1 Nanu" nyang: cang" moo" ze" bui" go" nghoid rigi Mangso byu yi da" dang: phyed byid: zigi kham: yu wa gungkhoo: ci: yoomo tungbau tarha" agyi yi jhang khyoo: voem" yhi: go" lha" 2 Mangso da" byu yi gi mougmyid ri tarha" dang: phyed wa bang: nghoid ziri: nanu" asi' goo" la". Mougmyid rilang" dang: phyed wa bang: nanu" ciwim moo" zoo: rilang" dang: ayo" phyed byid: goo" la". 3 Ngoonu" gi moug: lagyoo: yi ri dang: phyed byid: wa mo, nghoid ziri nanu" asi' goo" la". Houg: su" nghoid rigi: mougmyid mo khyoo: joem ri je" wigi: tarha" dang: yo" phyed byid: wa zi anghoid goo" la". 4 Houg: yhang: te" da" moo" thu' lo da" uri phung: yo' ci: asen:- phung: moo: ce: akho akhang" ayoo" bang: ri tarha" dang: phyed nhang: wa goo" la". 5 Nanu" sho' wa shid re" ngoo hidsu" tid zi nghoid. Khristain phung: byu mangnhung" nyang: cang" myeing" myo: lo da" uri nanu" da" khoug: moo tarha" dang: yo" se' phyed zi atham: thang phajhi" bo byu dayug khyalhang" gi nyid goo" wa nghoid. 6 Akhid" gi Aseing Yesu ri aloem" jeing" bang: da" shidkhoin" moo Khristain mangnhung" nyang: cang" yung" shug, go" nyid goonhung: lha". 7 Hid: yhang: ti" nanu" nyang: cang" da" akhoug: moo yung" shug go" zi thu' lo da" khyoo: gi nanu" bain" sho' soem" gyo" lo" da" khyoo: ri toin" shid, nyid bye:. Nyang: cang" nyang: yug: sang: go" da" khyoo: moo asoem" kham pyam ziyo' koid zo: zi kham khyoo: gi je ge nyid anghoid goo" la". 8 Nanu" gi hougsu" kham zeung: pyam wa da" gungkhoo: nanu" Khristain mangnhung" nyang: cang" shoid go" lho: dalhoid zoo: go" nyid goo" nhung" lha". 9 Akhyeing" ashoeb bang: gi Mangso mungdain ayo" vang seing: wa ziri: nanu" nyang: deing" deing se' nyid bye:. Khyoo: avhang: goo"- yau: shoo: goo" mo, yu phara" soolhoo: no mo, sube" myi: lhoid mo, yug gi nyang: cang aved avhu: koid goo" mo 10 Khoug" mo, fain" mo, vhoo: boo myo, no, bang- yhid: ya: vang bang: juang" yi gei sang: shang pyang: yen" mo, khoug" mo, mhoug mo, hid: bang: mo hang" we' Mangso mungdain ri yo" seing: boem wa zi anghoid. 11 Nanu" mo dayham" gi houg: yhang: te" da" moo" zei: lid: loo mo, za: nghoid abye: go". Nghoid loug we' nanu" gi nyha" da" Aseing Yesu Khristu da" myeing khyang" yo' we' nyha" Mangso Venyi: yo' we' cid" khyoid cid" young" ziri: shau" wigi Mangsoo ri ab pyam bye: mo, Mangso shidkhoin" moo: deing: byeung" bye: bang: bue" lo boem bye:.

12 Nanu" mo byu dayug yug gi"- Ngoo gi ce" noem ri we' koid wa da" akhang" yo" ga: wigi: tid wa zi nghoid. Nanu" tid ziyo' dakhyoo" deing wa nghoid loug we' dangain" gi re" da" shid mo ge zi anghoid. Ngoo ri: join yo" koid nhang:- 13 Zoo: noem gi voem: shid re" voemdoug: gi zoo: noem shid re, ga: wigi: byu dayug yug tid wa nghoid- nghoid houg: gi deung nyid- nghoid loug we' Mangsoo gi hau: eig ja: goin" ziri: lhu: phyo' shoin pyam wa zi nghoid. Hau" gungdu: koem gi aved avhu: moozoo" shid re" anghoid loo: za: hau: Aseing ri coung" nghei wa shid re" nghoid- Mangsoo we' gungshoo" moo: ca" nyid khyoo: ri dabyid: nyid. 14 Mangsoo gi hau" Aseing ri shid: jangmo doem dei to' loo nhang: khyo" wigi ngoonu" ri we' nya: da" yoem: zeing mo doem dei to' loo nhang: wa zi nghoid.

15 Nanu" da" gungdu: joem gi Khristu da" gungdu: mo akung: ako' joem nghoid ziri nanu" si' go" la". Hougsu" nghoid ri Khristu da" ako' dakung: ri khyu, yu lho: shava myhi' da" akung: ako' moo: xo' loo" nhang: wa la" Hougsu" we' age bui" wa. 16 Shava myhi' yo' hau: gungdu: ri shoin" pyam su: gi hau: shava myhi' yo' gungdu: daloem: za: bue" loo" bye: ziri: nanu" asi' goo" la" Jhoem: mungdang: moo nya: eig yug gi gungdu: daloem: za: bui" wa nghoid ga: tid to". 17 Nghoid loug we' nya: gungdu: ri Aseing yo' shoin" deung: too" su: gi Venyi: khyoo: khyo" Aseing yo' gungdu: daloem: za: nghoid nyid.

18 Yau: shoo: go" da" moozoo" ri jang" pyam nyid ge- byu wigi: zei: shoid da" yooboo dangain" gi nya: gungdu: ri shoid zi anghoid- nghoid loug we' soem" lid' sho: khyo" yug: da" yooboo yoo" su: gi nya: gungdu: ri nyang: shoid vhang: nyid su: nghoid. 19 Nanu" da" gungdu: gi nanu" moo: bo nyid da" Mangsoo byid: hau: gyeungshang: da" Venyi: noku yhoem: nghoid ziri nanu" asi' loo goo" la" 20 Hau: Aseing gi nanu" ri aphoug" phyed lho: qei yu too" mo, nghoid- Hougsu" nghoid yoomo nanu" da" gungdu: yo' Mangso da" myonhoo: phung" yoeb, ri thu ri" nhang: wa shid re" ci: yhoung: nyid ge.