2
Nebukhadneza khokham bue" zi eig zain ein: zain moo nyang: gi yhoebmo, daloem: mo, da:. Hau: yhoebmo, gi nyang: ri ayo" yhoeb loo sho' seing" khoo" myid myoo: nhang: da:. Houg: yoomo nyang: gi nya: da" boid phyed bang:- main: tain: fa" bang: yu join: khu: bang: yo' join: zei: bang: khe: to" wigi nyang: ri hau: yhoebmo, ri phuid: kyoo" nhang: da:. Nyangnu" re" wigi khokham pho da" shidkhoin" mo yab jo, boem lang" nyang: gi nyangnu" ri ?Ngoo mo, da" yhoebmo, daloem: gang mo ngoo seing" myid kho" nyid. Hau: yhoebmo, da" dang: kang: ci: nghoid ziri ngoo si' nau? ga: tid da:.
Nyangnu" gi khokham phoo ri Aramid myeing" khyo" ?Aseing: khokham kang: sheing: baja" o". Re" yhoebmo, ngoonu" ri tid kyoo" la- houg: lho ngoonu" gi hau: ziri tid kyoo" wa? ga: tu" ago".
Khokham phoo gi nyangnu" ri ?Nanu" nyang: ngoo ri hau: yhoebmo, tid kyo" lho: hau: yhoebmo, da" dang: kang: ri tid kyoo" ca" wa ein: ngoo myid phyed too" bye:. Nanu" ayo" tid kyoo" nghoid rigi nanu" ri adu atoem' lang: khyam" pyam lho: nanu" da" yhoem: joem ri we' byo, yoin" boem jo, nhang: pyam wa. Nghoid loug we' nanu" gi hau: yhoebmo, yo' yhoebmo, da" dang: kang: eig ja: goin" ziri yo" tid kyo" nghoid rigi nanu" ri ngoo jhungshug byid: lho: gye" ngi: shab byid: wa. Houg: lho: akhid" yhoebmo, ci: nghoid ziri tid lho: hau: da" dang: kang: ri tid kyoo" ca"? ga: tid da:.
Nyangnu" gi khokham phoo ri ?Aseing khokham nang khyo" yhoebmo, za: dayo" tid kyoo" lang" gi hau: ziri ngoonu" phuid: sho' kyoo" wa? ga: doem tid ago".
8-9 Houg: lang" khokham phoo gi ?Ngoo myid ziyo' dakhyo" nghoid baja". Nanu" gi ngoo ri yhoebmo, ayo" tid kyo" boem lang" nanu" dangain" bang: ri dakhyo" za: yooboo dam byid: wa ein: ngoo myid phyed ziri se' boem yoomo ayo, sheing: sheing: shu" yu wa yoem: kaid nyid ago". Nanu" gi ayo, myang" loo lang" bui" wa moo" joem thid byug lid byug wa ziri myid byu lho: ngoo ri xo' lho: coem' mhoug wa ga: nanu" nya: phung: khoug: moo myid veing" ci: ago". Yhoebmo, ci: nghoid ziri ngoo ri tid kyoo" ge'. Houg: lang" hau: yhoebmo, da" dang: kang: ci: nghoid ziri nanu" ngoo ri yo" tid kyoo" wa ein: ziri ngoo se' loo wa? ga: tid da:.
10 Phajhi" byid: mo, gi ?He: mougmyid dang moo aseing khokham nang vho: ziri yo" tid kyoo" wa byu hang" dayug we' anyid. Khokham khayug we' gyi: thang ziyo' yoem: so' gyi: thang bang: lang" nya: da" boid phyed mo, main tain fa" mo, yo' join: zei: mo, ri hougsu" mho' zi akoid yu"? ga: tu" ago". 11 Aseing khokham nang mho' zigi sung youg: wigi yu phara" joem za: anghoid rigi xangsu: byu hang" we' ayo" koid byid: goo" wa Houg: bang: gi xangsu: byu yi phung gung moo anyid nghoid ago"? ga: tid.
