2
Ngoo gi nanu" shid re" we' Ladoki byu yi shid re" we' ngoo yo' myonhoo: ashau" myang go" yu" da" gootu: byu yi shid re" we' ngoo khayhi' yoem: kaid voin vu, lid loo: bye: da" khyoo: nanu" ri ngoo tid kyoo" ba. Hougsu" ngoo yoem: kaid voin yu, da" khyoo: gi nyangnu" dangain" tho' moo myo, yang" da" nheigloem: yo' joeb, byeung" wigi dayug yo' dayoug da" jheddab da" emyed moo- tei" xo' go" lo" ziyo' nyangnu" gi deingmain" da" lasi phajhi" mo myo: tham: da" nheig shid: nheig deig khyoo: ri nyangnu" yo" yu wa shid re" nghoid- hougsu" wim nyangnu" gi- he: khyo" wigi Mangso zau" yheom" to" da" no, thang phajhi" ri se' gyo: lo boem wa nghoid hau: phajhi" gi Khristu nyang: nghoid bye:. Nyang: gi Mangsoo nghoeb, too" yhoem" to" da" phajhi" juyhi yo' lasi phajhi" ziyoo jonu" dangain" ziri phang byid: da" khoem" thoug" nyang: nghoid nyid.
Xo' lho: ngoo nanu" ri tid nau zigi gye" jo yhang: ti" du nyid nghoid loug we' shoid da" ngeug se: dang: khoin" joem yo' hang" wigi we' nanu" ri ajhu' phyo' nhang: pyam goo". Khasu" wim gari ngoo nanu" yo' ngoo nya: gungdu: nyang: dage" ashau" nyid nghoid loug we' Venyi: khyo" nanu" yo' dage" nyid nyid zi nghoid yoomo nanu" da" geingteing yoem: kaid nyid da" nheigloem: yoem: vhoo" yo' Khristu ri loem" jeing" khyoo: moo dage" yab, jo, ziri ngoo yu" gau nyid.
Nanu" gi Khristu Yesu ri Aseing ga: wigi lhoem: yu bye ziyo' dakhyoo" ti" nyang: yo' dage" deung: shoin" lho: kangso dei nyid ge. Jhau" mho' ziri kham: yu bye: ziyo' dakhyoo" ti" nyang: moo agyi: no" no, cen, lho: nyang: moo nyha" da" kangso dei khyoo: qei" to" wigi nanu" da" loem" jeing" khyoo: ri je" geingteing jo, nhang: ge'. Jeju" ri coung" nghei myid nanu" moo byeung" jo, baja".
Khristu da" akhyoo" shed' to" ziyo' dakhyoo" ti" anghoid loo: za: byu xangsu: yi da" akhyoo" shid khyoo: mo thu' da" jhau" shed' dang: joem yo' dei moo dei nyid moo nyid ri vhoeb khang" da" yu join: joem jhang mo thu' lo da" jhau" shed' dang: nghoid da" ce" akyu" we' abo mhau' fain" da" xangsu: phajhi" yo' hang" wigi we' nanu" ri join akoid nhang: pyam goo"- zid" lhid" nyid ge. Mangso da" joeb byeung" layung, gung gi- xangsu: gungdu: nghoid da" Khristu moo bo jo. 10 Nanu" gi nyang: yo' shoin" deung: to" jang mo joeb byeung" da" kangso ri yo" yu boem bye:- hau: nyang: vhoeb khang" da" Venyi: dangain" yo' amyeung" akhang" yoo" bang: dangain" mo, da" atho' moo je" gyi: lho: myhang: thang su: nghoid nyid.
