3
Nanu" gi Khristu yo' dage" doem dei to'' loo bye: ziri shau" kham: yu boem, bye: yoomo Mangsoo, yo shoid mo nya: Khokham" zhungtang moo zhoung: jo, da" Khristu nyid da" mougkhung: mo zi joem ri nheig danhei: nyid ge. Mougmyid tho' moo jo, da" zi joem ri anghoid loo: za: mougkhung: tho' moo jo, da" ziyoo joem moo nheigloem: zug, jo, ge. Khasu" wim ga: ri nanu" gi shid: bye: mo, nghoid- nanu" da" kangso gi Khristu yo' dage"- Mangsoo moo yheom" shoung: to" boem bye:. Re" da" kangso' gyeing" gi Khristu nghoid lho: nyang: doem thu' myang lo da" uri nang we' nyang: yo' dage" thu' myang lo wigi nya: myonhoo: phung" yoeb, ri bo shau" kham: yu wa zi nghoid.
Houg: yoomo nanu" da" akhoug: moo bo da" aved, avhu: moo"- myo, jang anyau, da" moo"- nyam, da" moozoo"- akhyeing" ashoeb khyoo: yo' vhoo: boo loug, gyi: da" khyoo: gi soolhoo: no' da" khyoo: daja: nghoid- hau: ziri said pyam boem ge. Houg: yhang: te" da" khyoo: joem ri koid nyid boem yoomo nyang: ri atam" gyoo: bang: da" atho' moo Mangso da" nheig khoo" yo: khyoo: gi ju" ri" wa zi nghoid. shid phyang" mo nanu" da" kangso khyoo: bain sho' moo hau: khyoo: joem wigi nghoeb, oung: ci uri gi nanu" nyang: we' houg: yhang: te" da" yooboo ri koid lho: wigi kangso dei lid lo boem bye:.
Akhid" koem gi nheig yo: zi nheig no, nyang: yo: khyoo: anoug, angei da" nheigloem:- yooboo ri xoem" to" khyoo: sube" da" gei, sang: shang pyang: ziyo' khoin" co' loeb, khyoo: ri nanu" da" nhoid mo athu' nhang: loo: go". Nyang: cang" nyang:- mhau' da" dang: ri atid nyid lo go"- khasu" wim ga: ri ri byu xoug" yo' dage" hau: da" aved asam" joem ri nanu" khyoid pyam lho: gungdu: aseig zhoug yu boem abye: go". 10 Phain" so: to" da" Aseing Mangsoo gi hau: byu seig ri Mangsoo nya: da" alhoo: aved' yo' je" je du goo" sho' khanham we' daso koid daso' nyheung nyid houg: su" so' koid so' nyheung: khyoo: gi nanu" gi hau: Aseing ri joeb, byeung" sho' se' loo wa shid mo nghoid. 11 He: khyoo: yoomo Yuda byumyu" yi yo' Heleni byumyu" yi gi athang: yham" kham su: yo' akham' su: siyoo sigam: byu yi byu kyang: byu lam" joem join yi yo' loid byoin, byu yi ga: nyangnu" da" akhoug: moo kho' go" koin, nyid wa khyoo: ajo, loo- Khristu gi nanu" dangain" bang: tho' moo- je" yhau: gyen: su: nghoid wigi nanu" dangain" bang: yo' dage" nyid nyid.
