10
1 Nanu" da" shidkhoin" moo sam" dab nu" nham wigi nheigloem: khyo' nyhoem: khyoo: toin" shid wigi nanu" yo' ve: gang: loo" lang" asho, agyug nheigloem: toin" shid" su: nghoid ga: juang" yi shau" su: ngoo Polu nyang:- nanu" ri mho' tid kaid.
2 Khristu da" nu" nham' khyo' nyhoem: da" emyed ri yu" lho: nanu" jhang khyoo: ju" re" uri voem" myid ci: shug jang" moo aju" baja" mho' tid kaid. Khasu" wim gari ngoonu" ri mougmyid da" vhoo: boo myo, no, khyo" cang: lho: gau" soin' lo da" emyed yo' kang: dei nyid mo, nghoid ga: wigi tid nyid mo, ri agyug avoem lho: gyeing" nyang: voem" tid.
3 Nanu" gi mougmyid dang: moo nyid mo, deung: nghoid loug- mougmyid da" nyheung' soin' khyo" meing: zain: nyid zi anghoid.
4 Ngoonu" da" meing: zain: jang: moo ci: da" gyizi gi mougmyid xangsu: byu yi ci: da" gyizi anghoid. Geingteing jo, da" gyidab: joem ri yo" phyo' pyam da" Mangso yoemso yo' byeung" da" gyizi gyikhoo: joem nghoid nyid. Ngoonu" gi adeung amain"- ngeug go" da" dang: joem ri dazain: lhu: phyo' boem.
5 Ngoonu" gi Mangsoo ri yo" se' koung lo da" phajhi" ri lhu: keug lhu: kyo' khyoo: dangain" ri zain: said lo" boem. Ngoonu" gi byu yi myid soin: khyoo: dangain" ri myeug, tei" to" wigi Khristu da" dang: ri tam" gyoo: nhang: nyid boem.
6 Nanu" gi ngoonu: dang: ri byeung" sho' gyeung" tam" gyo: nyid ziri yo" se' loo lang" ngoonu" gi alhid, azid" adeung amain" da" khyoo: ce: ja: ri we' dam kaid wa shid re" jen" jen" nghoid.
7 Nanu" ce: ja" khyoo: ri we' atho' dapyam: khyo" za: yu" nyid ago". Ngoo gi Khristu yo' sen: su: nghoid nyid, ga: wigi nyang: nya: gungdu: myid jho: nyid su: dayug yug bo la". Gyeung" to' nghoid rigi nya: gung ri nyang: soin: yu" baja"- Khasu" wim ga: ri nyang: gi Khristu shoid khyo" byu nghoid nyid ziyo' dakhyoo" ti" ngoonu" we' Khristu da" shoid mo byu yi nghoid.
8 Ngoo gi Mangsoo byid: da" akhang" aya: yo' sen: lho: latu' lid sho' to' phau: khuang nghoid loug we' hau: akhang" aya: gi nanu" ri lhu: phyo' pyam wa shid re" anghoid. Nanu" ri so' koid tu: to' kaid wa shid re" danghoid.
9 Houg: yoomo ngoo foin: kaid da" mougsoug" joem yo' nanu" ri kyoug, nhain, da" aved, athu' nhang: noug.
10 Khasu" wim gari byu dayham" gi ?Polu da" mougsoug" joem gi gye" no, lho: yoem: moo" so' moo" bo" da" mougsoug" nghoid. Nghoid loug we' nya: gung nyang: ngoonu" yo' dage" nyid uri nyang: gi yoem: nu: lho: myonhoo: phung" yoeb abo ziyo' nya: dang: khoin" joem we' ce: joid: we' abyeung" zi nghoid? ga: tid boem ago".
11 Houg: yhang: te" da" byu yi se' gyo: too" wa zigi ngoonu" gi ve: gang: go" nyid da" uri mougsoug" lhid" kaid ziyo' dakhyoo" ti" byu gung nyang: nanu" jhang moo ju" re" uri we' houg: yo" dakhyoo" ti" ngoonu" zei: loo wa zi nghoid.
12 Gyung" ga: ri nyang: nya: gung ri coung" nghei tuto' da" byu jang" moo bo nghab kaid wigi ngoonu" da" gungdu: yo' nyangnu" avoem" tu goo" nghoid da. Nyangnu" gi nyang: nya: azhang ri se' ke' yu: wa shid re" nyang: nya: da" laki khoem: mhe' yu ago". Hougsu" ke' to" da" laki yo' ke' yu" nyid boem ago". Houg: te" mo, gi khayhi' gyeung" ko" fang: kyi: mo, nghoid lha!
13 Ngoonu" koem gi- phau: khuang wa da" laki mo lid lho: phau:khuang boem wa zi anghoid. Nanu" moo ngoonu" zei: voinvu, da" moozoo" yo' dage" Ngoonu" voinvu, wa shid re" Mangsoo nyang: ke' too": byid: da" moo zo" da" akhoug: moo za: ngoonu" phau: khuang.
14 Nanu" gi ngoonu" shid re" Mangsoo soin' too" byid: da" mo, nghoid yoomo ngoonu" gi Khristu da" ngeibu: ludang: ri nanu" jhang moo ci: re" da" uri- moozoo: kyoo" doem: lid sho' akoid boem.
15 Hougsu" nghoid yoomo ngoonu" gi Mangsoo: ke' too" byid: da" moozoo" mo lid lho: wigi byu gooji yi koid da" moozoo" yo' sen: wigi ngoonu phau: khuang dang: tid zi anghoid. Houg: su" koid wa tho' rigi khanham we. Mangsoo: ke' phyed too" byid: da" akhoug: moo ngoonu" da" loem" jeing" khyoo: gyi: yang" loo wa ziyo' nanu" da" agyoo: moo" je" wigi je" gyi da" moozoo" yo" zei: xo' loung: loo" wa shid re" ngoonu" nheig byu nyid boem.
16 Hau: thang: ri ngoonu" gi nanu" da" moug: khyoo" lid lho: wigi gootu: mungdain joem moo Aseing Yesu da" khyoo:- ngeibu: ludang: gi ri yo" kho" kyo" loo" wa nghoid nyid.
17 Nghoid loug we' jhoem: mungdang: moo myonhoo: shoo: noug su: gi hau: Aseing koid da" moozoo" moo myonhoo: sho: phau: khuang nyid baja"- ga: tid to".
18 Khasu" wim gari deingmain" da" myonhoo: ngeilang: shau" kham: yu su: gi nyang: nya: gung ri nyang:- tu: to' coung" byid: su: anghoid. Mangsoo wigi tu: to coung" nghei byid: zi shau" su: nghoid nyid.