11 Nanu" gi hau: Aseing yo' dadeing: daloem za: bue" lho: wigi kangso dei da" uri athang: yham" khyoo: ri kham: yu bye: nghoid nyid hau: zigi byu yi da" lo, wigi koid zi anghoid loo za: he: yooboo dab da" gung sho" yoemso mo lhoid pyoin, kaid ein: da" Khristu wigi ze" bui" byid: da" athang: yham" khyoo: nghoid. 12 Nanu" gi babtisma kham: yu da" bidnyid ri nyang: yo' dage" myhoeb, pyam zi shau" wigi Khristu ri shid: jangmo doem dei to' loo nhang: Mangso da" yoem: moo" ri loem" jeing" da" laloem, lakhau: yoomo Khristu yo' dage" dei to'' loo nhang: zi shau" boem bye:. 13 Nanu" gi shid phyang" Venyi: moo shid: mang nghoid nyid ago"- khasu" wim gari nanu" gi yooboo koid da" tung: to" tarha" ayo" da" tungbau byumyu" yi nghoid ago"- nghoid loug we' akhid" Mangsoo gi Khristu yo, dage" dei da" khyoo: khyoo: shu" loo" bye:- 14 Mangsoo gi nyha" da" yooboo dangain" ri khyoid pyam byid: wigi. Nyang: gi nyha" da" anghoid akhuang da" yooboo jhen: zhayen" ri we' houg: yo' sen: da" tarha" joem ri we' pyang" zeing tho' moo ten" zei: yo' baid jen" tab' wigi shoem" shoung: pyam byid: bye:. 15 Hau" da" pyang" zeing tho' moo Khristu gi vhoeb khang" da" Venyi: joem amyeung" akhang" yoo" mo, ri- oung: pyam wigi nyangnu" ri thung: byu bui" nhang: pyam lho: oung: doid' loo" bang: jen so" lo" jangmo cang so" loo" nhang: ziyo' byu dangain" bang: wigi coem, yu" zi shau" da" byu yi bue" loo" nhang: pyam bye:.
16 Hougsu" nghoid yoomo zoo: noem shug noem yo' sen: khyo" we' ayo, bidnyid moo cang lho: lhammoo" xain" nyid" yo' gyeungshang: Bidnyid mo pui" joem yo' sen: lho: hang" wigi we' nanu" ri yooboo dang: aphyed' nhang: go". 17 Houg: yhang: te" da" khyoo: dangain" gi ju" lo da" ayo, moo bue" thu' loo wa da" khyoo: joem da" ayoeb, abang za: nghoid nyid agung gyeing" nyang: gi Khristu nyang: nghoid nyid. 18 Ladu lid' sho' shoid vhang: da" khyoo:- nyang: tu: nya: da" gungdu: ri khyo' nyhoem: pyam wa ziyo' moug: lagyoo: yi ri no" ca" ga: gooki" lid da" yoeb, myang yo" we' shoid vhang: da" khyo' nyhoem: khyoo: moo nyhin" zei: nyid bang: yo' moug: lagyoo: yi ri noku da" khyo" we' nyang: nya: gungdu: ri dangain" tho' moo je" nghoid thang su: ga: khyo" tid phau: nyid mo, hang" su: wigi we' nanu" ri yooboo dang: phyed wa da" akhang" abyid: goo"- Houg: yhang: te" da" byu yi gi ce: sei abo da" Xangsu: myid soin: khyo" nyang: nya: gung ri tid phau: yu lho. 19 Gung du: da" vhuloem nghoid nyid Khristu moo xo' nhei: khau: nghe: jangmo phoug pyeug, loo" mo, nghoid ago"- Khristu vhoeb khang" da" akhoug: moo dagung goin" gi hau: da" yug: xeig yug: myo, yo' shoo" gyi: yug: khyang: joem wigi myheug shoin" to" lho: khu: gyi: kaid ziyo' Mangsoo myid vho: khyo" gyi: sheung: loo wa nghoid.
20 Nanu" gi Khristu yo' dage" shid: byug boem bye: nghoid yoomo jo, moojo, ri seung: nyid da" Venyi: joem khoug: mo lhoid pyoin, kaid ziri shau" boem bye:- houg: su" nghoid rigi ci: yoomo nanu" gi he: mougmyid da" join yi yhang: ti" kangso dei nyid go" la". 21 He: ziri ajham" yu"- he: ziri azang" thung" goo"? ga: da" tarha" ri datam" gyo: nyid shigo" la". 22 Hau" tarha" joem dangain" gi dalheung: ci: yhung: bye: thang: rigi ce: akyu" aboo lo: ziyo' sen: da" tarha" za: nghoid lho: byu xangsu: yi koid thu' da" tarha" ri jhau" byid: khyoo: joem za: date: nghoid. 23 Houg: yo' dakhyoo" ti" moug: lagyoo: yi ri agyoo: atho' noku nhang: da" khyoo: we' nyang: nya: gung ri shoid vhang: khyo" khyo' nyhoem: khyoo: moo we' hau: da" tarha" joem gi phajhi" bo yhang: ti" du nyid nghoid loug we' gungshoo" vho: da" nyam, nheigloem: ri vhoeb khang" khyoo: moo ce" akyu" we' aboo nghoid da.