8
Jheddab, da" mangnhung" yi we"- Makedoni mung" mo phungbyu yi ri Mangsoo gi cenoem jeju" byid: bye: ziri nanu" ri ngoonu" si' nhang" nau nyid boem. Nyangnu" kham zo: lid loo bye: da" shidgyoin noogyoin moo nyangnu" gi gye" kyikhyeug jham" ca: yu" shau" abye: go". Nghoid loug we' nyangnu" da" ngeibu: gau yi nheigloem: gye" gyi: jo, boem yoomo nyangnu" gi gye" asho" ajhen" bang: nghoid loug- nyangnu" byid gam khyoo: moo- laleug, laki aboo: loo: za: jheddab emyed yo, byid: nyid ago". Hau: phung: bang: gi nyangnu" yo" koid yhi' byid: nyid boem khyoo: ri ngoo nanu" ri sagsi gyeung" kham kyo" nyid. Nyangnu" gi Yuda mung" mo Mangso da" byu yi ri pang" thoug khyoo: moo boo nau boem yoomo yo" bo vang wa da" akhang" yoo" wa shid re" nyangnu" da" myid khyo" ayoo" ri yoo" sho' mho' boem. Nyangnu" gi ngoonu" myid to" tho' moo jain" sho' byid nyid nyangnu" gi xangshid" moo nyangnu" gungdu nyang aseing moo xoin" to' byid: ago". Hau: thang: ri Aseing myid vho: ziyo' dakhyoo"- pang" thoug byid: da" khyoo: moo to' byid: ago". Hougsu" nghoid yoomo xangshid" mo yoovoin, yu zei: so' nyid bye:- Titu ri he: alu yo' sen: lho: nanu" da" gooki" lid shug byid: da: moo" bain sho' nanu" ri pang" thoug nyid baja" ngoonu" gi nyang: ri joug jhoin" nyid. Nanu" gi loem" jeing" da" khyoo: moo we dang: ji khyoo: moo we' lasi laleug, moo we' nanu" da" pang" thoug nau emyed moo we' ngoonu" ri jheddab da" khyoo: moo we' nanu" myo tham: joeb byeung" nyid boem bye:. Hougsu" nghoid yoo mo he: da" jheddab nheigloem: yo' doo" zho" da" moozoo" moo we' nanu" amyung, ashoo" loo: za: Alu kaid wa ziri we' ngoonu" myid vho: nyid.
Hidsu" tid zigi amyeung" khyo" tarha" khyo to" zi anghoid. Gootu: byu yi da" pang" thoug khyoo: moo jheddab nheigloem: khayhi' gyi: bo ziri" tid kyo" ziyo' nanu" da" jhed kang: da" nheigloem: emyed, ri se' yu wa shid re" tid zi nghoid. Nanu" gi ngoonu" Aseing Yesu Khristu ri se' nyid boem ago" Aseing Yesu gi nyang: di su: nghoid loug- nanu" da" shid re" nya gungdu: ri sho" jhen: byu bue" loo" nhang: bye:. Nyang: asho" ajhen: koid jangmo nanu" yo" de, lo boem bye:.
10 He: da" alu byid: ziyo' sen: lho: ngoo myid yu" khyo" nghoid rigi lid loo bye: zain nyid moo nanu" zei shed" to" da" moo zoo" ri akhid" zei: kyoeb pyam rigi nanu" shid mo gi wa zi nghoid. Nanu" gi jheddab emyed yo' byid: nau da" nheigloem: shid boo mo, za: we' anghoid alu: xangshid" kaid byid: mo, nghoid. 11 Houg: yoomo hau: moo" ri xo' zei: pain, pyam ge'. Nanu" gi hau: moozoo" ri myid soin' yhe" lo" jang" moo nheig, loem: to'- vho: ngei boem ziyo' dakhyoo" ti" nanu" yo": hain: yhi' moo nheigloem: to' lho: zei: pyam ge'. 12 Nanu" moo byid: gam nau da" emyed bo vho" ngei nyid boem rigi Mangsoo gi nanu" yo" byid: yhi' mo byid: da" alu joem ri lhoem: kham yu wa zi nghoid. Nanu" age bui" ziri Mangsoo: gi mho' wa zi anghoid.
