9
1 Ngoo gi loid byoin da" akhang" yoo" su: dayug anghoid la" Ngoonu" da" Aseing Yesu Khristu ri myang yu" bye: anghoid la" Nanu" we' ngoo Aseing da" moozoo" zei: voin vu, lo da" bidnyid mo ashi" zei: loo mo, anghoid goo" la"
2 Byu gooji ngoo ri lagyoo: dayug khyo" alhoem: kham: yu boem nghoid rilang" gi nanu" gi gyeing" gyeing" nyang: lhoem: kham: yu eung: nyid. Khasu" wim ga: ri Khristu yo' daloem: za: bue" lo wigi kangso dei nyid mo, nanu" nyang- ngoo lagyoo: dayug nghoid deing' da" sagsi yi nghoid.
3 Ngoo ri: yooboo foin: lho: thougtheung loo bang: ri doem phoug tid wa da" dang: gi he: zi nghoid.
4 Ngoo nyang: zei: da" moozoo" yoomo ngoo zoo: wa shug wa akhang" yo" anghoid goo" la"
5 Gootu: da" lagyoo: yi- Aseing da" nya: nhung" bang: yo' lagyoo: Petru yhang: te" bang: da" khoo" shid: ri bo yu" cang wigi ngoo so" yen" da" joyoo joem moo: yhoem: seing: myhi' shu" yen" wa akhang" ayoo" la"
6 Ngoo yo' Barnaba nga" eig yug za: zoo: wa shug wa shid re" moo" zei: ca" nyid la"
7 Gyizoo: khayug gi nya: zookhoo: voin lho: meing: zain: da" moo" zei: yu" la" Khyam: moo" zei: zo: yu" mo, hang" we' nya: khyam: mo zabyid shi" ri aphyo' zoo: loo: nyid yu" boem la" yang zoem: bang: hang" we' nya: yang noug" ajhoeb' shoug byu boo go" la"
8 Nyid khang" moo" bue" nyid da" he: dang: khyang" za: we' anghoid shi"- tarha" khyoo" moo: we' houg: yo' dakhyoo" ti" tid nyid.
9 Gug, nang: nyid da" nu: nhoid phu" moo: mhang" kho' yo' azhoung" too" byid:- ga: Moshe da" tarha" moo: lhid" to". Akhid" Mangsoo gi nulei: joem riza:- seing" khoo" yoomo tid nyid la"
10 Nyang: hidsu" ga: tid nyid zigi ngoonu" shid re" tid nyid zi anghoid goo" la" Gyeing" nyang: ngoonu" shid re" lhid" to" zi nghoid. Yoothung" phug, su: yo' gug, shi" ri yham" yu su: gi nyang: nyang: yoo" wa da" gug, gam boem ri myid byu lho: dakoid nyid.
11 Ngoo gi nanu" moo: Venyi: ashi" ri asain" to" lho: nanu" jhang mo mougmyid da" ziyoo jonu"- akyu" jeju" ri ngoonu" shau" kham: yu nghoid rigi ngoonu" latu' lid da" khyoo: nghoid la"
12 Sara gooji yi gi nanu" jhang mo- yo" yu wa ga: nheig byu wa akhang" yo" boem rigi ngoonu" gi je" yoo" wa anghoid goo" la"
Nghoid loug we' hau: da" akho, akhang" ri ngoonu" ayu boem: hau: da" akho, akhang" ri yu wa gungkhoo: gi Khristu da" ngeibu: lu dang: gi ri xoug kyo to" khyoo: aboo loo: za: kyikhyeug khyoo: dangain" ziri: ngoonu" kham zo: boem bye:.
13 Noku Yhoem: Moo" khoug: moo: moo" voin bang: gi Noku Yhoem: Moo" khoug: moo zoo: noem shau" yu nyid boem ziri: we' nanu" gyeing" gyeing" nyang: se' nyid boem bye:.
14 Houg: yo' dakhyoo" ti" hau: ngeibu: lu dang: gi ri kho" kyo" nyid mo, gi hau: ngeibu: lu dang: mo, voemdoug: yo" khu: ca"- ga: tid to".
15 Nghoid loug we' ngoo gi hau: da" akho, akhang" daloem: ri we' ayu ci. Houg yhang: te" da" akho, akhang" ri nga" shid re" mho' wa ein: he: mougsoug" ri lhid" kaid zi anghoid. Houg: su" damho' wa nghoid rigi ngoo shi" shid: byoug, ri je" gi wa nghoid. Nga" da" deingmain" phau: khuang joyoo ri dang: koem: hang" ri we' abui" loo" nhang: noug.
