13
Akhid" ngoo gi nanu" jang" moo soem" lheung: eing: doem ju" ri wa zi nghoid. Jhoem: mungdang: moo we' yooboo foin: te" khyoo: daja: ja: bo ri bo se' da" sagsi eig yug- hougsu" anghoid lang" eig yug mo jain" mo, da" dang: yo' geingteing jo, nhang: wa nghoid, ga: wigi tid to". Shid phyang" yooboo koid lid lo yu" bye: mo, yo' gootu: dangain" ri ngoo tid nau nyid. Hau: khyoo: ri shid phyang: ngoo eig. Lheing: lheung: ju" re" uri tid bye: ziyo' dakhyoo" ti" Akhid" nanu" yo' we: gang: nyid uri we' ngoo dalheung: doem tid shi" wa. Hau: khyoo: gi thang: lheung: ri ngoo doem ju" re" uri nanu" dayug we' dang: phyed shen" yhen: jangmo yo" loid goo" wa zi anghoid. Khristu gi ngoo moo dang: tid to" khyoo:- sagsi joem ri nanu" vho: myhoo shau" myang boem wa nghoid. Khristu gi nanu" yo' xo' tei" moozoo" zei: lo" uri nyang: gi yoem: nu: nyid su: anghoid. Nya: da" yoem: vhoo" so' moo" gi- nanu" moo toin' shed, loo wa nghoid. Khasu" wim gari Aseing gi pyang" zeung moo baid jen" said to" uri yoem: neung: jang" moo ju" nghoid loug we' akhid" gi Mangso yoem: moo" phung" yoeb khoug: moo dei nyid bye:. Nyang: we' Khristu yo' dayug za: nghoid nyid boem yoomo yoem: neung: nyid boem. Nghoid loug we' nanu" moo bo da" yoem: moo" so' zeing yoomo ngoonu" nyang: yo' dage" dei nyid boem wa nghoid.
Nanu" gi hau: loem" jeing" khyoo: moo kangso dei nyid mo, nghoid la". Anghoid la". Yo" myang si' wa shid re" nyang: nya: gungdu: ri myid: phoid sho: yu" nyid ge. Nanu" bain sho' soem" joem: loo" mo, anghoid rigi Khristu Yesu nanu" yo' nyid nyid da" khyoo: ri nanu" gyeing" nyang: yo" se' loo wa zi nghoid. Nanu" gi gyo" soem: pyam mo, anghoid ziri" nanu" nyang: si' mo, nghoid goo" wa ein: ngoo myid loem nyid. Nanu" gi yooboo adoem koid wa shid re" ngoonu" gi Mangso jhang moo akyu" mho' nyid boem. Hau: zigi ngoonu" jham" ca: yu" khyoo: ri oung: loo" wa shid re" toin" shid khyoo: anghoid. Ngoonu" koem gi gyo" soem" pyam mo yhang: ti" nghoid loug we' nanu" deingmain" khyo" koid nyid wa shid re" damho, byid: nyid. Khasu" wim gari ngoonu" gi deingmain" khyoo: ri thug theung khyoo: ciwe' akoid mo, nghoid. Deingmain" shoid khyoo: za: dayab boem. Hougsu" ngoonu yoem: neung: nyid wigi nanu" gi yoem: bo nyid rigi ngoonu" gye" ngeibu gau yi boem. Houg: yhang: ti" nanu" joeb byeung" bang: bue" loo wa shid re" we' ngoonu" akyu" damho, nyid. 10 Nanu" yo' ve: lain nyid uri ngoo he: da" mougsoug" ri lhid"da" khyoo: gi ngoo nanu" jhang moo ju" re" uri Aseing ngoo ri byid: to" da" myeung" akhang" gi nanu" ri lhu: phyo' pyam wa shid mo anghoid. Nanu" ri so' koid so' nyheung' wa shid re" nghoid.
11 Nga" mangnhung" yi we"- akhid" ngoonu" vhu" kaid boem. Nanu" dangain" bang: ngei pyo: nyid goo" baja" o". Joeb joeb byeung" byeng" yo" bue" nyid sho' xo' lho: yoem: kaid thoug shang nyid ge'. Nga" mho' nyhoem: dang: ri tam" gyo: wigi nanu" nyang: cang" veing" go" lho: ngei pyo: myenjham" nyid ge'. Jheddab emyed bo ziyo' ngeipyoo: nhang: da" Mangsoo gi nanu" yo' dage" danyid nyid baja" o".
12 Nanu" nyang: cang" nya: bi: nya: nhung" su" boobug bug go" nyid ge'. Mangso da" byu yi dangain" bang: gi nanu" ri vhu" kaid ago".
13 Aseing Yesu Khristu da" akyu" jeju"- Phoo Mangso da" athang agoin jheddab emyed yo' gyeungshang: Venyi: da" zoem" khau: khyoo: gi nanu" dangain" bang: yo' dage" dajo, jo, baja" o".