12
Phau: khuang khyoo: gi akyu" aboo nghoid loug we hau: Aseing jhang mo pang shug da" khyoo: yo' myo, myang yo' sen: wigi ngoo phau: khuang kyoo: tid shi" wa. Khristain byu dayug gi lid loo" bye: daxe: myid: zain ayo, moo myhang: thang da" mougkhung: soem" pyam: moo shu" dang: do, lo" zi shau: khyoo: ngoo se' (Hougsu" shu: dang: do, lo" ziri gungdu: yo' nghoid loug hougsu" anghoid lang" gi gungdu: abo la' zi ngoo asi Mangsoo za: dase' nyid. Ngoo doem pug tid ba hau: byu ri pharadisu ju" sho' shu" dang: lo: zigi ngoo se. Hau: zigi gyeing" nyang: bue" la". Hougsu" anghoid lang" gi yhoebmo, za: te: nghoid la" Mangsoo: za: dase. Hau: khyi moo nyang: shoug" gyo: khyoo: gi xangsu: byu yi da myeung" khyo" age tid. Bu yi da" nhoid moo ayo" loung: ja: nghoid. Hougsu" yoomo hau: yug da" khyoo: ri ngoo phau: khuang wa. Nghoid loug we' ngoo nyang: khayhi' yoem: nu: nyid tho' moo gootu- nga" khyoo: ri ngoo nyang: aphau: khuang noug. Ngoo phau: khuang noug nghoid loug we' akoo" apyoid, su: ngoo bue" loo" wa za nghoid. Khasu" wim gari ngoo gi deingmain" khyoo: za: tid wa zi nghoid nyid. Nghoid loug we' ngoo aphau: khuang wa_Khasu" wim gari hang" nghoid loug we' ngoo zei da" moo" yo' tid da" dang: ri yo" myang boem wa nghoid wigi ngoo ri se' da" tho' moo ngoo ri myid gyi: khyoo: gi aboo goo" baja".
Ngoo myang da" lo" thang aved' alhoo: yoomo ngoo moo nheigloem: gyi: phau: khuang da" khyoo" aboo baja". Nga" da" gung moo zu: no da" zi daja kham zo: nyid. Hougsu" zu: nho: da" ziri satan wigi nhang: kaid da" lagyoo: phoo' yhang: ti" ngoo ri baid nhoug wigi nga" da" phau: khuang zi ri khyau" pyam byid: nyid. Hau: zu: nho: noo ri shoem" pyam byid: wa shid re" ngoo gi hau: Aseing jhang moo soem" lheung: ju" sho' akhyu" mho' bye:. Nghoid loug we' Mangsoo gi ?Nga" jeju" gi nang ca" da" khyoo: shid re" ge" nyid bye:- Khasu" wim gari nang: yoem: nu: lo" uri nga" yoem: moo" so' moo" gi reung: thang nyid da:? ga: wigi ngoo ri tu" byid: bye:. Hougsu" nghoid yoomo Khristu da" yoem: zeing so' moo" gi- ngoo ri goemloem byid: lho: khau nghi: joyoo nghoid nyid tho' moo agoo"- ngoo yoem: nu: loo" yoomo ngoo phau: khuang joyoo nghoid nyid. 10 Hougsu" nghoid yoomo ngoo gi Khristu yoomo kham zeing: da" yoem: nu: khyoo joem zeing:- kyikhyeug, khyoo:- pyi: shoo: lug lheung: khyoo: yo yau: khe" khyoo: yoomo gau yi nheigdeig nyid.
11 Ngoo gi koo pyoid yhang: te" zi nghoid nyid nanu" gi ngoo ri khoug su: bue" loo" nhang: zi nghoid. Nanu" gi ngoo ri bo thug khain: mo, nghoid ca" nyid. Khasu" wim gari ngoo ci" we' anghoid su lang" gi nanu" da" yhau: gyen: da" Lagyoo: yi tho' moo khasu" koid loug nge loo wa zi anghoid. 12 Ngoo gi Lagyoo: dayug nghoid khyoo: sagsi toin" shid wa shid re" myo: thang" da" alhoo: again joem yo' mau" pho" moozoo"- joem ri nanu" da" shidkhoin" moo nheigloem: gyi: sheung: ziyo' toin" shed lid lo yu" bye:. 13 Nanu" jhang mo pang" thoug da" ngei ayu tho' moo agoo"- ngoo nanu" ri gootu: phung: yi yo' azhang nyhoem: khyo" koid lid lo yu" bye: la". Hougsu" myonhoo: khyen: da" yooboo koid shoid loo bye: nghoid rigi yooboo ri khyoid byid: ge.