12 Houg: lang" khokham phoo gi nheig joem: yo: re" lho: Babelon mung" moo khokham ri phajhi" byid: bang: dangain" ri said pyam wa shid re" amyeing" khyo' kaid da:. 13 Houg: yoomo Daniela yo' nya: byencang" yi bo bo lho: nyangnu" dangain" mo ri hau: moo" zoo" yo' sen lho: said pyam wa amyeing" lu dang: daloem: pyo: kaid ago".
14 Hau: thang: Daniela gi byu said wa moo" foin: too" shau" da" khokham pho da" kangso' zung" zoug: Ariog jhang yhe: da:. Daniela gi tid wa dang: khoin" joem ri nyeing" za: khyen: lho: 15 Khokham pho wigi houg: yhi thain: da" amyeing" ri ciwim khyo' zi Ariog ri myid: yu" da:. Houg: yoomo Ariog gi ci bue" lo zi Daniela ri tid kyo" da:.
16 Daniela gi houg jang: khokham pho jhang yhe: lho: yhoebmo, ce: dang: kang: bo ziri khokham phoo ri yo" tid kyoo" wa shid re" myoo" sho' lheing: akhang" mho' yu da:. 17 Hau: thang: Daniela gi yhoem: lo" lho: nya: da" byencang" Hanania- Mishaela yo' Azaria bang: ri bue" lo da" khyoo: ri lo" tid kyo" da:. 18 Nyang: gi mougkhung: mo Mangso jhang nheig khyeug zi yo" yu wa shid re" yo' Babelon mo phajhi" byid: bang: yo' dage" nyangnu" ri we' abo said pyam sho' nyangnu" ri hau: mau" pho" khyoo: ri yo" tid sho' kyoo" wa shid re" akyu" mho' nhang: da:. 19 Hau: thang: hau: myen ri nyang: hau: mau" pho" khyoo: ri Daniela jhang yhoeb myang moo pang shug yoomo mougkhung: Mangsoo ri coung" da:.
20 ?Mangsoo gi phajhi" bo lho: yoem: so' thain: da:.
Nyang: ri apyaid atoo: moo coung" byid: we'.
21 Nyang: gi ayo, akhyeing: yo' yo, boin: ri zei: ci: da:.
Nyang: gi khokham yiri tu: to' lho: phyo' pyam da:.
Phajhi" juyhi: yo' lasi phajhi" byid: su: nyang: nghoid da:.
22 Nyang: gi dang: kang: no, lho: nyhoem" shoung: to" da" moo" zoo" joem ri di: di: za: pang shug da:.
Nyang: gi moug: coid khoug: moo ci: shoung: to" ziri nyang: se'.
Houg: lho: nyang: nyang: rigi bidbang yo' lheing khoem ci: da:.
23 Phoug" phyid" yi da" Mangsoo we"- ngoo gi nang ri coung" lho: ngi shab byid: da:.
Nang gi ngoo ri phajhi" yo' yoem: byid: da:.
Nang gi nga" akyu" mho' dang: ri tam" gyoo: byid: da:.
Houg: lho: khokham phoo ri citid kyo" wa ein: ziri ci: shug abye:.
24 Houg: yoomo Daniela gi khokham pho wigi khokham phajhi" byid: bang: ri said pyam wa shid re" amyeing" byid: too" shau" da" Ariog jhang yhe: da:. Houg: lho: nyang: gi ?Nyangnu" ri asaid pyam- ngoo ri khokham pho jhang shu" yhi: la. Houg: lang" nya: da" yhoebmo, ce: dang: kang: bo ziri nyang: ri ngoo tid kyoo" wa? ga: tid da:.
25 Houg: jang: Ariog gi Daniela ri khokham Nebukhadneza da" shidkhoin" khyoo: shu" yhe: lho: khokham phoo ri ?Aseing khokham we" re" yhoebmo, ce: dang: kang: bo ziri yo" tid kyoo" wa su: pyoung" she: to" da" Yuda yi mo dayug ri ngoo shau" myang bye:? ga: tid kyo" da:.
