4
Mangsoo gi nya: nyeig khyeig shoo" go: da" nheigloem: yoomo ngoonu ri he: da: moozoo" voin wa moo" ab byid: bye: yoomo ngoonu" moo nheigloem: gyau:- yoem: shoin: wa khyoo: aboo. Nyhang" gi yhoem" too" zau" to"- nghoeb to" da" moozoo" asho ashed: moo" dangain" ri ngoonu" jhoid she: pyam boem bye:. Ngoonu: gi mhau' fain" khyo" akoid loo: za: Mangso da" mungdang: ri we' mhau' fain" vo- aphug alhoin" atid boem ngoonu" gi Mangso da" shidkhoin" moo hau: deingmain" da" khyo" bidbang, moo kangso yeug coo: phyu: da" nheigloem: bo loo sho' zei: so' so" yen" boem. Ngoonu" kho" kyo" da" ngeibu: ludang: ri byu yi ato' se' gyo: nghoid rigi hau: Venyi: moo soem" joem: loo" mo, za: ase' gyoo: zi nghoid. He: da" mougmyid tho' mo akhyeing" ashoeb da" Mangsoo ga: da" yu satan phoo' gi nyangnu" da" neig loem: ri mougcoid, yo' nghoeb too" byid: bye: yoomo nyangnu" aloem" jeing" boem loo. Myo, jed too" nhang" bye:. Nyhang" gi Mangso da" voiddu, gungdu nyang: nghoid nyid nghoid loug we' Khristu da" phung" yoeb da" khyoo:- hau: ngeibu: ludang: mo thu' lo da" bidbang, ri amyang nhang: loo: nghoid da. Khasu" wim gari ngoonu" gi ngoonu" nya: khyoo: ri kho" kyo" zi anghoid. Yesu Khristu gi Aseing nghoid nyid khyoo:- ngoonu" gi Yesu yoomo za: nanu" da" deizoo: yi nghoid da" khyoo: ri dakho" kyo" boem. Yesu Khristu da" myonhoo: mo bang lo da" myonhoo: phung" yoeb khyoo: nanu" se' loo baja"- nyha" da" nheigloem: moo bidbang, zhoo: byid: da" Mangsoo: gi Mougcoid mo bidbang, bang, loo wa ga: wigi tid da" Mangsoo nyang: nghoid bye:.
Nghoid loug we' hau: athang, agoin da" yoem: moo" so' moo" koem gi- ngoonu" jhang mo anghoid- Mangso jhang mo nghoid nyid khyoo: ri yo" toin" shid baja". He: Venyi: yoem: so' ziyoo yo" jo, da" ngoonu" gi yu" maya" moozoo" jhoem yo' za: du nyid. Ngoonu" gi daso' so' kyikhyeig yau: khe" khyoo: shau" boem. Nghoid loug we' thoung" mhoin' pyam zi shau" zi anghoid. Dalheung: lheung: vhu" gyam gyam zi shau" boem- nghoid loug we' nheigloem: thang byug boem zi anghoid. Ngoonu" ri gyi koid mo, myoo" sho' nyid boem. Nghoid loug we' bidnoem dayug we' aboo loo. Khanham we' anyid yu" boem. Dalheung: lheung: noophyoo" gye" shau" boem. Nghoid loug we' lhu: phyo' lhu: shoin pyam zi anghoid. 10 Aseing Yesu gi ngoonu" da" gungdu: moo dei loeb kangso kaid byid: nyid ziri bang, bang, se' loo wa shid mo ngoonu" da" shid: se' da" gungdu: joem gi Yesu kham zo: lid loo bye: da" shidgyoin noogyoin kyikhyeug yaukhe" khyoo: ri khanham we' kham zo: nyid boem. 11 Yesu da" kangso dei nyid khyoo: gi ngoonu" da" shid: se' gungdu: moo bang thu' loo baja". Ngoonu" nya: kangso dei nyid bidnyid gu: moo ayo, khang" moo" Yesu shid re" shid: kham: wa khyoo: moo so" lo" nyid boem zi nghoid. 12 He: zigi ngoonu" jhang moo shid: loo" no lo" da" tarha" gi moo" zei: nyid zi nghoid. Nghoid loug we' nanu" jhang moo koem gi kangso dei da" tarha" gi moo" zei: nyid.
13 Jhoem: mungdang: moo Ngoo loem" jeing" yoomo ngoo kho" kyo" ga: wigi tid nyid ziyo' dakhyoo" ti" ngoonu" we' loem" jeing" yoomo kho" kyo" zi nghoid. 14 Aseing Yesu ri shid: jangmo doem dei to'' loo nhang" da" Mangsoo gi ngoonu" ri we' Aseing Yesu yo' dage" doem dei to'' loo nhang: wa zi nghoid yoomo nanu" yo' dage" nya: shidkhoin" moo shu" yu wa zi nghoid ziri ngoonu" se' nyid boem. 15 He: da" khyoo" dangain" gi nanu" moo akyu" bo loo wa shid mo nghoid bye:. Mangso da" jeju" ri kham: yu da" byu yi we' je" je myo: lo ziyo' dakhyoo" ti" Aseing da" myonhoo: phung" yoeb ri jeju" boin: coung" nghei- akyu" mho' da" khyoo: joem moo we' je" wigi myo, tham: loo wa zi nghoid.
16 He: da" khyoo: joem yoomo ngoonu" gi khanham we' nheung loem: abyo,- yoem: agyau: boem. Ngoonu" da" tungbau shoid khyo" yo' shau" myang nyid da" xangsu alhoo: gi yen, yen, za: byo, byug lo" nyid bye. Nghoid loug we' akhoug: mo Venyi: alhoo: gi nyid: khang" moo"- Aseig doem soin' byid: nyid ziri yo" shau" kham: yu nyid boem. 17 Hau: lho: ngoonu" daso' dadam thoung" shau" nyid da gyug dain phoo: dajhi' dathang: gi je" gyi: ziyo' apyaid atoo: mo myonhoo: phung" yoeb ri kham: yu nhang: wa zi nghoid nyid. 18 Ngoonu" gi myo, jid" yo' yu" myang ja"- zi ri za: vhoo: bo nyid zi anghoid loo: za: myo, jed" amyang: ja: ri she- dayu" vhoo: bo nyid boem. Khasu" wim gari myojid" myang nyid da" zi joem gi daso' dadam za: jo lho: myo jid" ayo" myang ja: gi apyaid atoo: moo dageing: jo, jo.