14 Akhid" ngoo nanu" jhang moo soem" lheung: ein: lheung: re" ju" loem: wa shid re" jen" jen" nghoid nyid bye:. Ngoo nanu" ri gootu: ci: amho' noug nyid loo: wa. Khasu" wim gari ngoo vho: da" khyoo: gi ngei sheung: anghoid. Nanu" ri za: ngoo vho:- gyeing" nyang: ga: rigi myid: yi zoo: yigi nya: myhi' nya pho yi shid mo ziyoo jonu" young: too" byid: khyoo: aeung. Nya: myhi' nya pho she, nya: zoo: nya: myid: yi shid re" young: too" byid: eung: nyid. 15 Ngoo gi nanu" ri pang" thoug wa ein: nghoid rigi ngoo yo" zi dangain" yo' nga" gungdu: lhang" ci: yhoung: pyam wa zi vho: ngei nyid su: nghoid. Ngoo nanu" ri gye" jheddab yoomo nanu" gi ngoo ri dajhi' za: te: jheddab wa zi nghoid la".
16 Houg: yoomo ngoo gi nanu" ri yoovoin lid: nhang: su: anghoid da" khyoo: nanu" myid eing: yhen: yu boem goo" wa nghoid. Nghoid loug we' ngoo gi nanu" ri mhau' fain" khyo" lid, mhoid thoung: to" lho: kuang nyid ga: byu dayug yug gi tid loo goo" wa. 17 Ngoo kha khyo" mhoug zoo: fain" zo: lo yu" bye: la". Nanu" jhang khyoo: ngoo nhang: kaid da" lagyoo: yi mo khayug loem: nanu" ziyoo jonu" joem ri shoem" zo nyid go" la". 18 Ngoo gi Titu ri nanu" jhang khyoo: ri" wa shid re" mho' lho: wigi da nhang" kaid. Gootu: mangnhung" Khristain dayug we' nyang: yo' bo cang re" Titu gi nanu" tho' moo amyeung" ci: lho: jhoid shoem" zo: yu" la". Nyang: yo' ngoo gi myid soin: Khyoo: daloem: za: shoin" wigi khyoo: daja: moo za: so" zi anghoid la".
19 Ngoonu" gi ngoonu" nya: gung- ce: yooboo ayoo" ein: shoem" goem dang: tid bang: nghoid ga: jhoo: go" la". Hougsu" anghoid o! Khristu tid nhang: nau: ziyo' dakhyoo" ti" Mangso shidkhoin" moo ngoonu" tid sang: nyid boem. Hau: tho' moo gootu: jheddab mo, we"- ngoonu" zei: so' khyoo: dangain" gi nanu" ri pang" thoug wa khyo" za: dakoid nyid boem. 20 Nanu" jhang moo ngoo ju" re" ri ngoo vho:- myang nau khyo" nanu" anghoid nyid lang wa ziri we' nanu" we' hau: vho: khyoo:- myang nau khyo" ngoo moo anghoid nyid wa ziri we' ngoo gung: yug yau nyid. Hau: lho: ngoo gi nanu" moo myeung" myoo: yhoo: she: da" khyoo: noo" goo" zoo go" da khyoo:- nheig, yo phoin: khyoo:- nyang: nya: akyu" za: sho: khyoo: dayug yo' dayug gei sang: shang pyang: go" khyoo: dang: so' so' go" khyoo: ngeug goo hi: go" ziyo' atoug" ashu: lu: fu: go" adu aveing" go" khyoo: ri ngoo re" myang wa ziri gung: yug yau nyid . 21 Nanu" jhang khyoo: ngoo doem ju" re" uri Mangsoo gi ngoo ri nanu" da" shidkhoin" moo doin: khyo' pyam zi shau" wa zi we ci' nyid. Akhid" nyid ju" sho' ri we' nheigloem: athid loo: za: aved asam" byo, lho: nyam ziyo' gaintho' zung: mo, myoo" sho' nyid boem yoomo ngoo ngoug byid thu' wa ziri ci' nyid.