16 He: da" ngeibu: lu dang: ri ngoo kho" kyoo" yoomo nga" shid re" ce: phau: khuang nyid wa joyoo aboo- khasu" wim ga: ri ngoo gi Mangso amyeung" byid: to" ziyo' dakhyoo" ti" ngoo akho" kyoo" loo: za: ayo" nyid loo. Ngoo hau: ngeibu: lu dang: ri akho" kyo" nghoid rigi nga" shid re" khayhi' mo gyoug pho" ja: nghoid wa lha"
17 Ngoo he: da" moozoo" ri nga" myid khyo" khyen: yu lho: dato' zei: nghoid rigi la, ga, yoo" wa ziri: ge myid yu" nyid. Nghoid loug we' he: da" moozoo" gi Mangsoo myid loem wigi ab byid: to" moo" nghoid yoomo zei: ca" da" yoovoin' daloem: nghoid ein: ngoo dazei: nyid.
18 Hougsu" nghoid ri ngoo gi ce" noem da" amyaid' yo" yu wa lha" ngeibu: lu dang: shid re" nga" da" akhang" ri aci: ziyo' aphoug" amho' loo: za: ngeibu: lu dang: yo" kho" kyo" khyoo: gi nga" amyaid' nghoid nyid.
19 Hougsu" nghoid yoomo ngoo gi hang" da" deizoo: we' anghoid loo: za: yhoem: seing: koid su: nghoid nyid. Nghoid loug we' byu yi yo' myonhoo: myoo: sho' ri yo" khyoid yu sho' byu dangain" mo, da" deizoo: ngoo bue" loo bye:.
20 Ngoo gi Yuda byu yi jhang moo: moo" zei: nyid da" uri nyangnu" ri yo" khyoid yu sho' Yuda byu dayug yhang: ti" bue" nyid. Ngoo nya: gungdu: nyang: Moshe da" tarha" khoug: moo: anyid nghoid loug we' hau: tarha" khoug: mo mo, ri yo" khyoid yu sho' ngoo gi tarha" khoug: moo: nyid nyid su: yhang: ti" bue" nyid.
21 Houg: yo' dakhyoo" ti" tungbau byumyu" yi da" akhoug: moo moo" zei: nyid uri nyangnu" ri Khristu jhang khyoo: yo" shu" yu sho' Yuda tarha" ri acang, loo: za: tungbau byumyu" dayug yhang: ti" ngoo bue" nyid. Hidsu" tid ri ngoo gi Mangso da" tarha" ri acang, loo: ein: tid nyid zi anghoid gyeing" nyang: ga: ri ngoo gi Khristu da" tarha" khoug: moo: nyid nyid su nghoid.
22 Ngoo gi Mangsoo ri loemkhau: khyoo: moo yoem: nu: mo, da" akhoug: moo vang lo" byoug, da" ayo, moo nyangnu" ri yo" khyoid yu sho' nyangnu" mo dayug yhang: ti" ngoo bue" nyid. Hougsu" dayham" ri ge' bue" khyo" yo" khyoid yu sho' ngoo gi byu aja" ja: bang: da" akhoug: moo: nyangnu" yo' dakhyoo" ti" danyid nyid.
23 Hau: ngeibu: lu dang: yoomo mainkaid jeju" ri nanu" yo' dage" yo" kham: yu sho' ein: he: khyoo: ri ngoo cang zei: lo zi nghoid.
24 Gei shi go" da" pui" moo: dangain" mo, gei shi goo" nghoid loug we' byu dayug za: oung: doid lo" da" jhungshug ri shau" kham: yu nyid khyoo- nanu" dangain" mo, se' nyid gu nghoid bye:. Hougsu" nghoid yoomo nanu" we' oung: doid lo" da" jhungshug, ri yo" kham: yu sho' gei shi go" nyid ge.
25 shi go" da" pui" vang wa shid re" shi goo wa soin nyid da" gei shi sarhi' yi yug khang" moo" gi thain: da" tarha" ri cang byeung" nyid ago". He: byu yi houg: su" koid da" khyoo: gi byo, gyoeb loo" se' da" bain: khuang: yo" yu wa shid re nghoid. Nyhang" koem gi pyaid moo: too: moo: ase' byo, joem: loo" da" bidmug, yo" yu wa shid re" gei shi go" nyid zi nghoid.
26 Hougsu" nghoid yoomo ngoo gi gei, loo" wa shid re" ke' to" da" bain: zeing ju" sho' dain" za: dagei lo" ziyo' ngoo gi thung" goo" nghoid loug lid' moo: akoem: athoung" pyam da" thung" go" sarhi' phoo ti" nghoid nyid.
27 Ngoo gi byu gootu: ri gei shi goo" wa pui" bain khi: lang" gi nga" gungdu: sugab, amyhi: wigi khyen: khyo' pyam zi ashoug" wa shid re" ca" jang" moo: yo" ci: yhung: wa shid re" ngoo nyang: ung' ri ngoo- yoem: kaid thoung" nyid ziyo' bain sho nyang: khang" zeung: ci: bye:.