5
Mougmyid tho' moo ngoonu" nyid nyid da" zoem" ein: da" yhoem: gungdu: gi byo, lo" uri Mangsoo gi mougkhung: mougdi tho' moo ngoonu" nyid wa shid re" nyang: koid da" apyaid atoo: moo ngoonu" nyid wa shid re" nyang: koid da" apyaid atoo: moo dageing: jo, da" yhoem:- ngoonu" yo" ziri ngoonu" se' nyid boem. Akhid" hau: zoem" moo ngoonu" loung" jo, ri mougkhung: mougdi mo yhoem: ri ngoonu" yo" void zhoung" yu wa gye" nyang: vho: lang" nyid boem yoomo ngoonu" nookyeing" kyeung" zoore danyid boem. Hougsu" bain zhoung" yu lang" ngoonu"- gi gungdu: aboo lo: mo, bue" loo" wa zi anghoid. He: da" mougmyid mo zoem" moo loung" jo, shi" uri voin vu, wa da" yoo voin wigi nhe' zeug ziri kham zo: da" nheigloem: yo' nookyeing" kyeung" nyid. Hougsu" nookyeing" zigi he: da" mougmyid mo gungshoo" ri khyoid pyam nau boem zi anghoid. Shid: byug se' da" zi ri apyaid atoo: kangso dei jang" khyoo: nyid loo" wa shid mo mougkhung: mougdi mo da" gungshoo" ri ngoonu" khyoid zhoung" yu noug yoomo nghoid nyid. Hougsu" thid loo" ca" da" khyoo: ri ngoonu" shid re" nyheung too" byid: su: gi Mangsoo nyang: nghoid. Nyang: gi ngoonu" shau: kham: yu wa da" jeju" dangain" da" shid mo joeb byeung" tung" koid byid: khyo" wigi nya: da" Venyi: gi ngoonu" ri byid: bye:.
Hougsu" nghoid yoomo ngoonu" gi khanham we agyug avoem yoem: vhoo" yo' byeung" jo, boem, He: da" mougmyid gungdu: yhoem: moo za: daloung" jo, jo, gi Mangso da" yhoem: yo' we: gang: jo. Khasu" wim gari ngoonu" da" kangso dei da" khyoo: gi- myo, jid" yo" myang jang" moo anghoid loo: za: loem" jeing" khyoo: moo kangso dei nyid boem zi nghoid. Ngoonu" gi yoem: moo" so' zeing yo' byeung" jo, boem yoomo gungdu: da" yhoem: ri to" pyam kho' lho: hau: Aseing yo' dage" nyid nyid wa ziri je" vho: ngei nyid boem. Hougsu" nghoid yoomo ngoonu" gi hid: moo nyid jo, da" gungshoo" yhoem: moo nghe: khau: nyid shi" ri nghoid loug we' foo: moo nghe: khau: nyid ri nghoid loug we' Nyang: ri vho ngei nhang: wa zigi gootu: dangain" tho moo je" yhau: gyen: da" moo" nghoid. 10 Khasu" wim gari ngoonu" dangain" mo, gi tarha" dang: phyed zi shau" wa shid re" Khristu da" tang myhang shid moo thu' yab, ca" boem wa zi nghoid. Hau: da" uri ngoonu" dayug yo" dayug gi He" da gungshoo" yhoem: moo nyid nyid shi" uri zei so" lid loo bye: da" ge da" moozoo"- age da" moozoo" shid re" eung: ziyo' dakhyoo" ti" shau" kham zo: boem wa nghoid.
