da:. Nga" gyizoug: yi yo' nga" nheig bo ludaid yigi ngoo ri lhoem: tau' yu ago". Hau: thang: ngoo rilang" shid phyang" tho' je gyi: da" khokham yoem: so' doem byid: da:.
37 Houg: lho: akhid" ngoo Nebukhadneza gi mougkhung: mo khokham ri coung"- phung" yoeb yo' ngi: shab byid: o". Nyang: koid zi ja: khang" moo" gi jo lho: tarha" deingmain" da:. Houg: lho: nghoid boin: bang: hang" ri we' nyang: yo" doin: khyo' pyam da? ga: tid.