12 Nanu" gi Mangso byu yi nghoid boem bye: yoomo nyang: gi nanu" ri jheddab wigi nya: shid re" khyen: yu shau" bang: nghoid- houg: yoomo nanu" gi jhed' thang kang: athang nheigkhyeig shoomyen: zi nheigloem: nyhoem: zi sam" dab nu" nham' ziyo' nheigloem: gyi: sheung: ziri void ci: ge. 13 Nanu" mo dayug yug da" atho' moo yooboo foin: jang: jo, nghoid rigi nyang: cang" nyang- kham zeing: go" ziyo' nyang: cang" nyang: yooboo ri khyoid pyam byid: go" nyid ge- hau: Aseing gi nanu" da" yooboo ri khyoid pyam byid: bye: ziyo' dakhyoo" ti" nanu" nyang: cang" we' yooboo ri khyoid pyam byid: goo" ca" nyid. 14 Hau" yoemso dangain" da" atho' moo joeb, byeung" da" nheigloem: shamshoin" khyoo: bue" loo sho' houg: dangain" tho' moo ziyoo jo, moojo, ri yo" myeug, deung: da" jhed' khyeing: kang: khyeing: ri pug void ci: ge. 15 Khristu byid: da" ngei pyo: khyoo: gi nanu" da" nheigloem: ung: khoug: moo davhoeb khang" nyid wigi houg: gi nanu" myid phyed moo" pyo: da" khyoo: moo khyoo: shid' vhu" she: nyid baja"- khasu" wim ga: ri hau: ngei pyo: da" khyoo: ri shau" kham: zoo wa shid re" Mangsoo gi nanu" ri gungdu: daloem: za: khyo" khe: yu bye: yoomo jeju" ri boin: so" nyid ge. 16 Khristu da" mungdang: gi nanu" da" nheigloem: khoug: moo byeung' jo, nhang: ge- phajhi" juyhi jo, moojo, yo' nanu" nyang: cang" jhoug" goo" mhoo' goo" ge'. Coung" nghei dang: Jikhoin" nghei cung" dang: joem Venyi: yo' sen: da" lid' jhoem" dang: joem yo' nanu" da" emyed khoug: moo Mangsoo ri jeju" boin: ziyo' coung" nghei nyid ge. 17 Houg: yoomo nanu" ce" moo" thu' nghoid loug we' mung' main: khyoo: moo we' moozoo" jid: zo" khyoo: moo we' Aseing Yesu myeing ri lang: lho: dangain" ziri dakoid nyid wigi nya: khoug: khyo" phoo' Mangsoo ri jeju" daboin: so" nyid ge.
18 Yhoem: seing: myhi' we"- nyang: nya: da" yhoem: seing: pho tid khyo" cang nyid ge- hau: khyoo: gi Khristain byu dayug khyo" wigi hau: Aseing moo cang yhe: loo" wa du, da" khyoo: nghoid.
19 Yhoem: seing: pho we' nanu" da" yhoem: seing: myhi' ri jheddab nyid wigi nyangnu" ri anoug, akhyoid pyi: sho: da" dang: ri atid nyid goo".
20 Zooshang: bang: we"- ce" ja: khyoo: moo we"- re" myhi' yo' re" pho da" dang: ri khanham we' datam" gyo: nyid ge- hau: khyoo: gi Khristain yi cang zei: loo" eung: da" moo" nghoid- Khasu" wim gari hau: khyoo: gi Mangsoo vho: da" khyoo: nghoid.
21 Myhi' phoo' yi we"- nanu" da" nya: zoo: yi ri nheigloem: aze" sho" nyid goo"- houg: su" koid lang" nyangnu" gi nheignge yoem: gyau: lo" byug boem wa zi nghoid.
22 Join, yi we"- nanu" da" xangsu: yhoem: seing: yi ri khyoo: khaid khang" moo" moo tam" gyoo: byid: nyid ge nanu" gi myonhoo: shoo: nau, ziyo' nyangnu" shid moo dang: tam" gyo: khyo" akoid loo: za: Aseing ri gyoug phau" zoo re" nyangnu" da" dang: ri gyeungshang: ziyo' tam" gyo: nyid ge. 23 Nanu" gi ce" ja: koid nghoid loug we' byu shid re" koid ti" anghoid loo: za: Aseing shid re" koid yhang: ti" nanu" da" nheigloem: emyed dangain" yo' yoem: kaid nyid ge. 24 Aseing gi nya: byumyu" yi shid re" shoung: to" da" agyid asoo: ri jhungshug khyo" wigi nanu" ri byid: zi nghoid ziri daboin: so" nyid ge- khasu" wim ga: ri Khristu koem gi pang" zei: nyid da" Aseing agyeing" nyang: nghoid bye:. 25 Adeung amain" khyo" koid nyid da" byu yug khang" moo" ri nyang: koid nyid adeung amain" da" moo" zo" shid re" latoo: doem phoug zi shau" zoo: wa nghoid- khasu" wim ga: ri Mangsoo gi tarha" dang: phyed khyoo: moo myonhoo: khyen: nyid su: anghoid.