26 Khokham phoo gi Daniela (Belteshaza ga: we' myheing da" yug) ri nga" yhoebmo, ci: mo, ziyo' hau: zi ce: dang: kang: bo: ziri nang ngoo ri yo" tid kyoo" wa la"? ga: myid: da:.
27 Daniela gi ?Aseing khokham we"- hau: ziri join: zei: bang:- maindain si' bang:- boid phyed bang: yo' kyi: yu" bang: nang ri yo" tid kyoo" su: anyid? 28 Nghoid loug we' yau: da" mau" pho" khyoo: joem ri yo" pang shug su: mougkhung: mo Mangsoo dayug koem' nyid da:. Nyang: gi ju" loo wa da" ayo, moo bui" wa ziri aseing: khokham nang ri ci: shug byid: abye:. Nang yhoeb jo, uri mo, da" yhoebmo, yhoeb myang ri akhid" ngoo nang ri tid kyoo" ba.
29 Aseing: khokham nang yhoeb nyid uri ju" loo wa da" ayo, da" akhyoo" ri nang yhoebmo, mo, da:. Houg: lho: yau: da" mau" pho" khyoo: joem ri pang shug da" Mangsoo gi bue" lo wa ziri nang ri ci: shug byid: bye:. 30 Akhid" ngoo ri he: yau: da" mau" pho" khyoo: ri ci: shug byid: bye:. Ngoo gi gooji yi tho' phajhi" je boo yoomo anghoid. Aseing: khokham nang khyo" wigi re" yhoebmo, da" dang: kang: ri se' yu lho: nang jhang ju" re" da" myid yu" khyoo: joem ri se' gyoo: wa shid re" nghoid da:.
31 Aseing: khokham we" re" yhoeb myang moo nang gi re" shidkhoin" moo soolhoo: zeing daloem: yi yi wim bang ziyo' yu" gyoug tung" yab jo, ziri shau" myang da:. 32 Hau: soolhoo: vhuloem gi gyeing" thang da" sheing: wigi koid to" da:. Hau: da" yang gang yo' lo, gi ngei yo' koid to" ago". Phyid" doem yo' cug noug" rigi gyid: mid" yo' koid to" da:. 33 Hau: da" khyid: eig loem: gi joto' nghoid da:. Khyid: voo joem gi datoem' gi joto' datoem' gi zhoo" nhau: nghoid da:. 34 Nang hau: ziri yu" nyid da" uri pyo' khyam" mo lug boem moo" daloem: hang" wigi we' azang" tain" zi be" gyoo" lo lho: soolhoo: da" joto' zhoo" nhau: khyid: voo ri re" baid da:. Houg: lho: hau: khyid: joem ri ajab amoin' du" phyi: sain" pyam da:. 35 Houg: jang: joto'- zhoo" nhau:- gyid: mid"- ngei yo' sheing: joem gyoeb gyo" wigi xung" gung gug nang: jang: mo pheilhoug: yo' dakhyoo" ti" bue" lo ago". Houg: zi dangain" ri lid hau' wigi moid tang" pyam lho: ce: khoo: we' ateing too" khoo' nghoid da:. Nghoid loug we' hau: lugzeing gi gyi: re" lho: mougmyid dangain" ziri nghoeb pyam da" boem bue" lo da:.