13 Khasu" wim gari nanu" ri yoovoin, lid: nhang: lho: gootu: byu yi da" yoovoin ri soem" nhang: wa shid re" ngoo koid nyid zi anghoid. 14 Nghoid loug we' akhid" ayo, moo nanu" gi agoin agoo" yo'" yu nyid boem yoomo ca" yo, nyid bang: ri pang" thoug wa shid re" gi young" du nyid zi nghoid. Danyid" bid nyid ri nyangnu" agoin, agoo" yo" lo wigi nanu" moo ca" yo, nyid nghoid rigi nyangnu" we' nanu" ri doem tau" pang" thoug byid: lo boem wa nghoid. Hid: khyo" wigi nyang: cang" dakhyoo" ti" yo" pang" yo" thug go". 15 Jhoem: mungdang: moo myoo" sho' yo" zheung" young: too" su: we' gutu: lid sho' jain" yoo" wa zi anghoid. Dajhi' za: te: yo" zheung" yu too" su: we' soo" soo" atham: wa zi anghoid? ga: wigi tid to" ziyo' dakhyoo: ti" nghoid.
16 Nanu" ri pang" thoug byid: wa shid re" ngoonu" moo nheigloem: to' vho: ngei nyid ziyo' dakhyoo" ti" Titu ri we' boo nhang: da" Mangso jeju" ri khayhi' coung" nghei joyoo nghoid lha". 17 Titu gi ngoonu" mho' tid da" dang: ri tam: gyo: ziyo' bo pang" thoug wa nheigloem: we' nyang: moo bo nyid yoomo nanu" jhang khyoo: ri" wa shid re" nya: myid mo nyang- myid phyed bye:. 18 Hau ngeibu: mungdang: kho" kyo" da" mo: voin vu, da" khyoo: moo Phoung byu yi dangain" bang: da" shid moo myid loem to" da" mangnhung" phoo' dayug ri we' ngoonu" nyang: yo' dage" nhang: kaid. 19 Hau: tho' moo gootu: hidsu" jheddab da" myid yo' pang" thoug da" alu: ngei khyu: da" moozoo" moo we' ngoonu" yo' dage" so" yen" wa shid re" phung: byu yi lo, tu: khyen: nyheung' too" shau" su: dayug we' nyang: nghoid nyid. Hau: khyoo: gi Aseing da" myonhoo: phung" yoeb ri thoin" pang" byid: wa shid re" yo' ngoonu" da" bo pang bo thug nau da" emyed ri we' toin" shed wa shid re" nghoid nyid.
20 Hidsu" gau yi ngei pyo: ziyo' byid: da" alu ri ci: yhoung: lo" khyoo: moo hang" we' nyhang" ri yooboo foin: jang: ajo, baja"- zid" lhid nyid ge'. 21 Hau: Aseing da" shidkhoin" moo za: anghoid- byu da" shid moo we' deingmain" du young" khyo" moo" zei: wa shid re" gi ngoonu" da" myid young nyheung soin to" da" khyoo: nyang: nghoid bye:.
22 Hougsu" nghoid yoomo ngoonu" gi hau: da" mangnhung" eig yug yo' dage" gootu mangnhung" Khristain dayug ri we' bo nhang: kaid. Hau: yug ri ngoonu" myo" sho' lheung: jham" ca: yu" ri nyang: gi khanham we' gau yi ziyo' bo" pang" thoug nyid su: nghoid ziri yo" myang yu boem bye:. Akhid" nyang: gi nanu" tho' moo gye" myid loem" da" emyed bo nyid yoomo bo pang" thoug wa da" vho" ngei emyed zhu: nyid ziri myang. 23 Titu yo' sen: lho: tid shang ein: rigi nyang: gi nga" da" bo pang" thoug su: nghoid wigi nanu" ri pang" thoug wa shid re" ngoo yo' dage moo" shoin" zei: su: nghoid nyid. Nyang: yo' dage" bo cang re" da" gootu: mangnhung" eig yug gi phung: yi da" lagyoo: yi nghoid wigi Khristu da" myonhoo: phung yoeb ri thoin" pang su: eig yug we' nghoid. 24 Houg: yoomo nanu" yo' sen: wigi ngoonu" myonhoo: sho: phau: khuang khyoo: gi deung khyoo: ri phung: byu yi gyeung" si goo" baja" nyangnu" ri nanu" da" jheddab nheigloem: toin" shid ge.