11 Ngoonu" gi hau: Aseing ri gyoug phau" ein: zigi ce: noem nghoid ziri se' boem yoomo byu gootu: bang" ri yo" mhoid" yu wa shid re" yoem: kaid thoug shang" nyid boem. Mangsoo gi ngoonu" da" khyoo: ri jid" jid" nug, nug, se' nyid. Nanu" we' nanu" nya: da" nheigloem: khoug: moo nga" da" khyoo: ri goo" lhoo: se' nyid boem bye: ein: wigi ngoo nheig byu nyid. 12 Hidsu" ein: tid jang" moo ngoonu" gi- nyang: tu: nya: da" ge khyoo: ri nanu" da" shidkhoin" moo phau: khuang shug nyid zi anghoid ngoonu" da" atho' moo nanu" ri yo" phau: khoung' wa shid mo za: nghoid nyid. Nanu" gi byu dayug ga: asam" aved, ri ayu" loo: za: tungbau asam:" aved, ri za: yu" wigi phau: khuang si' mo, nghoid ziri agung: yab shug wa nghoid ago". 13 Ngoonu" gi gyeing" nyang: agyeung: loo: mo, nghoid boem bye: la". Agyeung: loo: nghoid rigi Mangso shid re" agyeung: zi nghoid. Hougsu" anghoid lang" gi ngoonu" gyeung: nyid boem la". Gyeung: nyid nghoid rigi nanu" shid re" gyeung: nyid zi nghoid. 14 Ngoonu" ri Khristu da" jheddab nheigloem: yo' vhoeb khang" too" bye:. Khasu" wim gari byu dayug gi dangain" mo, shid re" shid: kham: bye: ziri ngoonu" nheig shid: nheigdeig, boem bye:. Hougsu" wigi hau: khyoo: gi nyang: shid: kham: bye: jang" moo dangain" mo, bo shid: kham bye: ga: da" dangkang: nghoid nyid. 15 Kangso dei nyid mo, we' nyangnu" da" akyu" shid re" kangso adei loo za: nyangnu" shid re" shid: kham: lho: doem dei to' loo su: shid re" za" dei nyid goo" baja" nyang gi dangain' bang: da" shid mo shid: kham: bye:.
16 Hougsu" nghoid yoomo ngoonu" gi akhid" mo wigi hang" ri we' byu da" akhyoo" laki khyo" cang lho: tarha" dang: phyed khyoo: akoid boem loo. Xangshid" ayo, moo Khristu ri byu da" azhang khyo" cang lho: soin: dang: phyed da" khyoo: koid lid lo boem bye:. Nghoid loug we' akhid" hougsu" akoid lo: boem. 17 Hang" nghoid loug we' Khristu yo' dadeing: daloem: za: bue" lo" byug lang" gi- nyang: gi byu seig, bue" loo bye:- shid" phyang" mo axau" gu: gi lid lo" yu" bye:- Yu" ge' dangain" gi aseig za: bue" loo bye:. 18 Hau: khyoo: dangain" ri koem gi Mangsoo zei: bye: zi nghoid. Mangsoo gi ngoonu" ri nya: gyivoo bue" nyid jangmo nya: bidnoem yi bue" loo wa shid re" Khristu Yesu da" khoug: khyo" thid loo" nhang: bye: ziyo' byu gootu: bang: ri we' nya: bidnoem yi bue" loo wa shid mo ngoonu" ri moo" zo" yoo voin ab byid: too" bye:. 19 Ngoonu" kho" kyo" da" mungdang: gi Mangsoo gi Khristu mo byu nyid moo nyid bang: ri nya: bidnoem bue" loo nhang: da" mungdang: nghoid nyid. Mangso da" byu yi yooboo joem ri axoem" too" byid: tho' moo agoo"- nyangnu" ri nya: bidnoem yi bue" loo sho' kha" yhi' koid bye: khyoo: ri tid sho kyo" da" mungdang: ngoonu" ri byid: too" bye:.
20 Houg: su" nghoid yoomo ngoonu" gi Khristu da" khyoo: tid, lid: loo bye: da:- Lagyoo: yi nghoid wigi Mangsoo nyang ngoonu" da" nhoid khoin" thui: khyo" nanu" ri khe: lhoung nyid zi nghoid lho: Mangsoo gi nanu" nya: gyivoo yi bue" nyid jangmo nya: da" bidnoem yi bue" loo nhang: baja" ga: Khristu da" gungthid ngoonu" mho' sang: nyid boem. 21 Khristu gi ce: yau: noo yooboo adab su: nghoid loug we' ngoonu" gi Khristu yo' dadeing: daloem: za: bue" lo wigi Mangso da" deung: byeung" ziri kham: yu wa shid re" Mangsoo gi Khristu ri ngoonu" shid re" nyhang" yhang: te" yooboo yo" su:- bue" loo nhang: bye:.