36 ?He: zigi yhoebmo, nghoid. Akhid" aseing khokham we" nang ri ngoo hau: da" dang: kang: ri tid khyoo" wa. 37 Aseing khokham we"- nang gi khokham dangain" mo je gyi: sheung: thang su: nghoid da:. Mougkhung: mo Mangsoo gi nang ri khosen bui" nhang: wigi nang ri yoem: so' yoem: moo" yo' ngi: shab byid: bye:. 38 Nyang: gi nang ri mougmyid dang moo nyid da" byu dangain" ri vhoeb wa khokham yo' gougnyhoug joem ngho' joem dangain" dang moo vhoeb da" khokham bui" nhang: da:. Nang gi sheing: vhuloem nghoid da:. 39 Re" thang: moo re" mungdain: yhi' agyi: sheing: da" mungdain: daloem: thu loo wa. Hau: thang: soem" loem: ein: da" gyid: mid" bo mungdain: gi mougmyid gyab goin" ziri vhoeb loo wa. 40 Hau: thang: mo myid: loem ein: da" mungdain: gi joto' yhi' geing: wigi ja: khang" moo" ri phyo' pyam lho: ajab amhoin' koid pyam loo wa. Jo, to' gi ja: khang" moo" ri ajab amhoin' koid pyam ziyo' dakhyoo" ti" hau: zigi nyang: shid mo mungdain: joem ri ajab amhoin' koid sain" pyam loo wa. 41 Khyid: voo: yo' khyid: nyhoug" joem gi datoem gi joto' datoem' gi zhoo" nhau: nghoid ziri nang shau" myang da:. He: zigi hau: mungdain: eig gang kho' pyam shoug" wa ga: da" dang: kang: nghoid da:. Houg: moo joto' yo' zhoo" nhau: lheig too" yoomo joto' da" yoem: dayham" bo loo wa. 42 Khyid: nyhoug" joem gi joto' datoem' zhoo" nhau: datoem' nghoid yoomo mungdain: dakhyam" gi yoem: bo wa mungdain: dakhyam" gi yoem: nheing: wa ga: da" dang: kang: nghoid. 43 Joto' yo' zhoo" nhau: lheig ziri nang shau" myang da:. He: ziri mungdain: mo khokham yiri myi byid: myi: yu koid lho: shoin" goo" loo wa khyo" soin' boem. Nghoid loug we' joto' yo' zhoonhau: age lheig ziyo' dakhyo" nyangnu" ayo, shoin" boem goo" wa nghoid. 44 Hau: khokham yi da" apyaid moo mougkhung: mo Mangsoo gi khanham we' athang agoin da" mungdain: daloem: ri jo, loo nhang: wa. Hau: ziri khanham we' ayo" oung: pyam goo" wa. Nghoid loug we' hau: ze wigi koem' gi hau: mungdain: dangain" ri bain sho' phyo' shoin' pyam lho: hau: thang: hau: zigi apyaid atoo: moo geing: teing jo wa. 45 Lug boem daloem gi hang" wigi we' azang" thung" ri pyo, khyam" mo be" gyoo" re" lho: joto'- gyid: mid"- zhoo" nhau:- ngei yo' sheing: wigi koid to" da" soolhoo: ri lo du" zang" ziri nang shau" myang da:. Myhang: thang Mangsoo gi aseing: khokham nang ri ju" loo wa da" ayo, moo bui" wa ziri tid kyo" nyid da:. Ngoo gi nang ri nang mo, da" yhoebmo, ri goolhoo: tid kyoo" bye: lho: hau: da" dang: kang: deingmain" jo, ziri phuid: kyoo" bye:? ga: tid da:.
46 Hau: thang: khokham Nebukhadneza gi myidjang khyoo: goeb gyo" lho: Daniela ri xoin" ngei" byid: wa yo' jhungshug byid: wa amyeing" khyo' kaid da:. 47 Khokham phoo gi ?Re" da" Mangsoo gi yu phara" dangain" tho' je gyi: sheung: yug nghoid da:. Khokham yi dang mo aseing nghoid da:. Houg: lho: mau" pho" khyoo: joem ri phuid: kyoo" byid: su: nghoid da:. He: yau: da" mau" pho" khyoo: joem ri nang yo" phuid: kyo" da" gang mo he: ziri ngoo se'? ga: tid da:. 48 Hau: thang: nyang: gi Daniela ri myhang: da" aya: joyoo ri byid: lho: phoug" dab da" jhungshug myoo" sho' byid: da:. Nyang: ri Babelon mung" du moo vhoeb nhang: lho: khokham phajhi" byid: mo, da" vhujhung: khyo" moo" foin: to" da:. 49 Daniela wigi mho' ziyo' dakhyo" Shadrag- Meshag yo' Abednego bang: ri Babelon mung" du ri vhu" shi: wa shid re" moo" foin: to" da:. Nghoid loug we' Daniela koem' gi khokham vang khoug: moo za: nyid nyid da:.