12
1 Zin: yung" pain" byimi void ci: da" moug: lagyoo: tid zigi ?Hau: ayo, moo re" byumyu" yiri lhoug zung" da" moug: lagyoo: moo" Mikhaela gi nyid thu loo wa. Hau: thang: hau: zigi yau: khi" ayo, nghoid wigi byumyu" yi xang: shi" nyid re" da" ayo, mo zi akhid" ju" sho' moo yau: thang nghoid wa. Hau: ayo, ju" lo ri Mangso da" mougsoug" pug moo myeing lhid" to" da" re" byumyu" yi dangain" gi khyoid yu zi shau" boem goo" wa.
2 Shid: loo" bye: da" bang: mo myoo" sho' bang: gi doem dei to' loo goo" wa. Dayham" gi ngei pyoo: tung" apyaid ato: kangso' yo" yu boem wa. Houg: lho: dayham" bang: gu gi yau: khi" yo' wigi apyaid atoo: da" jeju" ashau" kham zoo: wa.
3 Phajhi" bo da" vhu" shi: bang: gi mougkhung: moo bang jo, ja: yo' dage" dug bang nyid wa. Houg: lho: byumyu" myoo: sho' bang: we' jo ziri koid wa shid re" jhau" yu loo bang: gi kyi: joem yo' dakhyoo" ti" khanham we' dabang jo, wa? ga: tid da:.
4 Nyang: gi ngoo ri ?Daniela we" akhid" gi hau: mougsoug" pug ri myid" pyam lho: mougmyid thang yo, ju" sho' hau: ziri dazid thung" too" we'. Hau: agyoo: moo bue" nyid da" ziri se' gyoo: noug yoomo byu myoo: sho' bang: gi nyangnu" da" yoem: ri amyed afoo" ze" thang pyam ri" goo" wa? ga: tid da:.
5 Hau: thang: ngoo gi byu eig yug gyid lang da shoid mo dayug yug yab jo, ziri shau" myang.
6 Nya: eig yug mo dayug gi gyid moin shoid moo yab jo, da" moug: lagyoo: ri hid su" ga: myid: da:. ?Hau: mau" pho" moo" zoo" joem bue" loo wa shid re" kha myhang myang" shi" wa lug la"? ga: myid:.
7 Moug: lagyoo: gi eig lo, goin" ri mougkhung: khyoo: tu: to' kaid lho: apyaid atoo: mo Mangsoo da" myeing" yo' geing: teing da" dang: so" to" da:. Nyang: tid zigi ?He zigi soem" zain dakhyam" myang" loo wa. Mangso da" byu yiri shen" yhen zi thang byug lang" he: gu: dangain" bain bue" byug wa? ga: nyang: tid ziri ngoo shau" gyo:.
8 Nyang: tid ziri ngoo shau" gyo: nghoid loug we' hau: ziri ngoo ase' gyoo:- Houg: yoomo ngoo gi ?Aseing we"- nghoid loug we' khasu" jo, bue" thang loo" wa la"? ein: myid: yu" bye:.
9 Nyang: tid ziri ?Daniela we"- nang akhid" loo" ca" bye:. Ciwim gari he: dang: khoin" joem ri lo" thang ayo, ju" ri" sho' zau" ci wigi shoung: too" ca" da:.
10 Byu myoo" sho' bang: gi kyeing sain' pyam byid: zi shau" boem wa. Akhyeing" ashoeb bang: gi ase' gyoo: goo" wa. Nghoid loug we' nyangnu" gi akhyeing" ashoeb moo" ri zei: nyid boem goo" wa. Phajhi" boo bang: kyeing dase' gyoo: goo" wa.
11 Nyid" khang" moo" xoin" ngei" zi theing: byug da" ayo, mo nghoid wigi hau: zigi gyoug dain pho" ayo, mo 1290 nyid" lid loo" wa.
12 Bidnyid 1335 nyid" lid sho' jhug zug nyid bang: gi ngei pyo: ago".
13 ?Houg: lho: Daniela we"- nang we' lo" thang ju" sho' jhug zug nyid we' Hau: thang: nang shid: wa. Nghoid loug we' lo" thang ayo, moo re" da" aphoug" jhungshug kham yu wa khyo" dei to' loo wa? ga: tid da:.